Danilov (lidn)

Danilov
Данилов

Lidnanznam	Flag
Valdkund	Venäma
Eläjiden lugu (2021)	14,416 ristitud
Pind	11,82 km²
Pämez'	Ivan Svečuškin (sügüz'ku 2018—, Иван Свечушкин)
Telefonkod	+7−48 538-xx-xxx
Avtokod	76
Aigvö	UTC+3 (MSK+0)

Vn 2012 lidnfartaliden kart

Danilov (ven.: Дани́лов) om Venäman lidn da lidnankund Jaroslavlin agjan pohjoižpäivnouzmas. Se om Danilovan rajonan administrativine keskuz.

Istorii

Eländpunkt mainitase ezmäižen kerdan Vasilii II-carin-ruhtinasen dokumentas vl 1457 kuti Iona Moskvalaine-mitropolitan Danilovskoje-žilo (ven.: село Даниловское). Vl 1592 mainitase mugažo «Книга, глаголемая росискихь святыхь»-käzikirjuteses kuti Danilovskai-slabad (ven. Даниловская слобода). Suren Petran aigan toihe heboid armijan täht carin pert'kulun Danilovo-žilon hebovodindfermaspäi. Žilo sai Jaroslavlin agjan (gubernijan) makundan lidnan statusad vn 1777 3. päiväl elokud nügüdläiženke nimenke, sijazihe (dai sijadase) Arhangel'skan čuradusel Moskvaspäi. Vl 1870 saudihe puižen päraudtestancijan Danilovas, i vl 1872 raudten «Jaroslavl' — Vologd»-keskust radaškanzi. Raudtevagzalan uz' sauvuz om olmas vspäi 1930. Vll 1941−2009 pun ümbriradmižen mašinoiden tegim radoi.

Danilov šingotase mecpilindal, sömtegimištol (leibänedheotand, argvoin da saguden tegim), maižandusel (lindfabrik) i raudtesol'mel (Jaroslavl', Vologd, Bui (Kostroman agj)).

Geografijan andmused

Lidn sijadase Peleng-joginiškon oiktal randal tobjimalaz (21 km pitte, ven.: Пеленга, Sot'-jogen oigedpol'ne i Volgan hurapol'ne bassein), 160 m ü.m.t. keskmäižel korktusel.

Matkad Jaroslavlihesai om 65 km suvhe orhal, 68 km avtol vai raudtel. Lähembaine lidn om Lübim 36 km pohjoižpäivnouzmha orhal, 51 km avtotedme vai 40 km raudtedme. Federaline «Moskv — Arhangel'sk»-avtote (M8) ümbärdab lidnad päivlaskmaspäi.

Danilov om lidnankundan üks'jäižeks eländpunktaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 15 861 ristitud, rajonan koume videndest. Kaikiš suremb lidnan ristitišt oli 18..19 tuhad eläjid vll 1989−2001 (19 000 rist. vl 1992).

Ortodoksižen hristanuskondan kuz' pühäpertid oma kaičenus i saudud lidnas: Jumalanmaman Kazanin jumalaižen Danilovan naižjumalankodi (1918), ph. Mikulai-čudonsädajan jumalanpert' (saudihe vll 1910−1917) i Sündun Voznesenjan pühäpert' (1856−1859) oma väges, kaks' časounäd.

Danilovan politehnine kolledž (edel 2015. vot nimitihe tehnikumaks) om lidnan professionaližen opendusen aluzkundaks.

Galerei

• 
  Kul'turkeskuz vl 2014
• 
  Ph. Mikulai-čudonsädajan jumalanpert' i torguindrived, vn 2019 nägu
• 
  Keskškol nomer 2 Leninan nimed (2014)
• 
  Päivkodi (2021, ende naižiden pedagogine škol)
• 
  Danilov-päraudtestancii vl 2013

Irdkosketused

• Lidnankundan tobmuden aluzkundoiden oficialine sait (danilovgp.ru). (ven.)