Mirnii (Arhangel'skan agj)

Mirnii
Мирный

Lidnanznam	Flag
Valdkund	Venäma
Eläjiden lugu (2023)	27,174 ristitud
Pind	50,81 km²
Pämez'	Jurii Sergejev (keväz'ku 2010—)
Telefonkod	+7−81 834-xx-xxx
Avtokod	29
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Mirnii (ven.: Мирный [ˈmʲirnɨj]) om Venäman tedolidn Arhangel'skan agjan päivlaskmas. Se alištub Federacijan tobmudele kut «Mirnii»-SATÜ:n keskuz i alištub Arhangel'skan agjan tobmudele kuti Mirnii-lidnümbrikon administrativine keskuz.

Istorii

Eländpunktan aluz om pandud vl 1957 kut kontinentidenkeskeižiden raketoiden pästajiden sodalidnut saumovha kosmodromad. Nimitihe eländpunktad Leningrad-400, Leningrad-300 i Mirnii-12. Mirnii sai lidnan statusad vl 1966.

Mirnii šingotase kosmodroman holitusel, mašinansauvomižen tegimel, elektrotehnikan tedotehmižühtelmasel, sauvondan järedal kompanijal.

Geografijan andmused

SATÜ:n sijaduz agjan kartal

Lidn sijadase 115 m ü.m.t. keskmäižel korktusel, om ümbärtud mecal. Kaidan Plesci-järven (ven.: Плесцы) randad sijadasoiš lidnan suvipäivlaskmas.

Matkad Arhangel'skhasai om 195 km orhal i raudtedme vai 310 km avtotedme. Lähembaine lidn om Nändom 120 km suvhe orhal i raudtedme vai 250 km avtotedme. Lähembaine eländpunkt om lidnanvuitte Pleseck-žilo nelläs kilometras suvhe, ühtenzoitase avtotel da raudtel.

Vl 2004 sätihe Mirnii-lidnümbrikod, i lidn om üks'jäižeks elandpunktaks siš. Lidnümbrikon pind om 1762 km².

Eläjad

Vn 2002 Venäman rahvahanlugemižen mödhe lidnan eläjiden lugu oli 30 502 ristitud, vn 2010 — 30 280 ristitud, vn 2021 — 27 262 ristitud. Vspäi 1996 kaikiš suremb lidnan ristitišt oli 32 245 eläjad vl 2016 i 32 894 eläjad vl 2020. Kaik 32 175 eläjad oli lidnas vl 2017.

Rahvahad (enamba 0,4 % vl 2021): venälaižed — 91,3 %, ukrainalaižed — 1,5 %, totarlaižed — 1,0 %, vaugedvenälaižed — 0,4 %, baškiralaižed — 0,4 %, čuvašalaižed — 0,4 %, toižed rahvahad — 3,0 %, rahvahuden ozutandata — 2,0 %.

Ortodoksižen hristanuskondan kahesa pühäpertid oma saudud i avaitud lidnas: viž jumalanpertid, pühäpert' kodiš, kaks' časounäd.

Mirnijan valdkundaline tegimištoliž-ekonomine tehnikum om lidnan professionaližen opendusen aluzkundaks.

Transport

Lidnalaine-raudtestancii (ven.: Городская) radab lidnas, ezilidnjonused ajeltas raudtedme kosmodroman erasihe sijihe kaikuččel päiväl.

Pleseck/Plesci-sodalendimport sijadase koumes kilometras suvipäivnouzmha, nimitihe sidä Pero:ks 1990-nzihe vozihesai.

Galerei

• 
  Lidnan administracijan sauvuz vl 2009
• 
  Memorial raketsodamehiden oiktastuseks vn 1980 töhöpästandan katastrofan muštoks
• 
  Pleseck-kosmodroman abusauvused (2005) lidnanno
• 
  Pleseck-kosmodrom vl 2015
• 
  Plesci-lendimport vl 1998

Irdkosketused

• Municipaližen «Mirnii»-ühtnikan tobmuden aluzkundoiden oficialine sait (mirniy.ru). (ven.)