Našvill

Vikipedii-späi
Našvill
Nashville
 Lidnanznam
 Flag
Valdkund Amerikan Ühtenzoittud Valdkundad
Eläjiden lugu (2018) 692,587 ristitud
Pind 1,362,2 km²
Našvill Nashville
Pämez' Džon Kuper
(sügüz'ku 2019—.
John Cooper)
Telefonkod +1−615, 629
Aigvö tal'vel UTC−6,
kezal UTC−5


Lidnan transportine kart (2014)

Našvill (angl.: Nashville [ˈnæʃvɪl]), vai Nešvill, om AÜV:oiden lidn Tennessi-štatan keskuzpalan pohjoižes. Se om Tennessin pälidn da kaikiš suremb lidn eläjiden lugun mödhe, AÜV:oiden 24-nz' lidn eläjiden lugun mödhe. Ristitišt i pind oma ozutadud Deividson-ümbrikon röunoiš, ümbrikon i lidnan ohjastuz om ühthine.

Istorii[vajehta | vajehtada tekst]

Ende indejalaižiden mectujad čeroki-, čikaso- i šauni-rahvahad eliba Našvillan tahondas. Pit'kan aigan ei olend evropalaižiden žiloid lidnan tahondas, sijaližed indejalaižed pidiba tulijoid agressivižikš. Nügüdläižen eländpunktan aluz om pandud sirdnikoil Virginii-štataspäi vl 1779, nimitihe sodan ripmatomudes Frensis Neš-jenaralan (angl.: Francis Nash) kanzannimen mödhe. Lidnan päkäskuz om vahvištadud vl 1806. Štatan kaikenaigaine pälidn vspäi 1843.

Našvill šingotase sömtegimištol (konditerižed tegesed), sauvondmaterialiden pästandal, avtosauvomižen tegimil (Nissan, Bridgestone), protestantizman jumalankodikundoiden keskuseks. Muzikaližen «kantri»-stilin pälidn, läz 20 tuhad radnikoid muziksarakos. Tervhudenkaičendan i opendusen aluzkundad (Vanderbil'tan universitet, Tennessi-štatan universitet) oma keskitadud lidnas. Enamba kaiked radnikoid om ottud tervhudenkaičendan sarakho i valdkundaližihe aluzkundoihe. Järedoiden kompanijoiden päfaterad oma lidnan aglomeracijas: Community Health Systems i Dollar General (laukad fiksiruidud arvonke), mugažo neniden mail'man kompanijoiden ofisad: Amazon, Dell, Deloitte, Ernst & Young i Philips.

Geografijan andmused[vajehta | vajehtada tekst]

Lidn sijadase Kamberlend-laivjogen molembil randoil (Ogajon hura ližajogi 1106 km pitte), 117..354 m korktusil, 182 m ü.m.t. keskmäižel korktusel. Ühthine pind om 1362,2 km², sidä kesken kuivma 1305,4 km², vezi 56,8 km².

Klimat om subtropine neps. Voden keskmäine lämuz om +15,5 C°, absolütine minimum — −27 C°. Paneb sadegid 1200 mm vodes, vähemba elokus-redukus (77..87 mm kus). Tornadod oma paksud kezaaigan, no ned todas lidnale surid murendusid lujas harvoin.

Našvill jagase läz 20 susedkundaks (angl. neighborhood). Edeline lidnan pämez' oli Devid Braili (keväz'ku 2018 — sügüz'ku 2019, David Briley).

Eläjad[vajehta | vajehtada tekst]

Vn 2010 AÜV:oiden rahvahanlugemižen mödhe eläjiden lugu oli 626 681 ristitud. Kaikiš suremb lidnan ristitišt om nügüd'. Läz 2,1 mln eläjid om ezilidnoidenke (2019, štatan ühtenz' i 36. sija valdkundas). Edel vn 2017 semendkud štatan kaikiš enamba elänzoittud lidn oli Memfis. Läz 700 pühäpertid om olmas Našvillas.

Transport[vajehta | vajehtada tekst]

Avtobusad da ezilidnelektrojonused oma kundaližeks transportaks lidnas sen ezilidnoidenke. Jüguzjogiport radab Kamberlendan randal. Raudte radab vaiše jüguiden täht, passažirühtenzoituz tuli lophu vl 1974. Avtorengaz om saudud lidnan keskuzrajoniš ümbri.

Rahvahidenkeskeine civiline lendimport (BNA, 16 mln passažiroid vl 2018) sijadase 12 km suvipäivnouzmha lidnan keskusespäi. Tehtas passažirreisid AÜV:oiden äjihe järedoihe lidnoihe, mugažo Londonha, Torontoho i Kankun-kurorthasai.

Homaičendad[vajehta | vajehtada tekst]


Irdkosketused[vajehta | vajehtada tekst]



AÜV:oiden järedad lidnad
Enamba 3 mln. eläjid Los Andželes | Nju Jork
1—3 mln. eläjid Čikago | Dallas | Filadel'fii | Finiks | Hjuston | San Antonio | San Diego | San Hose
750 tuh. eläjid — 1 mln. Džeksonvill | Fort Uert | Indianapolis | Kolumbus | Ostin | San Francisko | Šarlott
Enamba 500 tuh. eläjid Al'bukerke | Baltimor | Boston | Denver | Detroit | El' Paso | Fresno | Las Vegas | Luisvill | Memfis | Miluoki | Našvill | Oklahoma Siti | Portlend | Sakramento | Sietl | Tuson | Vašington