Nevel'sk

Vikipedii-späi
Nevel'sk
Невельск
 Lidnanznam
 Flag
Valdkund Venäma
Eläjiden lugu (2023) 10,528 ristitud
Pind 9 km²
Nevel'sk Невельск
Pämez' Aleksei Šabel'nik
(kül'mku 2017—)
Telefonkod +7−42 436-xx-xxx
Avtokod 65
Aigvö UTC+11 (MSK+8)


Nevel'sk (ven.: Не́вельск, japon.: ネベリスク Neberisku, edel 1946. vot — japon.: 本斗 Honto) om Venäman lidn Sahalinan agjan Sahalin-saren suves. Se om Nevel'skan lidnümbrikon administrativine keskuz (edel 2010. vot — rajonan).

Istorii[vajehta | vajehtada tekst]

Ainalaižiden Ponto-Kesi- i Turumai-küläd mainitasoiš vspäi 1789. Vll 1855−1875 kaks'jaine ohjanduz oli küliš — Venäman imperijan i Japonijan. Nügüdläižen eländpunktan aluz om pandud Japonijha 20. voz'sadal lidnalaižes Honto-volostikš Maokan makundas. Vl 1920 raudte ühtenzoiti žilod Maokanke. Vhesai 1945 oli Japonijan palaks, šingotihe kalankazvatusel, jädumatomal meriportal (vspäi 1927) i imperatorižel sodaškolal. Sai lidnan statusad vl 1946, nimitihe Gennadii Nevel'skoi-admiralan kanzannimen mödhe.

Nevel'sk šingotase kalanpüdandan meriportal i kalankazvatusel, mugažo merikolledž i röunman sodaväged sijadasoiš Nevel'skas.

Geografijan andmused[vajehta | vajehtada tekst]

Lidn sijadase Tataran sal'men suvipäivnouzmaižel randal, lühüdoiden Nevel'skai- (ven.: Невельская) i Kazačk- (ven.: Казачка) jogiden alangištoiš (lanktas merhe), seičeme metrad ü.m.t. keskmäižel korktusel.

Matkad Suvisahalinskhasai om 73 km pohjoižpäivnouzmha orhal, 91 km avtotedme vai 307 km raudtel. Lähembaine lidn om Holmsk 43 km pohjoižhe-pohjoižpäivnouzmha orhal, 44 km raudtedme vai 47 km avtotedme.

Nevel'sk om Venäman lähembaine Japonijannoks lidn, matkad Hokkaidon Soi-nemehesai om 124 km suvhe orhal. Sidon optine kabel' 570 km pitte zavodiše lidnas i ühtenzoitab Japonijan Sapporon Isikari-ezilidnanke.

Meriport om saudud pudotadud gruntal. Jäl'gmäine luja manrehkaiduz oli vn 2007 2. päiväl elokud (6,1 magnitudanke). Nevel'sk alištub lavinoile.

Tobmuz[vajehta | vajehtada tekst]

Kaik kümne žilod mülüdas lidnümbrikho Nevel'skan ližaks, znamasine om Gornozavodsk-žilo (3711 rist. vl 2021). Ümbrikon pind om 1445,40 nellikkilometrad.

Municipaližen ühtnikan pämez' om sen Administracijan pämez'. Edeližed lidnan pämehed oma Vladimir Pak (2005−2017), Vasilii Rotočev (1998−2005).

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 11 682 ristitud, lidnümbrikon kaks' koumandest, vn 2021 — 10 608 ristitud. Kaik 10 681 eläjad oli lidnas i 15 716 eläjad kaikes lidnümbrikos vl 2017. Kaikiš suremb lidnan ristitišt oli 24 800 eläjad vl 1992.

Ortodoksižen hristanuskondan kaks' jumalanpertid[1] oma saudud puspäi lidnas: Jumalanmaman Sündundpäivän (letihe vll 1995−1998) i Jumalanmaman «Kacu tüništoitushe»-jumalaižen (om sätud vll 2013−2015).

Lapsiden opendusen aluzkundad oma viž päivkodid, kaks' keskškolad (nomer 2 i 3), čomamahtoiden škol, lapsiden sädamižen keskuz. Sahalinan merikolledž[2] om lidnan professionaližen opendusen aluzkundaks.

Galerei[vajehta | vajehtada tekst]

Homaičendad[vajehta | vajehtada tekst]

  1. Nevel'skan pühäpertid sobory.ru-saital. (ven.)
  2. Sahalinan merikolledžan sait (sakhmorcollege.ru). (ven.)

Irdkosketused[vajehta | vajehtada tekst]



Sahalinan agjan lidnad
Aleksandrovsk Sahalinal | Aniv | Dolinsk | Holmsk | Korsakov | Kuril'sk | Makarov | Nevel'sk | Oh | Poronaisk | Severokuril'sk | Suvisahalinsk | Tomari | Uglegorsk