Tutajev

Vikipedii-späi
Tutajev
Тутаев
 Lidnanznam
 Flag
Valdkund Venäma
Eläjiden lugu (2021) 39,643 ristitud
Pind 25,47 km²
Tutajev Тутаев
Pämez' Sergei Jeršov
(2007—)
Telefonkod +7−48 533-xx-xxx
Avtokod 76
Aigvö UTC+3 (MSK+0)


Tutajev (ven.: Тута́ев) om Venäman lidn da lidnankund Jaroslavlin agjan keskuzpalan pohjoižpäivnouzmas. Se om agjan koumanz' lidn eläjiden lugun mödhe, Tutajevan rajonan administrativine keskuz, mülüb Venäman istorižiden eländpunktoiden nimikirjuteshe.

Istorii[vajehta | vajehtada tekst]

Eländpunktan aluz om pandud Volgan oiktal randal pagenuzil Jaroslavlišpäi vn 1238 mongoližen londan jäl'ghe kuti Borisoglebskai slabad, i 13. voz'sadan kahtendel polel kuti Romanov-lidn Volgan hural randal, om nimitadud ugličulaižen Roman Vladimirovič-ruhtinasen nimen mödhe. Vspäi 1345 15. voz'sadan augotišhesai erine Romanovan ruhtinazkund oli olmas. Vl 1563 sirtihe totarlaižid Romanov-lidnha hristianizacijan ramuziš Ivan Grazijan käskön mödhe. Vspäi 1761 sirtihe heid Kostroman alle i rušihe saudud mečetid, no kazvatadas sijališt romanovišt lambhiden sugud tähäsai.

Vl 1777 Borisoglebskai slabad kändihe Borisoglebsk-lidnaks, Romanov i Borisoglebsk saiba makundoiden lidnoiden statusad. Vl 1822 ühtenzoittihe lidnoid da anttihe Romanov-Borisoglebsk-nimed (ven.: Рома́нов-Борисогле́бск). Vn 1918 tal'vkun 9. päiväspäi lidn om olmas Tutajev-nimenke Rusttan armijan Il'ja Tutajev-rivičun (1896−1918) kanzannimen mödhe, hän pölištui Jaroslavlin vasthalibundan kačustelendan aigan. Nügüd'aigan lidnan hurapol'ne pala nimitaze Romanovan, oigedpol'ne — Borisoglebskan.

Tutajev šingotase likutimtegimel[1] (dizel'likutimed, ajaimkonor'ad, avtolebötkad), pölvhankombinatal (brizent da toižed tehnižed kanghad), sömtegimištol (sagud, kolbas, lihaproduktad) i turizmal. Jaroslavlin kezikarvfabrik[2] radab läz lidnad.

Geografijan andmused[vajehta | vajehtada tekst]

Lidn sijadase Volgan Gor'kijan vezivaradimen molembil randoil, kukhikahas tahondas, 130 m ü.m.t. keskmäižel korktusel. Voib sadas Volgan toižhe randha ehtatimel, lähembaine sild joges päliči om Jaroslavliš. Matkad lähembaižen Jaroslavl'-lidnan röunhasai om 25 km suvipäivnouzmha orhal, avtol vai Volgadme, keskuzpalhasai — 35 km. Toine järed lähine lidn om Ribinsk 45 km lodeheze avtotedme vai Volgan ülezjogen.

Lidn om lidnankundan üks'jäižeks eländpunktaks.

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 41 005 ristitud, rajonan seičeme kümnendest. Kaik 40 441 eläjad oli lidnas vl 2017. Kaikiš suremb lidnan ristitišt oli enamba 45 tuhad eläjid vll 1996−2001 (45 700 rist. vl 1996).

Ortodoksižen hristanuskondan koumetoštkümne pühäpertid[3] oma kaičenus i saudud lidnas: Sündun Eläbzdusen i Ristan Zdviženjan päjumalanpertid, seičeme jumalanpertid, nell' časounäd. Niiden ližaks kaks' jumalanpertid ei ole kaičenus.

Tutajevan politehnine tehnikum[4] i Ribinskan aviatehnižen universitetan filial oma lidnan professionaližen opendusen aluzkundoikš.

Galerei[vajehta | vajehtada tekst]

Homaičendad[vajehta | vajehtada tekst]

  1. Tutajevan likutimtegimen sait (paotmz.ru). (ven.)
  2. Jaroslavlin kezikarvfabrikan sait (shubenki.ru). (ven.)
  3. Tutajevan pühäpertid sobory.ru-saital. (ven.)
  4. Tutajevan politehnižen tehnikuman sait (pu41.edu.yar.ru). (ven.)

Irdkosketused[vajehta | vajehtada tekst]



Jaroslavlin agjan lidnad
Danilov | Gavrilov Jam | Jaroslavl' | Lübim | Miškin | Pereslavl' Zalesskii | Pošehonje | Ribinsk | Sur' Rostov | Tutajev | Uglič