Stavropol'

Stavropol'
Ставрополь

Lidnanznam	Flag
Valdkund	Venäma
Eläjiden lugu (2024)	557,271 ristitud
Pind	171,7 km²
Pämez'	Ivan Ul'jančenko (kezaku 2020—)
Telefonkod	+7−8652-xxx-xxx
Avtokod	26, 126
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Lidnümbrikon kart (2022)

Stavropol' (ven.: Ста́врополь) om lidn da lidnümbrik Venäman suvipäivlaskmas. Se om Stavropolin randan administrativine keskuz da kaikiš suremb lidn. Lidnümbrik röunatab Špakan ümbrikon territorijanke kaikiš poliš.

Istorii

Eländpunktan aluz om pandud vl 1777 kuti Stavropol' Kavkazal. Vl 1785 se sai lidnan statusad. Vl 1897 raudte tuli lidnha Kavkazskai-stancijaspäi, ühtenzoiti lähiženke «Rostov Donal — Vladikavkaz»-jononke.

Vozil 1935−1943 lidnan nimi oli Vorošilovsk. Vspäi 1964 udesnimitihe Stavropolid Volgaveres, i oficialine nimi tegihe nügüdläižikš.

Stavropol' šingotase mašinansauvomižel, elektrotehnižel sarakol i ladimensauvomižel (sidä kesken avtoiden täht), erazvuiččel sömtegimištol, biohimijan edheotandoil.

Geografijan andmused

Lidnan sijaduz randas vn 2010 kartal

Lidn sijadase Stavropolin randan päivlaskmas, Kavkazan ezimägištol, 230..660 m korktusil valdmeren pindan päl. Järed vezišt sijadase lidnümbrikon päivlaskmas — Sengileevskoje-vezivaradim (42 km²), Jegorlik-jogi täudub sidä, kudambad sen ližaks Kuban' täudub Nevinnomisskan kanalan kal't.

Matkad Moskvhasai om 1230 km pohjoižhe orhal vai 1410 km avtotedme. Lähembaižed järedad lidnad oma pohjoine Mihailovsk-kaimdailidn, Nevinnomissk suvhe (46 km orhal) i Armavir päivlaskmha (67 km orhal).

Klimat om ven kontinentaline. Voden keskmäine lämuz om +9,5 C°, kezakun-elokun +19,2..+22,3 C°, tal'vkun-uhokun −0,7..−2,3 C°. Ekstremumad oma −28,3 C° (uhoku) i +39,7 C° (eloku). Kezaaigan minimum om +3,1 C° (kezaku), tal'vaigan maksimum om +22,0 C° (tal'vku). Ei voi panda halad kezakus-elokus. Paneb sadegid 556 mm vodes, enamba semendkus-kezakus (66..80 mm kus), vähemba tal'vkus-keväz'kus (28..34 mm kus). Kaikiš lühüdamb päivänvauktusen hätkeližuz oleskeleb tal'vkun 22. päiväl (8 časud 44 minutad), kaikiš hätkemb — 22. kezakud (15 časud 37 minutad).

Tobmuz

Stavropolin administrativižed rajonad (vspäi 1977):
     Tegimišton rajon      Oktäbrin rajon      Leninan rajon

Toine lidnümbrikon eländpunkt om Grušovii-futor (196 eläjad vl 2017). Lidnan ümbrikon pind — 279,89 km², lidnan pind — 171,7 km². Stavropol' jagase koumeks administrativižeks rajonaks, ned ei olgoi municipaližikš ühtnikoikš.

Lidnan pämez' (ven.: Глава города Ставрополя) om sen Administracijan pämez', hän panese radnikusele lidnan Duman ühtnijoil videks vodeks. Edeline lidnan pämez' oli Andrei Džatdoev (2016 — 30.04.2020, koli). Lidnan Duman ezimez' om Georgii Kolägin vn 2016 redukuspäi.

Eläjad

Vl 1939 lidnan ristitišt oli 85 251 eläjad, vl 1959 — 141 023 eläjad. Vn 2010 Venäman rahvahanlugemižen mödhe lidnan eläjiden lugu oli 398 539 ristitud, vn 2021 — 547 443 ristitud. Kaik 433 577 eläjad oli lidnas vl 2017. Kaikiš suremb lidnan ristitišt om nügüd'. Läz 600 tuhad ristituid elädas ezilidnoidenke.

Rahvahad (2010): venälaižed — 88,1 %, armenijalaižed — 4,5 %, ukrainalaižed — 1,0 %, toižed rahvahad — 6,4 %.

Ortodoksižen hristanuskondan ph. Johannan Mariinskii-naižjumalankodi (vspäi 1852), koume päjumalanpertid, kaks'kümne jumalanpertid, kaks' časounäd i hengeline seminarii oma kaičenus i saudud lidnas. Mugažo Armenijan apostoližen jumalankodikundan pühäpert', protestantizman kundad i islaman pühäpert' (letihe vll 1913−1915) oma avaitud.

Transport

Avtobusad, trolleibusad, maršruttaksid da taksid oma kundaližeks transportaks lidnas. Avtobusad ühtenzoittas Stavropolid randan lidnoidenke, sen ližaks voib sadas raudtel Kavkazan Mineraližed Veded-regionhasai randan suves.

Rahvahidenkeskeine soda- da civiline Stavropol' -lendimport A.V. Suvorovan nimed (STW / СТВ / URMT, 392 tuh. passažiroid vl 2018) sijadase ani lidnan röunan taga pohjoižpäivnouzmas, Mihailovsk-kaimdailidnas. Tehtas reisid Moskvha i Stambulha.

Galerei

• 
  Lidnan ohjastusen pert' (2013)
• 
  Ph. Vladimir-ruhtinasen päjumalanpert', vn 2021 nägu
• 
  «Signal»-radiotegim vl 2019
• 
  Stavropolin valdkundaline medicinine universitet (2016)
• 
  Profühtnendoiden sportan da kul'turan pert'kulu (huralpäi, 2010)
• 
  Stavropolin akademine dramteatr M. Ju. Lermontovan nimed (vn 2012 olend)
• 
  Pästadion (2009)
• 
  Stavropol'-Rostovskii-päraudtestancijan sauvuz vl 2010

Irdkosketused

• Lidnan Duman oficialine sait (dumast.ru). (ven.)
• Lidnan Administracijan oficialine sait (stavropol.gosuslugi.ru). i sen vanh versii (ставрополь.рф, om täuttud vn 2024 lophusai). (ven.)