Tübingen

**Tübingen**
Lidnanznam;	Flag;
Valdkund	Saksanma
Eläjiden lugu (2025)	92,607 ristitud
Pind	108,06 km²
Pämez'	Boris Pal'mer; (viluku 2007—,; Boris Palmer)
Telefonkod	+49−7071, 7073, 7472
Aigvö	tal'vel UTC+1,; kezal UTC+2

Tübingen (mugažo saksan kelel, virktas [ˈtyːbɪŋən], sijaline švabijan pagin: Dibenga) om universitetine lidn Saksanman suves, Baden-Vürtemberg-federacijanman keskuzpalas.

Istorii

Feodaline «Tübingen-lidnuz» mainitase ezmäižen kerdan vl 1078 kuti Hohentübingen (latin.: Tuingia i Twingia), konz Saksanman Henri IV-kunigaz oli ümbärtud i ištui täs. Tübingen-eländpunkt mainitase vspäi 1191. Vanh lidn om kaičenus tähäsai täuzin mail'man sodoiden jäl'ghe, siš ei olend järedad tegimištod.

Nügüd'aigan Tübingen šingotase turizman keskuseks. Lidnan struktur kožub jaugnikoidenke i velosipedistoidenke, om äi kovitadud tehuzid. Kaik 18 festivalid oleskeldas voden aigan fil'miden, sportan i sömän polhe, jarmankad. Om penid edheotandoid tekstilin, mašiništonsauvomižen, medicinižen tehnikan, rahvahanpramozloiden i biotehnologijoiden sarakoiš. Neniden kompanijoiden päfaterad sijadasoiš lidnas: «Walter AG» (frezad, pörkad), «Hugo Brennenstuhl» (kabel'mašiništ, detektorad, pidatimed, päiväižbatarejad) i «CHT-Gruppe» (himižed ližasubstancijad tekstiližen, sauvondan i ühthekeradamižen sarakoiš).

Geografijan andmused

Lidnan sijaduz federacijanmas i valdkundas vn 2004 kartal

Lidn sijadase Nekkar-jogen da sen ližajogiden randoil, 341 m ü.m.t. keskmäižel korktusel, Švabijan Al'pan lodehližen ezimägišton 515 metrhasai.

Lähembaine järed lidn om Štuttgart koumekümnes kilometras pohjoižhe.

Klimat om ven. Voden keskmäine lämuz om +9,9 C°, kezakun-elokun +17,0..+18,9 C°, tal'vkun-uhokun +1,3..+2,6 C°. Paneb sadegid 715 mm vodes, enamba semendkus-heinkus (75..91 mm kus), vähemba vilukus-uhokus (37..38 mm kus).

Tobmuz

Tübingenan municipalitet jagase kaks'kümneks koumeks nimitadud da nomeruidud fartalaks (üks'lugu saks.: Stadtteil), niiden kesken kümne oma lidnan irdpolel.

Edeližed lidnan pämehed oma Brigitta Russ-Šerer (Brigitte Russ-Scherer, 1999−2007), Eugen Šmid (Eugen Schmid, 1974−1999).

Eläjad

Vn 2001 Saksanman rahvahanlugemižen mödhe lidnan eläjiden lugu oli 82,444 ristitud, vn 2011 — 89,011. Kaik 87,464 eläjad oli lidnas vl 2015. Kaikiš suremb lidnan ristitišt om nügüd'.

Vl 2016 26,9 tuh. eläjid oliba üläopenikoikš. Tübingenan universitet Eberhardan i Karlan nimed^[1] (27,2 tuh. üläopenikoid 2019/20 openduzvodel) radab vspäi 1477, se om kaikiš amuižembiš valdkundas i om lidnan kaikiš järedambaks radonandajaks.

Galerei

Lidnan tobmuden sauvuz (eloku 2018)
Tübingenan universitetan aktzal i juridine fakul'tet (2004, om saudud vll 1841−1846)
Maks Plankan sebran Biologijan institut (vn 2022 augotiž)
Alištadud federacijanman tobmudele Tübingenan teatr (2008)
Tübingen-päraudtestancii vl 2008