Televizii

Televizijan alusenpanend mail'man valdkundoiš, voz'kümnidme:

1930−1939 1940−1949 1950−1959 1960−1969 1970−1979 1980−1989 1990−1999 2000−2024 Ei ole televizijad Ei ole andmusid

Televizii (amuižgrek.: τῆλε tele «edahan» + latin.: visio «nähta»), vai TV, om elektrosidon tehnologii oigendamha likujad kuvad keskustale.

Kulund oigendase kuvanke ühtenaigašti statjoiden tobjas palas. Järgeližes elos televizii-termin kävutase mugažo znamoičemha kaikid otnus teleoigendusiden sädandha da levigandushe organizacijoid. Televizii kändihe kaikiš znamasižembaks massinformacijan abutuseks 20. voz'sadan kahtendes polespäi, se om kožui bobuštusen, opendusen, uzištusiden i reklaman oigendusen täht.

Pästtud efirha TV-oigendusiden varhapanendan tehnologijad, oz., videomagnitofon i optižed diskad, ližaduiba päzumižmahtust kinematografan produkcijale, laskiba kacta fil'mid kodiš televizoral, ei ole vaiše kinoteatras. Vl 2013 mail'man kodiižandusiden 79 % oliba hot' ühtenke televizoranke. Televizijal päine rol' oli kundaližen mel'pidegen formiruindas 1950-nziš vozišpäi, zavodi kadotada sidä 2010-nziden voziden keskes korgedpiguzližen internetan i kormankompjuteriden šingotesen tagut. TV-tehnologijan suren rolin tagut biznesas da politikas ÜRO pani jogavottušt Mail'man televizijan päiväd (angl.: World Television Day) vspäi 1997, praznuičese 21. kül'mkud.