Tomari (Venäma)

Tomari
Томари

Lidnanznam	Flag
Valdkund	Venäma
Eläjiden lugu (2023)	4,299 ristitud
Pämez'	Ol'ga Manžara (sügüz'ku 2020—)
Telefonkod	+7−42 446-xx-xxx
Avtokod	65
Aigvö	UTC+11 (MSK+8)

Tomari (ven.: Томари́, japon.: トマリ Tomari, edel 1946. vot — japon.: 泊居 Tomarioru) om Venäman lidn Sahalinan agjan Sahalin-saren suves. Se om Tomarin lidnümbrikon (edel 2006. vot — rajonan) administrativižeks keskuseks da palaks.

Istorii

Eländpunktan aluz om pandud Venäman imperijha kuti Tomarioru vl 1870, nimituz libub ainan kelespäi. Vozil 1905−1945 oli Japonijan palaks. Japonijalaižed sauvoiba cellülozbumagašt tegint i kaivusid, tegim radoi satusekahas 1990-nzihe vozihesai. Anttihe lidnan statusad vl 1946 i kebnetihe nimed venäkel'žen ristitišton täht.

Tomari šingotase sömtegimištol (kalan ümbriradmine), hilen samižel, mecan varhapanendal.

Geografijan andmused

Lidnümbrikon sijaduz agjas (2010)

Lidn sijadase ümbrikon suvižes čogas, Tomarink-mägijogen sun randoil (ven.: Томаринка 41 km pitte) i Tünen valdmeren Tataran sal'men suvipäivnouzmaižel randal, 20 m ü.m.t. keskmäižel korktusel.

Matkad Suvisahalinskhasai om üks' sada kaks' kilometrad suvipäivnouzmha orhal, 182 km avtotedme vai raudtedme. Toižed lähembaižed lidnad oma Dolinsk 75 km suvipäivnouzmha orhal, 140 km avtotedme vai raudtel i Holmsk 79 km suvhe orhal, 91 km avtol vai raudtedme.

Tobmuz

Municipaližen ühtnikan pämez' om sen Administracijan pämez'. Edeline lidnümbrikon pämez' om Aleksandr Kobelev (kül'mku 2016 — sügüz'ku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 4 541 ristitud, lidnümbrikon pol', vn 2021 — 4 313 ristitud. Kaik 3 774 eläjad oli lidnas vl 2017. Kaikiš suremb lidnan ristitišt oli 8 865 eläjad vl 1935, 9 909 eläjad vl 1959 i 8 121 eläjad vl 1989.

Ortodoksižen hristanuskondan Sündun Tozimel'žen Ristan Zdvižen'jan uz' puine jumalanpert' om saudud vll 2004−2007. Sintoizman pühäpertin kompleksan jändused oma kaičenus sambnuden vulkanan päl.

Openduz

Lapsiden opendusen aluzkundad oma kaks' nimitadud i nomeruidud päivkodid (nomer 3 i 7), keskškol, lapsiden sädamižen keskuz.

Professionaližen opendusen aluzkundad ratas lähembaižiš lidnoiš.

Galerei

• 
  Ümbrikon tobmuden sauvuz (2023/2025)
• 
  Tavaroiden lapsiden täht lauk vl 2023 vai 2025
• 
  Meblän tehmižen ceh vl 2023 vai 2025
• 
  Tomari-päraudtestancijan sauvuz vl 2016
• 
  Raudted lidnas vn 2016 kezakus

Irdkosketused

• Lidnan da lidnümbrikon tobmuden aluzkundoiden oficialine sait (tomari.sakhalin.gov.ru) i sen vanh versii. (ven.)
• Lidn da lidnümbrik Sahalinan agjan ohjastusen oficialižel sakhalin.gov.ru-saital. (ven.)