Usol'je

Usol'je
Усолье

Flag
Valdkund	Venäma
Eläjiden lugu (2023)	6,489 ristitud
Pind	16 km²
Telefonkod	+7−34 244-xx-xxx
Avtokod	59, 81, 159
Aigvö	UTC+5 (MSK+2)

Usol'je (ven.: Усо́лье, perm. komi: Со́вдор / Усо́ллё) om Venäman lidn Permin randan keskuzpalan pohjoižes. Se mülüb Bereznikin ümbrikho, edel 2018. vot oli Usol'jen rajonan administrativižeks keskuseks da palaks.

Pidab ei segotada Sibirin Usol'jenke (lidn Irkutskan agjas).

Istorii

Eländpunktan aluz om pandud vl 1606 kuti keitandsolan samižen keskuz i Stroganovad-torgovanoiden pälidn Kam-jogen randal. Vl 1809 luja lämoipalo pani 1200 pertid mantazole, i sauvoškanzihe kivižid pertid. Saihe solad 20. voz'sadahasai. Erigoittihe Uz' Usol'je-žilod Berezniki-lidnaspäi vl 1940 i anttihe lidnan statusad.

Vll 1954−1956 täuttihe Kaman vezivaradint pästamha töhö Kaman GES:ad, i upotihe Usol'jen tobjad palad, sirtihe eläjid. Kacmata sihe, om kaičenus 40 endevanhad sauvust: Spasan Toižetamižen päjumalanpert', ph. Mikulai-čudonsädajan jumalanpert', Stroganovoiden palatad (Kaman sarel), erižpertid.

Usol'je šingotase turizmal i mecan ümbriradmižel, om äi tegimid lähižes Berezniki-lidnas.

Geografijan andmused

Enččen Usol'jen rajonan sijaduz randas vn 2010 kartal

Lidn sijadase ümbrikon keskuzpalan päivnouzmas, Kamanjogen oiktal randal, 140 m ü.m.t. keskmäižel korktusel.

Berezniki-lidn seižub jogen vastrandal ühtes kilometras, lidnad ühtenzoittas avtotesildal (vspäi 1981). Matkad Permihesai om 183 km suvhe orhal.

Tobmuz

Kaik 47 pen't žilod da küläd mülüiba lidnankundha Usol'jen ližaks.

Jäl'gmäine lidnankundan tobmuden pämez' oli Andrei Bogatiröv vn 2017 keväz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 5 694 ristitud, vn 2021 — 6 619 ristitud. Vl 2017 kaik 6 236 ristitud elihe lidnas i 8 988 ristitud kaikes lidnankundas, rajonan koume videndest. Kaikiš suremb lidnan ristitišt oli 11 788 eläjad vl 1959.

Ortodoksižen hristanuskondan Spasan Toižetamižen naižjumalankodi (om avaitud vspäi 1999) ühtennimiženke päjumalanpertinke, kaks' jumalanpertid i koume časounäd oma kaičenus lidnas, no oma udessündutamižes.

Lapsiden opendusen aluzkundad oma päivkodid, keskškol. Professionaližen opendusen aluzkundad ratas lähižes Berezniki-lidnas.

Galerei

• 
  Lidnan istorižen ansamblin shem (2015)
• 
  Spasan Toižetamižen päjumalanpert', vn 2015 nägu
• 
  Ph. Mikulai-čudonsädajan jumalanpert', vn 2015 nägu
• 
  Golicinan usadib vl 2012
• 
  Enččen soltegimen kontor (2015, istorine sauvuz)

Irdkosketused

• Lidnankundan lehtpoled Usol'jen rajonan tobmuden usolskij.permarea.ru-saital. (ven.)
• Lidnan istorijan informacine sait (usole.ru). (ven.)