Ust'-Kamenogorsk

Ust'-Kamenogorsk
Өскемен / Öskemen
Lidnanznam;	Flag;
Valdkund	Kazahstan
Eläjiden lugu (2018)	329,090 ristitud
Pind	303,15 km²
Pämez'	Žaksilik Omar; (eloku 2018—,; Жақсылық Омар)
Telefonkod	+7−7232-xxx-xxx
Aigvö	UTC+6

Ust'-Kamenogorsk (kaz.: Өскемен / Öskemen, ven.: Усть-Каменого́рск) om lidn Kazahstanan pohjoižpäivnouzmas. Se om Päivnouzmaine Kazahstanan agjan administrativine keskuz da kaikiš suremb lidn eläjiden lugun mödhe.

Istorii

Eländpunktan aluz om pandud vl 1720 kuti Ust'-Kamennai-lidnuz (ven.: Усть-Каменная крепость). Om nimitadud geografižen sijadusen mödhe, Irtiš-jogi lähteb mägizonaspäi i jokseb edemba tazangištodme. Se sai lidnan statusad vl 1868.

Ust'-Kamenogorsk šingotase mujumetallurgijan äiluguižil edheotandoil (hahktin, cink, berillii, uran, hlor, titan, magnii, antimonii, arsen, harvad mametallad), avtoiden ühthekeradamižtegimel, kaivuzmašiništon tegimel, gidroelektrostancijoil.

Geografijan andmused

Lidn sijadase agjan lodehes, Irtiš-jogen (kaz.: Ертіс) randal, 283 m ü.m.t. keskmäižel korktusel. Matkad Astanhasai om 800 km päivlaskmha orhal vai 1000 km avtotedme. Lähembaine järed lidn om Semei 200 km päivlaskmha Irtišadme mödvedhe.

Klimat om terav kontinentaline. Voden keskmäine lämuz om +3,4 C°, kezakun-elokun +18,4..+20,4 C°, tal'vkun-uhokun −12,1..−15,0 C°. Ekstremumad oma −47,2 C° (viluku) i +42,8 C° (eloku). Kezaaigan minimum om −1,3 C° (kezaku), tal'vaigan maksimum om +11,9 C° (tal'vku). Ei voi panda halad heinkus vaiše. Paneb sadegid 416 mm vodes, niiden lugumär voib vajehtadas lujas vozidme. Paneb enamba sadegid semendkus (43 mm), heinkus (50 mm) i redukus-tal'vkus (40..45 mm kus), vähemba vilukus-keväz'kus (22..26 mm kus) i sügüz'kus (25 mm).

Eläjad

Vl 2009 lidnümbrikon eläjiden lugu oli 303 720 ristitud, i 342 090 ristitud vl 2018. Kaikiš suremb lidnümbrikon ristitišt oli 332 900 vl 1991 i om nügüd'.

Rahvahad (vn 2014 Kazahstanan etnografine kogoduz, enamba 0,4 %): venänikad — 53,6 %, kazahlaižed — 43,0 %, saksalaižed — 0,8 %, totarlaižed — 0,8 %, ukrainalaižed — 0,6 %, toižed rahvahad — 1,2 %.

Kaik 44 päivkodid i 48 školad (sidä kesken kaks' privatišt) ratas lidnas (vn 2017 olend). Znamasižed üläopendusen aluzkundad oma Päivnouzmkazahstanan tehnine universitet D. Serikbaevan nimed^[1] (alusenpanend 1958 kut tesauvondan institut, reorganizuihe universitetaks vl 1996, viž fakul'tetad, kaks' školad, IT-kolledž) i Päivnouzmkazahstanan universitet S. Amanžolovan nimed^[2] (alusenpanend 1952 kut pedinstitut, 12 tuh. üläopenikoid videl fakul'tetal vl 2004).

Transport

Avtobusad, tramvaid i taksid oma kundaližeks transportaks lidnas. Kaks' avtobusstancijad ratas: vanh reisidenke agjadme, Venäman Päivlaskmaižen Sibirin lidnoihe i Urumčihe (Kitai), i uz' vaiše agjan reisiden täht. Kaik nell' raudtestancijad oma: Ust'-Kamenogorsk, Oskemen-1, Koršunovo, Novo-Ust'-Kamenogorsk.

Rahvahidenkeskeine civiline Ust'-Kamenogorsk-lendimport^[3] (kaz.: Өскемен Халықаралық әуежайы / Öskemen halyqaralyq äuejaiy, UKK / UASK / УГК, 393 tuh. passažiroid vl 2018) sijadase üks'toštkümnes kilometras lodeheze lidnan keskuzpalaspäi. Tehtas reisid Kazahstanan surihe lidnoihe, Venämaha (Moskv, Novosibirsk), Turkanmaha (Antal'j).

Homaičendad

↑ Päivnouzmkazahstanan tehnižen universitetan sait (ektu.edu.kz). (kazah.) (ven.) (angl.) (kit.) (saks.)
↑ Päivnouzmkazahstanan universitetan sait (vku.edu.kz). (kazah.) (ven.) (angl.)
↑ Rahvahidenkeskeižen Ust'-Kamenogorsk-lendimportan sait (airport-uk.kz). (kazah.) (ven.)

Irdkosketused

Lidnan akimatan lehtpoled oficialižel gov.kz-saital. (kazah.) (ven.) (angl.)

Ust'-Kamenogorsk Vikiaitas

[1] Päivnouzmkazahstanan tehnižen universitetan sait (ektu.edu.kz). (kazah.) (ven.) (angl.) (kit.) (saks.)

[2] Päivnouzmkazahstanan universitetan sait (vku.edu.kz). (kazah.) (ven.) (angl.)

[3] Rahvahidenkeskeižen Ust'-Kamenogorsk-lendimportan sait (airport-uk.kz). (kazah.) (ven.)

[1]

[2]

[3]