Vantaa

Vantaa (veps. i suom.)
Vanda (roč.)

Lidnanznam	Flag
Valdkund	Suomenma
Eläjiden lugu (2025)	253,314 ristitud
Pind	240,34 km²
Pämez'	Pekka Timonen (sügüz'ku 2023—)
Telefonkod	+358-(0)9
Aigvö	tal'vel UTC+2, kezal UTC+3

Lidnan kart (2008)

Vantaa (mugažo suomen kelel [ˈʋɑntɑː]; ročin kelel: Vanda [ˈvɑnːdɑ]) om Suomenman lidn valdkundan suves, Udenman provincijas. Se om valdkundan nellänz' lidn eläjiden lugun mödhe, röunatab Hel'sinkinke i mülüb sen aglomeracijha.

Istorii

Eländpunkt mainitase ezmäižen kerdan vl 1351 Hel'singe-nimenke (roč. Helsingå). Municipalitetan uz' Vantaa-nimi sündui jogen mödhe vl 1972, se sai lidnan statusad vl 1974 Hel'sinkin rajoniden uden formiruindan rezul'tataks.

Hel'sinki-Vantaa-lendimport om saudud vn 1952 Olimpižiden vändoiden avaidusele. Lendimport da Finnair-kompanijan päfater sijadasoiš Vantaas. Fazer- (söndtavarad) i Onninen- (kommunaližen mašiništon satandad) kompanijoiden päfaterad oma saudud lidnas, Tikkurila-kompanijan päfater i sen Suomenman tegimed. Lidn šingotase mugažo lämuzelektrostancijal i Valio-kompanijan tegimel.

Geografijan andmused

Hel'sinkin aglomeracijan municipalitetad vl 2011

Lidn sijadase agjan keskuzpalas, Vantaanjogen randoil (suom.: Vantaanjoki, roč.: Vanda å 101 km pitte, lankteb Suomen lahthe Hel'sinkiš), pohjoižhe da pohjoižpäivnouzmha Hel'sinkišpäi, om sen kaimdailidnaks.

Matkad Hel'sinkin keskuzpalhasai om ühesatoštkümne kilometrad suvhe. Röunatab Hel'sinkinke suves i Espoo-lidnanke suvipäivlaskmas. Kaikiš vanhemban raudtestancijan pert' Suomenmas sijadase necen lidnan territorijal, om saudud vl 1861.

Lidnan kogonaine pind om 240,34 km², sidä kesken kuivma 238,39 km², vezi otab 1,95 nellikkilometrad.

Tobmuz

Lidnan rajonad vl 2009

Vantaa jagase seičemeks rajonaks, ned alajagasoiš 98 kundaks. Lidnan suim kogoneb 67 ezitajaspäi.

Lidnan tobmuden pämehen radnikusen nimi om suom.: Vantaan kaupunginjohtaja, roč.: Vanda stadsdirektör. Edeližed lidnan pämehed oma Ritva Vil'janen (Ritva Viljanen, keväz'ku 2018 — eloku 2023), Kari Nenonen (viluku 2012 — keväz'ku 2018).

Eläjad

Lidnan ristitišt ületi 100 tuhad eläjid 1970-nzil vozil i oli 129,918 eläjad vl 1980. Vl 2010 lidnan eläjiden lugu oli 200,029 ristitud. Kaik 224,397 eläjad oli lidnas vl 2018. Kaikiš suremb lidnan ristitišt om nügüd', aglomeracijan kudendez.

Mamankel' (2016): suomen kel' — 80,8 %, ročin kel' — 2,6 %, toižed keled — 16,6 %.

Mamankel' (2024): suomen kel' — 69,1 %, ročin kel' — 2,1 %, toižed keled — 28,7 %.

Irdkosketused

• Lidnan ohjastusen sait (vantaa.fi). (suom.) (roč.) (angl.)