Veihai

Veihai
威海市
Valdkund	Kitai
Eläjiden lugu (2020)	2,906,548 ristitud
Pind	5,956 km²
Telefonkod	+86−631
Aigvö	UTC+8

Veihai (kit.: 威海市, pin'jin': Wēihăi Shì, sijaline virkand: [ʋeɪ̯˥˩ hɛ̆꜌]) om lidn, lidnümbrik da meriport Kitain päivnouzmas, mülüb Šan'dun-agjaha.

Istorii

Vll 1890−1930 Veihaivei-territorii (kit.: 威海卫) oli Suren Britanijan kortomas i nimitihe lidnad Port Edvard:aks (angl.: Port Edward). Om Kitain lidnan oficialiženke statusanke vspäi 1951. Lidnümbrik om olmas vspäi 1987.

Veihai šingotase industrijan koumel zonal (oma zavottüd vll 1991, 1992 i 2000), kalanümbriradmižel i turizmal, maižandusel (pähkmed, fruktad).

Geografijan andmused

Lidn sijadase agjan pohjoižpäivnouzmas, Šan'dunan pol'sarel, Pakuižen meren randal, 0..418 m korktusil, 44 m ü.m.t. keskmäižel korktusel. Röunatab Jan'tainke päivlaskmas.

Klimat om ven ümbärdajan meren valatoitandanke, päivoikaz, kovad tulleid oma paksud. Keväz'ku-kezaku oma päivoikahad lujas, tal'vaig om pil'vekaz. Voden keskmäine lämuz om +13,1 C°, heinkun-elokun +24,9..+25,3 C°, tal'vkun-uhokun −0,5..+2,2 C°. Ekstremumad oma −13,2 C° (uhoku) i +38,4 C° (kezaku). Kezaaigan minimum om +10,7 C° (kezaku), tal'vaigan maksimum om +19,8 C° (uhoku). Ei voi panda halad semendkus-redukus (redukun minimum om +0,8 C°). Paneb sadegid 695 mm vodes, enamba heinkus-elokus (161..166 mm kus), vähemba vilukus-keväz'kus (14..18 mm kus). Paneb lunt tal'ven 34 päiväs. Kun keskmäine relätivine nepsuz vajehtase 53..61 % röunoiš redukus-semendkus, 80 % heinkus-elokus, 69..70 % kezakus i sügüz'kus.

Tobmuz

Veihain lidnümbrik jagase kahteks lidnrajonaks (环翠 Huan'cui i 文登 Ven'den) da kahteks lidnmakundaks. Ned alajagasoiš 66 ühtnikaks: 52 žilod i 14 irdkomitetad.

Eläjad

Vn 2010 Kitain rahvahanlugemižen mödhe lidnümbrikon eläjiden lugu oli 2,804,771 ristitud, sidä kesken kahten lidnrajonan — 1,5 mln ristituid, vn 2020 lidnümbrikon — 2,906,548 ristitud, heišpäi 1,728,259 eläjad oli lidnrajonoiš 2606 nellikkilometrad pindal.

Viden universitetan kampusad (Šan'dun-agj, Harbin, Pekin) oma avaitud lidnümbrikos.

Galerei

Lidnümbrikon tobmuden sauvuz (sulaku 2011)
Daosizman pühäpertiden Sängutin-kompleks-muzei («Jumalnaižen pühäpert'», vai Taoguan'), nägu vn 2011 sulakus
Šan'dunan universitetan kampus Veihaiš (2010. voz' vai sen aigemba)
Veihai-päraudtestancijan sauvuz, reduku 2020

Irdkosketused

Lidnan tobmuden sait (weihai.gov.cn). (kit.) (angl.) (jap.) (kor.)

Veihai Vikiaitas