Veinan'

Veinan'
渭南
Valdkund	Kitai
Eläjiden lugu (2020)	4,688,744 ristitud
Pind	13,030,56 km²
Telefonkod	+86-(0)913
Aigvö	UTC+8

Veinan' (kit.: 渭南, pin'jin': Wèinán «Vei-jogespäi suvipolehe») om Kitain lidn da lidnümbrik valdkundan keskuzpalas. Mülüb Šen'si-agjaha, sen kahtenz' lidn eläjiden lugun mödhe.

Istorii

Eländpunktan aluz om pandud vl 668 EME. Vn 1556 vilukus manrehkaiduz 7,9..8 magnitudanke tegihe, ristitišton koume videndest pölištui, lidn oli muretud läz kogonaz i sen reljef vajehtui. Ezmäine raudtestancii radaškanzi vl 1934. Nügüdläine lidnümbrik om sätud vn 1995 sulakus, siš-žo vodespäi istorine lidn nimitase Linvei-rajonaks (临渭区).

Veinan'-ümbrik šingotase sömtegimištol, päiväiženergetikal i logistikal, mugažo maižandusel (maplodud, jablokad, grušad, granatad). Vl 2011 lidnümbrikon kogosüdäiprodukt oli CNY 1119 mlrd (US$177,6 mlrd).

Geografijan andmused

Nügüd'aigan lidnan tobj pala sijadase Vei-jogen pohjoižel randal (Huanhen oiged ližajogi).

Matkad lidnaspäi agjan Sian'-pälidnan keskuzpalhasai om kuz'kümne kilometrad päivlaskmha, röunatab sen lidnümbrikonke suvipäivlaskmas. Huanhe om lidnümbrikon päivnouzmaižeks röunaks.

Tobmuz

Lidnümbrik kogoneb üks'toštkümnes ühtnikaspäi: kaks' lidnrajonad (Linvei i Huačžou), kaks' lidnmakundad, seičeme külämakundad. Kaik om 215 volostid Veinanin lidnümbrikos, ned alajagasoiš 3218 komitetaks.

Eläjad

Vn 2010 Kitain rahvahanlugemižen mödhe lidnümbrikon kaikenaigaižiden eläjiden lugu oli 5,286,077 ristitud, se lugu poleni 108,729 eläjaks vodhe 2000 rindataden. Vn 2020 — 4,688,744 ristitud. Kahten lidnrajonan ühthine ristitišt om läz 1,2 mln eläjid 2396 nellikkilometrad pindal (vn 2010 andmused).

Vn 2012 lopun andmusiden mödhe kaik 2859 školad om lidnümbrikos: 1002 päivkodid, 1266 augotižškolad, 310 aluzškolad, 70 profškolad, 75 korktad školad i seičeme specialižen opendusen školad. Kaik koume üläopendusen aluzkundad om Veinaniš: Veinanin normaline universitet, Šan'sin raudten institut, Veinanin professionaliž-tehnine kolledž.

Transport

Avtobusad (20 maršrutad vl 2015) da taksid oma kundaližeks transportaks lidnas. Kaik om nell' raudtestancijad lidnas, ned oma järgeližiden jonusiden täht: Veinan', Veinan'-Pohjoine, -Suvine i -Päivlaskmaine. Veinan' om mülütadud kiruhraudten sistemha, sen kaks' stancijad ratas ezilidnas: Huašan'-Pohjoine i Dali.

Lähembaine lendimport sijadase Sian'-lidnas, Veinan' ühtenzoitase senke kaikenaigaižel avtobusmaršrutal. Sijaline lendimport om sauvomas Huačžou-rajonas, se linneb turizman täht tobjimalaz (Hua-mägi).

Irdkosketused

Lidnümbrikon oficialine sait (weinan.gov.cn). (kit.)

Veinan' Vikiaitas