Zelenodol'sk

Zelenodol'sk
Зеленодольск (ven.)
Яшел Үзән / Yäşel Üzän (tot.)

Lidnanznam	Flag
Valdkund	Venäma
Eläjiden lugu (2024)	98,888 ristitud
Pind	37,73 km²
Pämez'	Mihail Afanas'jev (sügüz'ku 2019—)
Telefonkod	+7−84 371-xx-xxx
Avtokod	16, 116, 716
Aigvö	UTC+3 (MSK+0)

Zelenodol'sk (tot.: Яше́л Үзә́н / Yäşel Üzän, ven.: Зеленодо́льск) om Venäman lidn Tatarstanan Tazovaldkundan lodehes. Se om Zelenodol'skan rajonan administrativine keskuz vspäi 1958, tazovaldkundan videnz' surtte lidn eläjiden lugun mödhe, mülüb Kazanin aglomeracijha (1,6 mln rist.).

Istorii

Nügüd'aigaižen eländpunktan aluz om pandud vl 1802 kuti Gari-külä i vl 1865 Kabačišči-žilo. Vl 1892 ühtištadihe niid Vihand Alangišt-külähä (ven.: Зелёный Дол), jäl'ghižel vodel raudte tuli sihe. Vl 1913 ühtištadihe sidä Paratskii Zaton-žilonke. Vspäi 1928 Vihand Alangišt kändihe radnikžiloks, vl 1932 se sai lidnan statusad nügüdläiženke nimenke.

Zelenodol'skan ižandusen päsarakod oma elektrotehnikan pästand (vilugoitimed, medtehnik, keitandmašiništ), laivansauvomine, mašinansauvomine, sauvondmaterialiden pästand (kaks' fanertegint), sömtegimišt (maidkombinat, leibänkombinat, lihakombinat).

Geografijan andmused

Lidnan sijaduz rajonas i tazovaldkundas (2010)

Lidn sijadase pidust' Volg-jogen hurad randad (Kuibiševan vezivaradim), Svijag-jogensud vaste (tot.: Зөя).

Matkad Kazanihesai om 38 km päivnouzmha orhal, raudtel vai Volg-jogedme. Lähembaine lidn om Volžsk (Marii El) päivlaskmha sil-žo randal, kaks'kilometrine keskust om lidnoiden keskes.

Tobmuz

Zelenodol'sk om lidnankundan üks'jäižeks eländpunktaks.

Edeline lidnan i rajonan pämez' om Aleksandr Tigin (sügüz'ku 2013 — sügüz'ku 2019).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 97 674 ristitud, vn 2021 — 99 137 ristitud. Kaik 99 235 eläjad oli lidnas vl 2017. Kaikiš suremb lidnan ristitišt oli 102 tuhad eläjid vozil 1995, 1996 i 1998 i 100 039 eläjad vl 2020.

Rahvahad (enamba 0,9 % vl 2010, ozutadud rahvahudenke): venälaižed — 61,6 %, totarlaižed — 35,4 %, čuvašalaižed — 0,9 %, toižed rahvahad — 2,1 %.

Religijan aluzkundad lidnas: islaman medrese da koume pühäpertid, ortodoksižen hristanuskondan kahesa pühäpertid (kuz' jumalanpertid i kaks' časounäd), toižen hristanuskondan koume pühäpertid.

Lapsiden opendusen aluzkundad oma päivkodid, progimnazii, kuz' keskškolad (nomer 4, 7, 11, 15, 16, 17), nell' liceid (nomer 1, 9, 14, 18), koume gimnazijad (nomer 3, 5, 10), kaks' korrekcišt školad, lapsiden sädamižen pert', čomamahtoiden škol, muzikškol, čomamahtoine škol. Mehanikan kolledž i laivansauvomižen kolledž (Kazanin tehuniversitetan filial) anttas professionališt opendust lidnas. Lähembaižed üläopendusen aluzkundad ratas Kazaniš.

Transport

Avtobusad i taksid oma kundaližeks transportaks lidnas.

Vihand Alangišt-stancii (ven.: Зелёный Дол, tot.: Яшел Үзән, radab vspäi 1894) om järedaks raudtesol'meks, siš raudted ühthejokstas Kazanišpäi, Moskvaspäi, Joškar-Olaspäi da Ul'janovskaspäi. Raudtesild i avtotesild oma saudud Volgas päliči lidnas da sen ümbrištos.

Galerei

• 
  Vägestusen puišt (2017)
• 
  «Tiničlik»-mečet', vn 2016 nägu
• 
  Ph. Ondrijan Ezikuctud jumalanpert', vn 2016 nägu
• 
  Fanerantegim vl 2016
• 
  «Rodina»-kul'turkeskuz (2020, Kodima)
• 
  Romanovskii-raudtesild, nägu vl 2014 (om saudud vll 1911−1913, kahtenz' jono vll 1950−1957)
• 
  Vihand Alangišt-päraudtestancii ümbrištonke vl 2016

Irdkosketused

• Lidnan i Zelenodol'skan rajonan oficialine sait (zelenodolsk.tatarstan.ru) Tatarstanan Tazovaldkundan tobmuden municipaližiden aluzkundoiden portalal. (tot.) (ven.)