Kaži
Kaži vai Kodikaži (latinan kelel: Félis silvéstris cátus, venäkelel: Домашняя кошка) om kodiživat, popularižemb (koirha rindataden) «živat-kompan'jon». Kodikaži om kažinvuiččiden (vai kažiden) sugukundan (Felidae) lihansöi (Carnivora) imetaiživat. Nügüd’aigaižen biologižen sistematikan mel'pidegen mödhe kodikaži (Felis silvestris catus) om meckažin (Felis silvestris) alaerik. Kaži mecadab üksnäze. Se mecadab nühtajid da toižid penid živatoid. Kaži om mugažo socialine živat; hän kävutab kommunikacijan täht kulundan signalad, ferramonad da hibjan likundoiden levedan diapazonan. Nügüd’ Mas om 600 mln kodikažid da 200 kodikažin sugud.
[redaktiruida] Irdpoline nägu
Keskmäine kažin hibjan piduz händata om 60 sm, händan piduz om 25—35 sm. Kaikiš järedamban kodikažin piduz Ginnessan rekordoiden knigas om 121,9 sm. Keskmäine tervhen kažin hibjan vedaduz om 2,5 — 6,5 kg, no voib vastata surembid-ki kažid (6 — 9 kg). Meinkunan da sibirin sugiden kažiden vedaduz om 11,5 — 13 kg. Ned voidas sabustada 20 kgd — nece on razvdusen jäl'guz.
