Kataisk

Kataisk
Катайск
	Lidnanznam;
Valdkund	Venäma
Eläjiden lugu (2021)	11,881 ristitud
Pind	24 km²
Pämez'	Sergei Petrovskih; (kül'mku 2022—)
Telefonkod	+7−35 251-xx-xxx
Avtokod	45
Aigvö	UTC+5 (MSK+2)

Kataisk (ven.: Ката́йск) om Venäman lidn da lidnankund Kurganan agjan lodehes. Se om Kataiskan rajonan administrativine keskuz.

Istorii[vajehta | vajehtada tekst]

Eländpunktan aluz om pandud kozakoil vl 1655 kuti Katain lidnuz (ven.: Катайский острог), baškiralaižiden heimoiden karakatajalaižed-ühtištusen (bašk.: Ҡатай) nimen mödhe. Lidnuz kaiči torguindted Tobol'skaspäi Moskvha. Alištui kalaidajiden heimoiden londoile, i vodele 1695 lidnuz oli saudud jo koumanden kerdan. Sid' nimitihe Kataiskai-slabadaks. 19. voz'sadal Kataiskoje-žilo oli villän torguindan järedaks keskuseks. Vll 1911−1913 raudte läbiti žilod. Vn 1944 12. päiväl uhokud žilo sai lidnan statusad Troickoje-žilon, Korablövo-, Odino- i Savino-küliden mülütandanke.

Kataisk šingotase erazvuiččiden pompiden tegimel i maidtegimel.

Geografijan andmused[vajehta | vajehtada tekst]

Lidn sijadase Iset'-jogen hural randal (Tobolan hura ližajogi) Kataik-jogen (ven.: Катайка 22 km pitte) lanktendan sijas, 100 m ü.m.t. keskmäižel korktusel.

Matkad Kurganhasai om 195 km suvipäivnouzmha orhal, 219 km avtol vai raudtedme. Lähembaine lidn om Dalmatovo 25 km päivnouzmha kaikil teil.

Tobmuz[vajehta | vajehtada tekst]

Kataisk om lidnankundan üks'jäižeks eländpunktaks. Lidnankundan pind — 145,5 km².

Edeližed lidnan pämehed (Administracijan pämehed) oma Aleksandr Karnauhov (keväz'ku-reduku 2022), Sabiržan Musalämov (uhoku 2019 — keväz'ku 2022), Valerii Černih (tal'vku 2013 — uhoku 2019). Lidnan Administracii om likvidacijan pordhal vn 2023 semendkuspäi.

Eläjad[vajehta | vajehtada tekst]

Vn 2010 Venäman rahvahanlugemižen mödhe eläjiden lugu oli 14 003 ristitud, rajonan koume videndest, vn 2021 — 11 881 ristitud. Kaik 12 585 eläjad oli lidnas vl 2017. Kaikiš suremb lidnan ristitišt oli 15..16 tuh. eläjid vll 1979−2006 (16 789 rist. vl 1989).

Ortodoksižen hristanuskondan koume jumalanpertid^[1] oma saudud lidnas, niiden kesken Jumalanmaman «Kaikiden gorähižiden ihastuz»-jumalaižen puine pühäpert' om avaitud vl 2010.

Kataiskan professionaliž-pedagogine tehnikum^[2] om lidnan professionaližen opendusen aluzkundaks.