Vičug
Lidnanznam
|
Flag
|
| Valdkund | Venäma |
| Eläjiden lugu (2021) | 30,694 ristitud |
| Pind | 30 km² |
| |
| Pämez' | Pavel Plohov (tal'vku 2021—) |
| Telefonkod | +7−49 354-xx-xxx |
| Avtokod | 37 |
| Aigvö | UTC+3 (MSK+0) |
Vičug (ven.: Ви́чуга) om Venäman lidn da lidnümbrik Ivanovon agjan pohjoižpalas. Se om agjan nellänz'-videnz' lidn eläjiden lugun mödhe, mugažo om Vičugan rajonan administrativižeks keskuseks, ei mülü sihe.
Istorii[vajehta | vajehtada tekst]
Eländpunktan aluz om pandud VCIK:an käskön mödhe vn 1925 6. päiväl kezakud koumekümnen eländpunktan da territorijan ühtištusel: kaks'kümne radnikžilod, viž küläd, viž tegimištonzonad. Nimitihe lidnad kaikiš suremban Vičug-žilon (mainitihe vspäi 1482) i Uz' Vičug-raudtestancijan mödhe (nüg. muite Vičug), toine sur' žilo oli Bonäčki (ven.: Бонячки).
Ezmäižed tekstilin manufakturad radaškanziba vl 1812 (P. Konovalovan, sid' fabrik V. Noginan nimed) i 1822 (D. Razorönovan, sid' «Rusked Profintern»). Om kaičenus äi torgovanoiden pertid 19. voz'sadan keskespäi, voziden 1920−1960 rahvahaline puine pertišt. Ezmäižed kommunaližed hüväd (irdoiden pidatuz, keskuzlämbituz i kanalizacii) oma lidnas vspäi 1935.
Vičug šingotase kanghiden koumel fabrikal, mašinansauvomižen tegimel (metalližkonstrukcijad pertiden sauvondan täht — palad betoniruimha, libutimiden detalid, murdoidenveimed, počtkonor'ad, lämoipalonvastaižed konor'ad i uksed, ventiliruidud ocseinäd) i leibän edheotandal.
Geografijan andmused[vajehta | vajehtada tekst]
Lidn sijadase 135 m ü.m.t. keskmäižel korktusel, om ümbärtud mecoil.
Matkad Ivanovohosai om 63 km suvipäivlaskmha orhal, 73 km avtotel vai raudtel. Lähembaižed lidnad oma Kinešm 28 km pohjoižpäivnouzmha orhal, 32 km avtotedme vai raudtedme, i Rodniki 17 km suvipäivlaskmha orhal vai 21 km avtotedme. Vičug-raudtestancii radab lidnan pohjoižes vspäi 1871 «Ivanovo — Kinešm»-keskustal. «Kinešm — Kovrov»-avtote ümbärdab lidnad päivlaskmaspäi.
Tobmuz[vajehta | vajehtada tekst]
Vičug om lidnümbrikon üks'jäižeks eländpunktaks.
Lidnümbrikon tobmuden pämez' om sen Administracijan pämez'. Edeline lidnümbrikon pämez' om Mihail Baranov (heinku 2018 — reduku 2021). Lidnan Duman ezimez' om Jelena Morokina vn 2015 redukuspäi. Edeline Duman ezimez' om Nikolai Pastuhov, radoi vn 2015 redukuhusai.
Eläjad[vajehta | vajehtada tekst]
Vl 1939 lidnan ristitišt oli 46 931 eläjad. Vn 2010 Venäman rahvahanlugemižen mödhe lidnan eläjiden lugu oli 37 583 ristitud, vn 2021 — 30 694 ristitud. Kaik 34 868 eläjad oli lidnas vl 2017. Kaikiš suremb lidnan ristitišt oli 51..53 tuhad eläjid vozil 1959−1986 (53 tuh. ristitud vll 1962−1967).
Rahvahad (2010): venälaižed — 97,1 %, toižed rahvahad — 2,9 %.
Ortodoksižen hristanuskondan kuz' pühäpertid[1] oma kaičenus i saudud lidnas: koume jumalanpertid i koume časounäd.
Lapsiden opendusen aluzkundad oma 13 päivkodid, kaks' aluzškolad (nomerad 6, 9), viž keskškolad (nomerad 10..13, 17), lapsiden sädamižen keskuz, sportškol. Vičugan äiprofil'ne kolledž[2] om lidnan professionaližen opendusen aluzkundaks.
Galerei[vajehta | vajehtada tekst]
-
Lidnan muzei vl 2007 -
Sündun Eläbzdusen jumalanpert' Tezinas (Rusked), vn 2018 nägu (om saudud vll 1908−1911) -
«Narpit»-sömfabrik vl 2014 -
Kul'turkeskuz (2008) -
Lidnümbrikon läžundkodin päkorpus (2017)
Homaičendad[vajehta | vajehtada tekst]
- ↑ Vičugan pühäpertid sobory.ru-saital. (ven.)
- ↑ Vičugan äiprofil'žen kolledžan sait (ogbpouvmk.ru). (ven.)
Irdkosketused[vajehta | vajehtada tekst]
 |
Vičug Vikiaitas |
| Ivanovon agjan lidnad | ||
| Furmanov | Gavrilov Posad | Ivanovo | Jurjevec | Juž | Kinešm | Kohm | Komsomol'sk | Navoloki | Plös | Privolžsk | Pučež | Rodniki | Šui | Zavolžsk | Teikovo | Vičug | ||