Šui (lidn)

Šui
Шуя
Lidnanznam;	Flag;
Valdkund	Venäma
Eläjiden lugu (2021)	56,041 ristitud
Pind	33,29 km²
Pämez'	Natal'ja Korägina; (kül'mku 2018—)
Telefonkod	+7−49 351-xx-xxx
Avtokod	37
Aigvö	UTC+3 (MSK+0)

Šui (ven.: Шу́я) om Venäman lidn da lidnümbrik Ivanovon agjan keskuzpalan suves. Se om agjan koumanz' lidn eläjiden lugun mödhe, om Šujan rajonan administrativižeks keskuseks mugažo (ei mülü sihe).

Istorii[vajehta | vajehtada tekst]

Borisoglebskai-slabad (ven.: Борисоглебская слобода) oli olmas edel lidnad 14. voz'sadan keskespäi, nimitihe jumalanpertin pühämehiden mödhe. Eländpunkt mainitase ezmäižen kerdan Nikonan aigkirjas vl 1539 kuti muretud kazanižel Safa-Girei-hanal Šui-lidn. Nimituz libub Tez-laivjogen huras sijadusespäi Kläz'man joksendha kacten (ven.: ошую «huralpäi»). Šuiskijad-ruhtinased valdoičiba lidnal kaks' voz'sadad, hö mainitasoiš vspäi 1403. Lidn oli jarmankoiden i pölvhankanghiden tehmižen keskuz.

Šui šingotase «Akvarius»-kompanijan kompjuteroiden tehmižel, tekstil'mašinoiden tegimel, sitcan fabrikal i omblendedheotandoil, tal'jankoiden i lapsenmeblin tegimel, sauvondmaterialiden pästandal (puižed apakod), alkogoližiden jomiden tegimel, mugažo kombisötken tegim radab lidnas.

Geografijan andmused[vajehta | vajehtada tekst]

Lidn sijadase Tez-jogen molembil randoil (ven.: Теза 192 km pitte, Kläz'man hura ližajogi), 100 m ü.m.t. keskmäižel korktusel. Toižed joged oma langenii Tezha Seh (ven. Сеха) i sen Motovilih-ližajogi (ven. Мотовилиха). Matkad Ivanovon röunhasai om 20 km lodeheze orhal, 22 km avtotel vai raudtel, keskushesai — 29 km lodeheze orhal vai 31 km avtotel. Toine lähembaine lidn om Kohm 15 km päivlaskmha-lodeheze orhal, 17 km avtotedme vai raudtedme. Šui-raudtestancii radab lidnan päivlaskmas «Ivanovo — Vladimir»-keskustal. «Ivanovo — Alauz'lidn»-avtotekeskust ümbärdab lidnad suvespäi.

Šui om lidnümbrikon üks'jäine eländpunkt.

Eläjad[vajehta | vajehtada tekst]

Vl 1939 lidnan ristitišt oli 57 910 eläjad. Vn 2010 Venäman rahvahanlugemižen mödhe lidnan eläjiden lugu oli 58 486 ristitud. Kaikiš suremb ristitišt oli 70..72 tuhad eläjid vll 1973−1987.

Rahvahad (2010): venälaižed — 97,1%, toižed rahvahad — 2,9%.

Ortodoksižen hristanuskondan Sündun Eläbzdusen kafedraline päjumalanpert', Mikulai-čudonsädajan päjumalanpert', 15 jumalanpertid^[1], časoun' i Kaikiden Pühämehiden naižjumalankodi oma olmas lidnas.

Professionaližen opendusen aluzkundad oma Šujan tehnologine kolledž^[2], Šujan äiprofil'ne kolledž^[3], Ivanovon profopendusen koume filialad.

Galerei[vajehta | vajehtada tekst]

Lidnümbrikon tobmuden sauvuz (2015, ende Kalužskijad-torgovanoiden pert')
Sündun Eläbzdusen kafedraline päjumalanpert', vn 2021 nägu
Torguindkeskuz i sömfabrikan sauvuz vl 2020
Konstantin Bal'montan literaturan i kodirandan tedištandmuzei (2015, edel Oktäbrin revolücijad lidnan tobmuden pert')
Šui-päraudtestancii vl 2021

Homaičendad[vajehta | vajehtada tekst]

↑ Šujan pühäpertid sobory.ru-saital. (ven.)
↑ Šujan tehnologižen kolledžan sait (prof4.ru). (ven.)
↑ Šujan äiprofil'žen kolledžan sait (prof42.ru). (ven.)

Irdkosketused[vajehta | vajehtada tekst]

Lidnümbrikon tobmuden aluzkundoiden sait (okrugshuya.ru). (ven.)

Šui (lidn) Vikiaitas

	Ivanovon agjan lidnad
	Furmanov \| Gavrilov Posad \| Ivanovo \| Jurjevec \| Juž \| Kinešm \| Kohm \| Komsomol'sk \| Navoloki \| Plös \| Privolžsk \| Pučež \| Rodniki \| Šui \| Zavolžsk \| Teikovo \| Vičug

[1] Šujan pühäpertid sobory.ru-saital. (ven.)

[2] Šujan tehnologižen kolledžan sait (prof4.ru). (ven.)

[3] Šujan äiprofil'žen kolledžan sait (prof42.ru). (ven.)

[1]

[2]

[3]