Anap

Vikipedii-späi
Anap
Анапа
 Lidnanznam
 Flag
Valdkund Venäma
Eläjiden lugu (2022) 95,873 ristitud
Pind 58,98 km²
Anap Анапа
Pämez' Vasilii Švec
(reduku 2020—)
Telefonkod +7−86 133-xx-xxx
Avtokod 23, 93, 123
Aigvö UTC+3 (MSK+0)


Anap (ven.: Ана́па) om Venäman lidn-kurort da meriport Krasnodaran randan päivlaskmas, sodahoštusen lidn. Se om randan kahesanz' lidn eläjiden lugun mödhe, Anapan lidnümbrikon administrativine keskuz, mülüb sihe.

Istorii[vajehta | vajehtada tekst]

14. voz'sadal oli tetab kuti Genujan Tazovaldkundan Mapa-kolonii. Ottomanan imperii pani nügüdläižen eländpunktan alust — sauvoi lidnust vll 1781−1782. Kozakad anastiba sidä severz'-se kerdoid sodoiden aigan. Anap kändi Venäman imperijan palaks vl 1829. Om lidnan statusanke vspäi 1846.

Toižen mail'man sodan aigan kurort oli pandud mantazole, udessundutihe 1950-nzil vozil. Raudte tuli lidnha Anap-raudtestancijaks vl 1979.

Anap šingotase lebuturizmal (severz'-se millionoid ristituid vodes, merikül'bendrandan kümenikad kilometrid, sanatorijad, tematižed küläd da puištod), sömtegimištol (leibtegim, kaks' vintegint, lihakombinat, maidtegim, oludentegim), sauvondal da torguindal, sauvondmaterialiden i plastmassan pästandal. Lidn om ümbärtud vinmarjan kazvatandan rajonal.

Geografijan andmused[vajehta | vajehtada tekst]

Lidn-lebutaho sijadase Mustmeren pohjoižpäivnouzmaizel randal, 11 m valdmeren pindan päl keskmäižel korktusel, Kavkazan ezimägištonno. Matkad Krasnodarhasai om 130 km päivnouzmha orhal vai 165 km avtotedme. Lähembaižed lidnad oma Novorossiisk 40 km päivnouzmha orhal vai 52 km avtotedme i Temrük 43 km pohjoižhe orhal, 55 km avtotedme vai raudtedme.

Klimat om Keskmeren kuivahk, tal'vel voib toda pakaižid pohjoižespäi. Elokun lämuz +25,4 C°, vilukun +3,3 C°, voden keskmäine lämuz +13,6 C°. Ekstremumad oma −23,9 C° i +38,2 C°. Paneb sadegid 560 mm vodes, enamba kaiked kül'mkus-vilukus (52..68 mm kus). Meriveden keskmäine lämuz +20..+24 C° kezakus-sügüz'kus, tal'vaigan +7..+9 C°.

Kaik 51 eländpunkt mülüb lidnümbrikho Anapan ližaks, ühtenzoittas kahesaks küläümbrikoks. Lidnümbrikon pind — 981,86 km², om korktusid 439 metrhasai ü.m.t..

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 58 990 ristitud, lidnümbrikon — 70 280 (Anapata). Kaikiš suremb lidnan i lidnümbrikon ristitišt om nügüd'. Vl 2018 kaik 75 865 ristitud elihe lidnas i 185 888 ristitud kaikes lidnümbrikos. Vl 2022 kaik 213 617 ristitud oma lidnümbrikon kaikenaigaižikš eläjikš.

Rahvahad (lidnan eläjad, enamba 1% vl 2010): venälaižed — 86,0%, armenijalaižed — 6,6%, ukrainalaižed — 2,2%, toižed rahvahad — 4,4%, rahvahuden ozutandata — 0,8%.

Ortodoksižen hristanuskondan 14 pühäpertid[1] oma saudud lidnas: seičeme jumalanpertid i seičeme časounäd.

Lidnan professionaližen opendusen aluzkundad oma Anapan holitišiden sferan kolledž[2], maižandusen[3] i privatine industrialine[4] tehnikumad, toižiden lidnoiden kolledžiden viž filialad, Venäman FSB:n mererandan kaičendvägiden institut i üläopendusen aluzkundoiden filialad (Krasnodar, Soči, Moskv).

Edeline lidnümbrikon pämez' om Jurii Poläkov (reduku 2017 — heinku 2020).

Galerei[vajehta | vajehtada tekst]

Sebruzlidnad[vajehta | vajehtada tekst]

Homaičendad[vajehta | vajehtada tekst]

  1. Anapan pühäpertid sobory.ru-saital. (ven.)
  2. Anapan holitišiden sferan kolledžan sait (anapa-college.info). (ven.)
  3. Anapan maižanduztehnikuman sait (ast-anapa.ru). (ven.)
  4. Anapan industrialižen tehnikuman sait (aitanapa.ru). (ven.)

Irdkosketused[vajehta | vajehtada tekst]



Krasnodaran randan lidnad
Abinsk | Anap | Apšeronsk | Armavir | Belorečensk | Gelendžik | Gul'keviči | Hadižensk | Hul Purde | Jeisk | Korenovsk | Krasnodar | Krimsk | Kropotkin | Kurganinsk | Labinsk | Novokubansk | Novorossiisk | Primorsko-Ahtarsk | Slavänsk Kubanil | Soči | Temrük | Tihoreck | Timašovsk | Tuapse | Ust'-Labinsk