Freid Anna

Vikipedii
Hüpähtada: navigacii, Ecind
Anna Freid tatanke

Anna Freid (germ. Anna Freud; 3. tal'vku 1885, Ven, Avstrii9. reduku 1982, London, Sur' Britanii) — Avstrijan augotižlibundan britanijalaine psiholog i psihoanalitik, Zigmundan Freidan noremb tütär.[1][2] Ühtmudel Melani Kläinanke lugedas lapsiden psihoanalizan alusenpanijan.[3]

Biografii[redaktiruida | redigeeri lähteteksti]

Anna oli noremban i kudenden lapsen Zigmundan Freidan i hänen akan Martan kanzas. Hän valiči augotižškolan opendajan professijan ičeze päazjaks. Jäl'ges Ezmäišt mail'man voinad Anna jäti openduzradon i pühäti ičtaze tatale, rates hänen sekratarin da holitajan, i psihoanalizale. Pigai hän tuli Venan psihoanalitikoiden sebraha i ezini sigä ezmäiziden edespaginoidenke. Vodel 1938, Avstijan anšlüsan jäl'ghe, Freidoiden kanz oli ottud arestal alle, i Anna tatanke pigai taci Venan kerdhaks i tuli elämaha Londonha. Sures Britanijas hän jatkui tedoita psihoanalizad i šingotada ičeze tatan idejad, eriližešti laps'aigan psihologijan sferas. Vl 1947 Anna Feid pani Hemstedan klinikan Londonas alusen, kudamb oli kaikiš susemban lapsiden psijoanalitižen tervehtand- i openduzkeskusen sen aigan. Vl 1952 hän avaiži Londonas lapsiden terapevtkursad i klinikan, kudambad oliba ezmäižen aluskundan lapsiden tervehtandan psihoanalizan metodal täht. Jäl'gmäižil elon vozil tedomez' radoi Jelin universitetas i jatkui šingotada ičeze idejad lapsiden psihologijan sferas. Anna koli Londonas 1982 voden redukun 9. päiväl. Hän iče nikonz ei olend mehel i hänel ei olend ičeze lapsid.

Tedonägendad[redaktiruida | redigeeri lähteteksti]

Lindes ičeze tatan tedonägendoiden jäl'gnikan, Anna Freid šingoti ezikät psihoanaližid el'gendusid Minä:n polhe, i faktižešti pani uden neofreidistižen čuradusen psihologijas — ego-psihilogijan — alusen.[4] Hänen tedoližeks päedessatuseks tobjimalaz lugedas ristitun kaičijoiden mehanizmoiden teorijan tedoidust — mehanizmoiden[5], kudambiden abul Minä laptastab Se:n valatoitust. Mugažo Anna lujas edeni agressijan openduses, no üks'-se kaikiš suremban tondan psihologijaha oli lapsiden psihologijan (nece nänen edessatuz om ühthine Melani Kläinanke) i lapsiden psihoanalizan sädand.[6] Hän tedoiži metodad, kut rata lapsidenke, sidä kesken Anna tedoiži udes psihoanalitižen teorijan vändsijadusid kazvatajile i lapsile heiden ičekeskentehmižes abun täht. Lapsed oliba Annan Freidan tedon da elon pämelentartusen, erašti hän eskai sanui: «En meleta, miše olen hüvän objektan biografijan täht. Nacein, kaiked minun elod void ümbrikirjutada ühtel sanundal — minä radoin lapsidenke!». Elon lopus tedomez', kudamb jo oli olnu Avostuzprofessoran äjišden mail'man kaikiš surembiš universitetoiš, tartui melel toižehe agjaha, ühtenzoittud lapsidenke, — kanzoiktuz, hän radoi siš Jelin universitetas i pästi kaks' töd ühtmudel kollegoidenke (kacu "Valitud tedotöd").[7]

Valitud tedotöd[redaktiruida | redigeeri lähteteksti]

  1. Ezisanad psihoanalizale opednajiden täht (Einführung in die Psychoanalyse für Pädagogen, 1926)
  2. Ego i kaičendan mehanizmad (Das Ich und die Abwehrmechanismen, 1936)
  3. Lapsiden psihoanalitine tervehtamine (The Psychoanalytic Treatment of Children, 1946)
  4. Normaline i patologine laps'aigas: šingotesen arvoind (Normality and Pathology in Childhood: Assessment of Development, 1965)
  5. Lapsen pämelentartusiden toižen polen taga (1973), ühtmudel Dž. Gol'šteinanke i A. Solnitanke.
  6. Lapsen pämelentartusiden edes (1979), ühtmudel Dž. Gol'šteinanke i A. Solnitanke.

Homaičendad[redaktiruida | redigeeri lähteteksti]

  1. http://www.krugosvet.ru/enc/gumanitarnye_nauki/psihologiya_i_pedagogika/FRED_ANNA.html
  2. http://www.psy-files.ru/2006/12/11/anna_frejjd.html
  3. Peter Gay, Freud: A Life for Our Times (London 1988) p. 469
  4. O. L. Zangwill, 'Freud, Anna' in Gregory ed., p. 268
  5. Freud, A. (1937). The Ego and the Mechanisms of Defense, London: Hogarth Press and Institute of Psycho-Analysis. (Revised edition: 1966 (US), 1968 (UK))
  6. Fenichel, Neurosis p. 576
  7. http://yalepress.yale.edu/yupbooks/SeriesPage.asp?Series=75

Irdkosketused[redaktiruida | redigeeri lähteteksti]

Nece kirjutuz Vepsän Vikijas: Фрэйд Анна.