Birüč

Birüč
Бирюч

Lidnanznam	Flag
Valdkund	Venäma
Eläjiden lugu (2021)	7,114 ristitud
Pämez'	Aleksei Vistorobskii (kül'mku 2019—, Алексей Висторобский)
Telefonkod	+7−47 247-xx-xxx
Avtokod	31
Aigvö	UTC+3 (MSK+0)

Birüč (ven.: Бирю́ч) om Venäman lidn da lidnankund Belgorodan agjan päivnouzmas. Se om Krasnogvardeiskojen rajonan administrativine keskuz, üks'jäine lidn da kaikiš suremb eländpunkt.

Istorii

Eländpunktan aluz om pandud vl 1705 kozakoiden žiloks vanhan lidnusen sijas. Vozil 1779−1918 Birüč oli makundan lidnan statusanke. Nimi znamoičeb «batog riputadud tilliižidenke», birüčii kucui sil lidnalaižid torgunnoks. Vll 1919−1958 nimitihe Budönnovsk-lidnaks (vai Budönnii), sid' Budönnoje-žiloks. Krasnogvardeiskoje-žilo sai lidnan statusad vl 2007 nügüdläiženke istoriženke nimenke.

Birüč šingotase sömtegimišton edheotandoil — maidtegim, maploduiden konservtegim. Innovacine «Birüč»-keskuz radab lähižes Malobikovo-žilos pohjoižpäivnouzmha lidnaspäi.

Geografijan andmused

Lidn sijadase rajonan keskuzpalas, Tün' Sosn-jogen hural randal (ven.: Тихая Сосна 161 km pitte, Donan oiged ližajogi), 120 m ü.m.t. keskmäižel korktusel.

Matkad Belgorodhasai om 128 km päivlaskmha orhal vai 150 km avtotedme. Lähembaine lidn om Aleksejevk 20 km päivnouzmha. Ühtennimine Birüč-raudtestancii radab 13 km suvhe lidnaspäi «Valuikad — Liski»-keskustal.

Tobmuz

Kaik kaks' pen't žilod mülüdas lidnankundha Birüčun ližaks: Sadki (180 rist. vl 2010) i Nikol'skii (47 rist. vl 2010). Lidnankundan pind — 120,62 km².

Edeline lidnankundan Administracijan pämez' om Väčeslav Kocarev (uhoku 2017 — kül'mku 2019, Вячеслав Коцарев).

Eläjad

Vn 2010 Venäman rahvahanlugemižen mödhe lidnan eläjiden lugu oli 7 846 ristitud, lidnankundan — 8 073 ristitud, rajonan videndez, vn 2021 — 7 114 ristitud. Kaikiš suremb eländpunktan ristitišt oli 14 200 eläjad vl 1913, i Suren sodan jäl'ghe — 8 526 eläjad vl 1989.

Rahvahad (enamba 0,4 % vl 2021): venälaižed — 89,2 %, armenijalaižed — 0,9 %, ukrainalaižed — 0,4 %, toižed rahvahad — 1,3 %, rahvahuden ozutandata — 8,2 %.

Ortodoksižen hristanuskondan koume pühäpertid oma kaičenus lidnas: Pühän Jumalanmaman Katken päjumalanpert' (letihe vll 1832−1838), ph. Mitrofan Voronežalaižen jumalanpert' (om saudud vl 1869) i Jumalanmaman Sündundan jumalanpert' (saudihe vspäi 1867).

Birüčun tehnikum om lidnan professionaližen opendusen aluzkundaks.

Fizkul'turižtervehtai kompleks, ujundbassein i mägisuks'kompleks ratas lidnas.

Galerei

• 
  Pühän Jumalanmaman Katken päjumalanpert' keskuztorgul, vn 2009 nägu
• 
  Eläban Eziauguižen Stroican puine jumalanpert' Zasosn-žilos jogen vastrandal, vn 2009 nägu (om saudud vll 2008−2009)
• 
  Vn 1781 lidnanznam
• 
  Vn 1859 lidnanznam

Irdkosketused

• Lidnankundan tobmuden aluzkundoiden oficialine sait (gbiryuch.biryuch.ru). (ven.)
• Tedod lidnas rajonan kirjišton librari-biruch.ru-saital. (ven.)
• Krasnogvardeiskojen kodirandantedištandmuzejan sait (muzeybiruch.ru). (ven.)