Berlington (Vermont)

Berlington
Burlington
Lidnanznam;	Flag;
Valdkund	Amerikan Ühtenzoittud Valdkundad
Eläjiden lugu (2020)	44,743 ristitud
Pind	40,1 km²
Pämez'	Miro Veinberger; (sulaku 2012—,; Miro Weinberger)
Telefonkod	+1−802
Aigvö	tal'vel UTC−5,; kezal UTC−4

Sil sanal voib olda toižid znamoičendoid; miše nähta niid, tulgat tänna.

Berlington (angl.: Burlington [ˈbɝlɪŋtən]) om AÜV:oiden lidn Vermont-štatan lodehes. Se om štatan kaikiš suremb lidn eläjiden lugun mödhe (i kaikiš penemb mugoine AÜV:oiš), Čittenden-ümbrikon keskuz.

Istorii

Eländpunktan aluz om pandud vl 1785, nimitihe ezmäižen Berling-kanzan-sirdnikan mödhe. Šingotihe laivansauvomižel i mecpilindal.

Vermontan universitet radab lidnas vspäi 1791.

Geografijan andmused

Lidn sijadase ümbrikon päivlaskmas, Šamplein-järven päivnouzmaižel randal (Ph. Lavrentijan jogen oigedpol'ne bassein), 61 m ü.m.t. keskmäižel korktusel. Vihandad mäged seištas päivnouzmha lidnaspäi, ned oma Appalači-mägisisteman palaks.

Matkad Kanadan röunhasai om seičemekümne kaks' kilometrad pohjoižhe orhal.

Klimat om ven kontinentaline neps. Voden keskmäine lämuz om +8,7 C°, kezakun-elokun +20..+22 C°, tal'vkun-uhokun −2..−6 C°. Ekstremumad oma −34 C° i +38 C°. Voib panda halad päiči kezakus-elokus. Paneb sadegid 953 mm vodes, enamba kezakus-heinkus (103..108 mm kus), vähemba vilukus-keväz'kus (45..57 mm kus).

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 42 417 ristitud. Kaikiš suremb lidnan ristitišt om nügüd'.

Augotižlibundan mödhe (lidnan eläjad vl 2020): evropalaižed (ispanijalaižita) — 78,5 %, azijalaižed — 5,4 %, afroamerikalaižed — 4,8 %, latinamerikalaižed i ispanijalaižed — 3,7 %, indejalaižed — 0,2 %, valdmerimalaižed — 0,01 %, segoitadud augotižlibundanke — 6,2 %, toiženke augotižlibundanke — 1,1 %.

Transport

Avtobusad (Green Mountain Transit) oma kundaližeks transportaks lidnas da sen ümbrištos. Avtobusad, jonused i ehtatimed ühtenzoittas lähižidenke suridenke lidnoidenke.

Rahvahidenkeskeine soda- da civiline Berlington-lendimport (BTV / KBTV) sijadase kudes kilometras päivnouzmha lidnan azjaližes keskusespäi, lähižes Saut Berlington-lidnas. Tehtas reisid AÜV:oiden suridme lidnoidme. Passažiroiden kaks' videndest oma Kanadan Kvebek-provincijaspäi.

Irdkosketused

Lidnan oficialine sait (burlingtonvt.gov). (angl.)

Berlington (Vermont) Vikiaitas