Margilan

Margilan
Marg‘ilon / Марғилон
Valdkund	Uzbekistan
Eläjiden lugu (2023)	246,700 ristitud
Pind	40,83 km²
Pämez'	Šukrullohon Nisbathonov; (eloku 2023—,; Шукруллохон Нисбатхонов)
Telefonkod	+998−73
Aigvö	UTC+5

Margilan (uzb.: Marg‘ilon / Марғилон [mɐrʁɨˈlɒn], ven.: Маргила́н) om lidn Uzbekistanan suvipäivnouzmas. Se om valdkundan kümnenz' lidn eläjiden lugun mödhe, mülüb Ferganan agjaha.

Istorii

Eländpunktan aluz om pandud 2.-1. voz'sadoil EME Šuukten ühtel teišpäi, oigetihe lidnan 2000-vottušt jubilejad vl 2007. Mainitase kirjutadud purtkiš 9. voz'sadaspäi, nügüdläiženke nimitusenke — 10. voz'sadaspäi. Venäman imperijan aigan (vspäi 1875) lidnan oficialine nimi oli Margelan vai Vanh Margelan (ven.: Старый Маргелан) erištamha Udes Margelanaspäi (nüg. Fergan).

Margilan om šuukkanghiden tehmižen keskuz amussai. Šuukkombinat radab lidnas nevondkundaližes aigaspäi, sen ližaks om kaks' tekstilinfabrikad. Kaks' fabrikad («Jodgorlik», «Faizulodin») i äi privatižid edheotandoid pästtas čomamahtoližid tegesid, sidä kesken tekstil'tegesid. Järed kaluiden torguz i söndtavaroiden torguz oma avaitud lidnas. Neniden-ki sarakoiden tegimed ratas nevondkundaližes aigaspäi: maižanduztehnikan kohenduz, pun ümbriradmine, sömtegimišt (leibtegim).

Geografijan andmused

Lidn sijadase agjan päivnouzmas, Ferganan alangišton Margilanan oazisas, 487 m ü.m.t. keskmäižel korktusel.

Matkad agjan Fergan-keskushesai om ühesa kilometrad suvipäivnouzmha.

Klimat om kontinentaline pehmdanke tal'venke, kezal om räk.

Eläjad

Vl 2010 lidnan eläjiden lugu oli 168 515 ristitud. Kaik 215 400 eläjad oli lidnas vl 2014. Kaikiš suremb lidnan ristitišt om nügüd'.

Rahvahad: uzbekalaižed — 91,9 %, venänikad — 3,1 %, totarlaižed — 1,4 %, toižed rahvahad — 3,6 %.

Margilanan profopendusen aluzkundad oma kaks' profškolad i nell' kolledžad: sauvondan, mediciniž-pedagogine, kommercijan, finansoiden. «Šoi»-kompanijan šuukinstitut om olmas.