Nant

Nant
Nantes

Lidnanznam	Flag
Valdkund	Francii
Eläjiden lugu (2017)	309,346 ristitud
Pind	65,19 km²
Pämez'	Žoanna Rollan (sulaku 2014— 2026, Johanna Rolland)
Telefonkod	+33-(0)2
Aigvö	tal'vel UTC+1, kezal UTC+2

Lidnan kart (2011)

Nant (franc.: Nantes [nɑ̃t], bret.: Naoned [ˈnãunət]) om lidn da kommun Francijan päivlaskmas. Lidn om Pei-de-la-Luar-regionan i sen Atlantine Luar-departamentan administrativine keskuz. Valdkundan kudenz' lidn eläjiden lugun mödhe, koumanz' finansine keskuz, videnz' meriport (Sen-Nazer-avanportanke), om «čomamahtoiden da istorijan lidn»-arvonke.

Istorii

Eländpunkt mainitase Rimalaižes imperijas 3. voz'sadal meiden erad Portus Namnetum-nimitusenke, Gallijan namnetad-heimon amuine pälidn. Varmitihe lidnad seinäl 3.-4. voz'sadal, se alištui hristianizacijale sil-žo aigal. Bretanin gercogad valdoičiba lidnal. Vspäi 1488 se om Francijan palaks, jogiport meriportanno i sömtegimišt abutihe Nantale kazda.

Nant šingotase finansižeks keskuseks (sen birž om ühtenzoittud Parižan biržanke vl 1990), «Airbus»-kompanijan paloiden tegimel lendimiden täht, sauvondan kompanijoil, kreativižel industrijal, turizmal i meriportal.

Geografijan andmused

Lidn sijadase Luar-jogen Nant-sarel i oiktal kukhikahal randal tobjimalaz läz jogen lanktendad Atlantižhe valdmerhe, 12 m ü.m.t. keskmäižel korktusel. Matkad Parižhasai om 342 km pohjoižpäivnouzmha.

Sokaz tahond levitase jogen vastrandal sen allüvialižes alangištos. Nant alištui paksuile sur'vezile, i saudihe kaičendsauvusiden kompleksad jogenno 20. voz'sadan augotišes, möhemba putkotadihe penid jogid. Luaran estuarii zavodiše lidnas i vedase 60 km valdmerennoks.

Klimat om ven valdmeren, pil'vekaz vodes läbi. Voden keskmäine lämuz om +12,7 C°, kezakun-sügüz'kun +17,1..+19,8 C°, tal'vkun-uhokun +6,4..+6,7 C°. Ekstremumad oma −15,6 C° (uhoku) i +42,0 C° (heinku). Kezaaigan minimum om +3,8 C° (kezaku), tal'vaigan maksimum om +22,6 C° (uhoku). Ei voi panda halad kezakus-sügüz'kus (sügüz'kun minimum om +2,8 C°). Paneb sadegid 820 mm vodes, enamba redukus-vilukus (88..101 mm kus), vähemba kezakus-elokus (44..50 mm kus). Paneb lunt viž päiväd tal'ves keskmäras. Kun keskmäine relätivine nepsuz vajehtase 75..80 % röunoiš keväz'kus-sügüz'kus, 86..89 % redukus-vilukus.

Eläjad

Vl 2006 lidnan eläjiden lugu oli 282 853 ristitud. Kaikiš suremb lidnan ristitišt om nügüd'. Kaik 949 316 ristitud elädas lidnaglomeracijas 3 302 km² pindal (2015).

Tramvaid oma kundaližeks pätransportaks.

Irdkosketused

• Lidnan oficialine sait (metropole.nantes.fr). (fr.)