Oleite (Kanzas)

Oleite
Olathe
	Flag;
Valdkund	Amerikan Ühtenzoittud Valdkundad
Eläjiden lugu (2023)	147,461 ristitud
Pind	161,57 km²
Telefonkod	+1−913
Aigvö	tal'vel UTC−6,; kezal UTC−5

Sil sanal voib olda toižid znamoičendoid; miše nähta niid, tulgat tänna.

Oleite (angl.: Olathe [oʊˈleɪθə]) om AÜV:oiden lidn Kanzas-štatan päivnouzmaiženno röunanno, štatan nellänz' lidn eläjiden lugun mödhe. Se om Džonson-ümbrikon administrativine keskuz. Mülüb Kanzas Sitin aglomeracijha (kaks' millionad eläjid), sen suvipäivlaskmaine ezilidn.

Istorii

Eländpunktan aluz om pandud vl 1857 lidnan statusanke. Nimituz znamoičeb «čomakulu» šoni (šauni)-indejalaižiden kelel. Kätihe «ezmäižen klassan» lidnaks vl 1970.

Oleite šingotase Garmin-kompanijan päfateral (GPS-ladimed) i mašinansauvomižen edheotandoiden tegimištparkal. «Farmers Insurance»-kompanijan järed palakund i Kanzasan il'mlikundan kontrolin keskuz sijadasoiš siš.

Geografijan andmused

Lidn sijadase ümbrikon keskuzpalas, 316 m ü.m.t. keskmäižel korktusel. Kaks' järved om lidnas: ühtennimine Oleite 70 ga pindal i Cedar (angl.: Cedar Lake) 18 ga.

Matkad Kanzas Sitin keskuzpalhasai om koumekümne üks' kilometrad pohjoižpäivnouzmha orhal.

Klimat om kontinentaline neps. Kezal om räk, tal'v om pehmed päpaloin. Voden keskmäine lämuz om +12,8 C°, kezakun-elokun +23,5..+26,0 C°, tal'vkun-uhokun −1,5..+1,2 C°. Ekstremumad oma −34 C° (uhoku) i +46 C° (heinku). Kezaaigan minimum om +4 C° (kezaku), tal'vaigan maksimum om +27 C° (uhoku). Paneb haloid redukuspäi sulakuhusai keskmäras, ei voi panda niid kezakus-elokus. Paneb sadegid 1035 mm vodes, enamba semendkus-kezakus (133..134 mm kus), vähemba tal'vkus-uhokus (33..44 mm kus). Paneb 35 sm lunt tal'ven kümnes päiväs.

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 125,872 ristitud 156,49 km² pindal, vn 2020 — 141,290 ristitud. Kaikiš suremb lidnan ristitišt om nügüd'.