Rok

AÜV:oiden Red Hot Chili Peppers-rokgrupp (alusenpanend 1982) vn 2006 *Pinkpop*-festivalin aigan, ozutab järgelišt rokgruppan täht kvartetjonod, huralpäi oiktale: basist, pään', barabananvändai, gitarist

Sil sanal voib olda toižid znamoičendoid; miše nähta niid, tulgat tänna.

Rok vai rokmuzik (angl.: rock music) om populärižen muzikan čuradusiden riven ühthine nimituz.

Anglijan kelen rock-verb kändase «löuhkta», «čibutada», «bajutelda», «čibudas». Se libui kut aigaližemban rok-n-roll-žanran nimen lühenduz i znamoičeb harakterižid rok-n-rollan täht sidodud likundan märitud formha ritmižid mujegid, ende roll, twist, swing- i shake-sanad oliba ottud analogižikš nimitamha stilid. Edestadas roksädusid bangutezsoitoiden, «kormatud» elektrogitaroiden i basgitaroiden kävutandanke paksumba kaiked. Harakterizuidas rokmuzikantoid ičeze sätud kompozicijoiden vändol, tekstanke anglijan kelel tobjimalaz.

Istorii

Rokmuzik sündui blüzan alusel AÜV:oiš i Sures Britanijas 1950-nzil vozil^[1]. Istorižikš ezmäižed rokžanrad oma rok-n-roll i rokabilli. Jäl'ghižed alažanrad oliba 1960-nziden voziden populärižhe muzikha sidodud, ned oliba folk, kantri, skiffl, muzikholl.

Siš aigaspäi rokmuzikan korged aig zavodihe AÜV:oiš i Päivlaskmaižen Evropan maiš. Ühtištadihe rokad muzikan kaikidenke toižidenke čuradusidenke, uded alažanrad sünduiba 1990-nzihe vozihesai. 1960−70-nzil vozil kaik päižed alažanrad sünduiba: artrok, džazrok, hardrok, pankrok, rokavangard. 1980-nziden voziden augotišes formiruihe mugomid alažanroid kut postpank, uz' ald, al'ternativine rok. Järed ičevuitte rokan metal-sarak sädihe 1970-nzil vozil, ezmäi klassine hevimetal, 80-nzil vozil radikaližembad treš, det, blek, 90-nzil segoitadihe metalad toižidenke žanroidenke: simfo, folk, gotik, prog. Niil-žo 1990-nzil vozil šingotaškanziba granž (libui 80-nziden keskes), britpop (sündui 60-nzil), al'ternativine metal (om 80-nziden lopuspäi), rok Venämas. Rokmuzik eli krizisas läbi 2000-nzil vozil. Sid' Internetan leviganduz vedi vanhid žanroid populärižusennoks, erased-se čihodanuded rokgruppad ühtištiba tošti. Hillašti no kaikenaigašti nacionaližed roklikundad šingotasoiš, pajoidenke rahvahaližil kelil.

Homaičendad

↑ W. E. Studwell, D. F. Lonergan. The Classic Rock and Roll Reader: Rock Music from its Beginnings to the mid-1970s (Klassižen rok-n-rollan lugendkirj: rokmuzik sen auguišpäi 1970-nziden voziden keskhesai). Abingdon: Routledge, 1999. — Pala 11. (angl.) ISBN 0-7890-0151-9.

Irdkosketused

Viž kaikiš znamasižembad rokmuzikan muzejad mail'mas rockcult.ru-saitan versijan mödhe. (ven.)

Rok Vikiaitas

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.

[1] W. E. Studwell, D. F. Lonergan. The Classic Rock and Roll Reader: Rock Music from its Beginnings to the mid-1970s (Klassižen rok-n-rollan lugendkirj: rokmuzik sen auguišpäi 1970-nziden voziden keskhesai). Abingdon: Routledge, 1999. — Pala 11. (angl.) ISBN 0-7890-0151-9.

[1]