Sanj (lidn)

Sanj
三亞 / 三亚 (Sānjà)

Valdkund	Kitai
Eläjiden lugu (2024)	1,116,100 ristitud
Pind	1,919,58 km²
Pämez'	Čžou Hunbo (viluku 2021—, 周红波)
Telefonkod	+86-(0)898
Aigvö	UTC+8

Lidnan transporttekart (2013)

Sanj (kit.: 三亞, kebnetud kit. 三亚, pin'jin': Sānyà) om lidn-kurort Kitain suves, Hainan'-agjan da saren suves, Kitain Suvimeren randal. Nece om valdkundan kaikiš suvemb lidn i lidnümbrik.

Istorii

Eländpunkt sai lidnan oficiališt statusad vl 1984, sätihe lidnümbrikod vl 1987. Vspäi 2014 lidnümbrik jagase nelläks rajonaks.

Sanj šingotase rahvahidenkeskeižen turizman erazvuiččiden sarakoiden keskuseks i Man kaimdajiden sädandal civiližiden tarbhaižusiden täht. Meriveden lämuz vajehtase +22..+28 C° röunoiš vodes läbi. Lidnan tahond om tetab čajun sortuiden kazvatandal.

Geografijan andmused

Lidnümbrikon sijaduz agjas i valdkundas vn 2007 kartal

Lidn sijadase ühtennimižen merilahten randal, mägiden i meren keskes.

Klimat om tropine kaks'sezonine. Se om päivoikaz semendkus-elokus i pil'vekaz toižiš kuiš. Voden keskmäine lämuz om +26,5 C°, kuidme +22,3..+29,5 C°. Ekstremumad oma +5,1 C° (tal'vku) i +37,5 C° (semendku). Il'man lämuz voib ületada +31 C° miččel taht kul, ei voi olda madalamb mi +18 C° semendkus-sügüz'kus. Paneb sadegid 1417 mm vodes, enamba heinkus-redukus (212..248 mm kus), kuiv sezon oleskeleb tal'vkus-keväz'kus (6..21 mm kus). Kun keskmäine relätivine nepsuz vajehtase 74..80 % röunoiš redukus-uhokus, 82..85 % keväz'kus-sügüz'kus. Ul'traruskedsinižen sädegoičendan indeks om 11..12 uhokus-sügüz'kus, 8..10 redukus-vilukus.

Tobmuz

Lidnümbrikon nell' rajonad vl 2015

Edeline lidnümbrikon pämez' (partijan lidnankomitetan sekretar') om Tong Daoči (kül'mku 2018 — kül'mku 2020, 童道驰). Lidnan mer om Čen Si (陈希) vn 2022 semendkuspäi.

Eläjad

Vn 2010 Kitain rahvahanlugemižen mödhe lidnümbrikon eläjiden lugu oli 685,408 ristitud, vn 2020 — 1,031,396 ristitud. Kaikiš suremb lidnümbrikon ristitišt om nügüd'. Arni lidnan ristitišt om 550 tuhad eläjid (2018) 153 km² pindal.

Kaik kaks' üläopendusen aluzkundad baziruišoiš lidnas: privatine Sanjan universitet (kit.: 三亚学院 Sānyà xuéyuàn, alusenpanend 2005, 20 tuh. üläopenikoid vl 2018) i valdkundaline Hainanin tropižen okeanografijan universitet (kit.: 海南热带海洋学院 Hǎinán rèdài hǎiyáng xuéyuàn, alusenpanend 1977, vll 1993−2015 Cünčžoun universitet i kolledž, 10 tuh. üläopenikoid vl 2011).

Irdkosketused

• Lidnan tobmuden sait (sanya.gov.cn). (kit.)