Veliko Tirnovo

Veliko Tirnovo
Велико Търново
Lidnanznam;	Flag;
Valdkund	Bolgarii
Eläjiden lugu (2024)	59,870 ristitud
Pind	30,38 km²
Pämez'	Daniel Panov; (reduku 2011—,; Даниел Панов)
Telefonkod	+359−62
Aigvö	tal'vel UTC+2,; kezal UTC+3

Veliko Tirnovo (bolg.: Велико Търново [vɛˈliko ˈtɤrnovo] «Sur' Tirnovo») om Bolgarijan lidn keskuzpalan pohjoižes. Se om ühtennimižen kundan i Veliko Tirnovon agjan administrativižeks keskuseks da palaks.

Istorii

Tirnovon aluz om pandud vl 1185, se oli Kahtenden Bolgarijan car'kundan pälidnaks vll 1186−1393. Vl 1393 turkad anastiba lidnad i poltiba sidä. Vl 1878 Tirnovo kändihe joudutadud Bolgarijan pordaigaližeks pälidnaks, oli mugoman vhesai 1879. Lidn eli läbi znamasižes manrehkaiduses vn 1913 1. päiväl kezakud.

Vspäi 1965 Veliko-prefiks ližadui lidnan oficialižhe nimitushe.

Veliko Tirnovo šingotase elektromehanižil tegimil (ende elektrolikutimed, reduktorad, radio- i TV-apparatad, nügüd' elektrolibutimed, fiskaližed printerad i kassapparatad), tekstil'tegimištol (kanghad da sobad), polietilenpakuitesen i kudotomiden materialiden edheotandal, sömtegimištol (järed paštandsija, konditerine fabrik, lihan i maidon ümbriradmine, uksusan, liköroiden i oluden tehmine), sodameritegimel.

Geografijan andmused

Lidnan sijaduz agjas i valdkundas vn 2004 kartal

Lidn sijadase agjan suvipäivlaskmaiženno röunanno, Jantr-jogen randal (bolg.: Янтра ['jantrɐ] 285 km pitte, Dunain oiged ližajogi), 220 m ü.m.t. keskmäižel korktusel. Kaikiš korktemb čokkoim om Garga Bair-kukkaz (373 m ü.m.t.).

Matkad Plovdivhasai om 127 km suvipäivlaskmha orhal vai 219 km avtoteidme, Sofii-pälidnhasai om 195 km päivlaskmha orhal vai 225 km avtol. Lähembaine znamasine lidn om Gorna Orähovic kahesas kilometras pohjoižpäivnouzmha, sädab aglomeracijad senke.

Eläjad

Veliko Tirnovo om valdkundan üks' nelläs sures lidnaspäi, kudamban ristitišt ližadui vai jäi kaikenaigaižeks hätken aigan vspäi 1985, znamasižen sündutamižmäran tagut 2000-nzil vozil. Vn 2011 Bolgarijan rahvahanlugemižen mödhe lidnan eläjiden lugu oli 68 883 ristitud, vn 2021 — 58 507 ristitud. Kaik 68 686 eläjad oli lidnas vl 2015^[1]. Kaikiš suremb lidnan ristitišt oli 69 605 eläjad vl 1985.

Religijan mödhe ühesa lidnalašt kümnespäi oma ortodoksižen hristanuskondan polenpidajad, viž procentad oma islamanuskojad, toižed eläjad oma hristanuskondan toižiden jumalankodikundoiden uskojad (katoline i metodistine sebrad).