Aküreiri

Aküreiri
Akureyri
Valdkund	Islandii
Eläjiden lugu (2025)	20,050 ristitud
Pind	137,8 km²
Pämez'	Asthildur Sturludottir; (2018—,; Ásthildur Sturludóttir)
Telefonkod	+354−461
Aigvö	UTC+0

Aküreiri (isl.: Akureyri [ˈaːkʏrˌeiːrɪ], sijaline virkand [ˈaːkʰʏrˌeiːrɪ]) om Islandijan lidn valdkundan pohjoižes. Se om valdkundan videnz' lidn eläjiden lugun mödhe i kaikiš suremb pälidnan regionas päiči, Pohjoižpäivnouzmaižen agjan administrativine keskuz, mülüb sihe.

Istorii

Eländpunkt mainitase vspäi 1562 nügüdläiženke nimitusenke, kaikenaigaine vspäi 1778. Vl 1786 Danijan kunigaz andoi sile lidnan statusad.

Aküreiri šingotase kalanpüdandan jädumatomal meriportal i sömtegimištol (kala, olud). Lidnan tobj pala lämbitase geotermaližil purtkil 1980-nziš vozišpäi.

Geografijan andmused

Lidn sijadase pit'kan fjordan lopun madalal randal, sadas kilometras suvhe Pohjoižen polärižes pirdaspäi. Glerau-jogi (isl.: Glerá) jokseb lidnas. Om korktoid mägid lidnan taga. Mäged kaitas lidnad viluid tulleid vaste.

Matkad Reikjavikhasai om 387 km suvipäivlaskmha.

Klimat om subarktine pil'vekaz, läz ei ole päiväižen ozutandad viž kud vodes (reduku-uhoku). Voden keskmäine lämuz om +4,2 C°, heinkun i elokun +10,8..+11,2 C°, kül'mkun-keväz'kun −0,8..+0,6 C°. Ekstremumad oma −23,0 C° (keväz'ku) i +29,4 C° (kezaku). Kezaaigan minimum om −2,2 C° (kezaku, eloku), tal'vaigan maksimum om +17,5 C° (viluku). Ei voi panda halad heinkus vaiše (minimum +1,3 C°). Paneb sadegid 574 mm vodes, enamba redukus-tal'vkus (68..74 mm kus), vähemba sulakus-kezakus (21..26 mm kus). Paneb lunt 95 päiväd tal'ves keskmäras. Kun keskmäine relätivine nepsuz om 73..74 % semendkus-kezakus, 75..81 % toižiš kuiš.

Meriveden kuine keskmäine lämuz om +2,1..+4,0 C° tal'vkus-semendkus, kaikiš korktemb oleleb heinkus-sügüz'kus (+8,2..+9,5 C°).

Tobmuz

Lidnan municipalitetan oficialine nimi om Akureyrarbær [-ˌeiːrarˌpaiːr̥], «Aküreiri-lidn». Lidnan päpalan ližaks kaks' merisart mülüdas Aküreirin municipalitetha: vspäi 2004 Hrisei (Hrísey 7,67 km² pindanke, 153 rist. vl 2017) 35 kilometras pohjoižhe i vspäi 2009 Grimsei (Grímsey 5,3 km² üks'jäiženke Sandvik-külänke, 57 rist. vl 2021) sadas kilometras pohjoižhe Polärižel pirdal.

Edeline lidnan pämez' om Eirikur Bjorgvinson (Eiríkur Björn Björgvinsson, eloku 2010 — 2018).

Eläjad

Vl 2009 lidnan municipalitetan eläjiden lugu oli 18 041 ristitud, vl 2017 — 18 488 ristitud sil-žo pindal. Kaikiš suremb lidnan ristitišt om nügüd'.

Aküreirin universitet^[1] (Háskólinn á Akureyri, vspäi 1987, 2,8 tuh. üläopenikoid koumel fakul'tetal vl 2024) i kaks' botaništ sadud oma avaitud lidnas. Lidn om valdkundan tal'veližiden sportansuguiden keskuz.