Bahr Dar

Bahr Dar
ባሕር ዳር
(Baher Dar)

Valdkund	Efiopii
Eläjiden lugu (2021)	332,856 ristitud
Pind	120 km²
Telefonkod	+251−58
Aigvö	UTC+3

Bahr Dar (amh.: ባሕር ዳር Baḥər Dar «mererand») om lidn Efiopijan lodehes. Se om valdkundan seičemenz' surtte lidn, Amharan agjan administrativine keskuz.

Istorii

19. voz'sadal se oli Bahir Gijorgis-žiloks jumalankodinno 1..2 tuhad ristitištonke, sijaline torguindan keskuz. Kändihe lidnaks valdkundan italižen okkupacijan jäl'ghe vl 1936. Vl 1941 pördihe ripmatomut, i Efiopijan ohjastuz kändi lidnad regionan administrativižeks keskuseks. Bahr Dar sai erištadud municipalitetan statusad vl 1945.

Bahr Dar šingotase sömtegimišton, käziradajiden i tekstiližil edheotandoil, gidroelektrostancijal, turizmal.

Geografijan andmused

Lidn sijadase agjan päivlaskmaižes palas, Tan-järven randal, Abbain lähtendanno sišpäi, 1800 m ü.m.t. keskmäižel korktusel. Jaugnikoiden te ühtenzoitab lidnan keskust Sinivauvhan Nilan (Abbain) purtkenke.

Klimat om tropižen savannan kaks'sezonine. Kun keskmäine lämuz om +18..+21 C° vodes läbi. Ekstremumad oma +5 C° i +38 C°. Il'man lämuz voib poleta päiväl +10 Cel'sijan gradushasai voden mitte taht aigan. Paneb sadegid 1416 mm vodes, enamba kezakus-sügüz'kus (205..396 mm kus), kuiv sezon oleskeleb kül'mkus-sulakus (62 mm pordos).

Eläjad

Vn 2007 Efiopijan rahvahanlugemižen mödhe lidnan eläjiden lugu oli 221 991 ristitud 28 km² pindal. Amharalaižed ottihe 96 % ristitištos.

Ühesa uskojad kümnespäi oma Efiopijan ortodoksižen hristanuskondan polenpidajad.

Bahr Daran universitet (vspäi 2001, alusenpanend 1954 kut politehnine kolledž, 54 tuh. üläopenikoid vl 2018) i medicinine kolledž oma lidnan professionaližen opendusen aluzkundoikš.

Transport

Avtoted ühtenzoittas valdkundan järedoidenke lidnoidenke.

Tatanmaižiden reisiden civiline Bahr Dar-lendimport (BJR / HABD) radab lidnas, sijadase kahesas kilometras päivlaskmha lidnan keskusespäi.