Cele

Cele
Celje

Lidnanznam	Flag
Valdkund	Slovenii
Eläjiden lugu (2022)	37,122 ristitud
Pind	22,71 km²
Pämez'	Bojan Šrot (1998—)
Telefonkod	+386−3
Aigvö	tal'vel UTC+1, kezal UTC+2

Cele (sloven.: Celje [ˈtsɛːljɛ], saks.: Cilli) om lidn Slovenijan keskuzpalan päivnouzmas. Se om valdkundan koumanz' lidn eläjiden lugun mödhe, mülüb statistižhe Savin'sk-regionha.

Istorii

Eländpunkt oli Rimalaižen imperijan palaks kuti Civitas Celeia. Celen lidnuz mainitaškanzihe vspäi 1137. Lidn oli Celen grafkundan keskuseks 14.-15. voz'sadoil, se oli slovenijalaižiden üks'jäine ripmatoi valdkund Keskaigan.

Ende cinktegim, sid' titanan dioksidan tegim radoiba Celes, tekstiline tegimišt sijazihe ezilidnoiš. Nügüd'aigan ižandusen sarakod oma torguind (Tuš Holding), sauvondmaterialiden i sadmahusen tehmine, instrumentoiden avtotegimišton täht industrii, personaližiden dokumentoiden i pakuitesen painmine, mugažo sömtegimišt radab ezilidnoiš (fruktsiropad, aromatizatorad, lihaproduktad, maidtegim). Toižed edheotandad pästtas emaliruidud astjoid, kaluištod ofisan täht. Jogavozne Rahvahidenkeskeine käzitöiden jarmank vedase.

Geografijan andmused

Lidn sijadase Savinj-jogen alangištos (sloven.: Savinja 101 km pitte, Dunain oigedpol'ne bassein), 238 m ü.m.t. keskmäižel korktusel.

Cele-lidn jagase kümneks ümbrikoks (sloven.: mestna četrt), i sen municipalitet-lidnankund — ühesaks sijaližeks kundaks (krajevna skupnost).

Eläjad

Vl 2010 lidnan eläjiden lugu oli 37 777 ristitud, lidnankundan — 50 039 ristitud (kaikiš suremb kaikes aigas) 94,9 km² pindal. Vl 2017 lidnan ristitišt oli 38 079 eläjad. Läz 70 tuhad eläjid om ezilidnoidenke.

Lidnan nell' eläjad videspäi oma slovenijalaižed.

Irdkosketused

• Lidnankundan oficialine sait (celje.si). (sloven.)