Cele

Cele
Celje
Lidnanznam;	Flag;
Valdkund	Slovenii
Eläjiden lugu (2025)	38,059 ristitud
Pind	22,71 km²
Pämez'	Matija Kovač; (tal'vku 2022—)
Telefonkod	+386−3
Aigvö	tal'vel UTC+1,; kezal UTC+2

Cele (sloven.: Celje [ˈtsɛːljɛ], saks.: Cilli [ˈtsɪli]) om lidn Slovenijan keskuzpalan päivnouzmas. Se om valdkundan koumanz' lidn eläjiden lugun mödhe, mülüb statistižhe Savin'sk-regionha.

Istorii

Eländpunkt oli Rimalaižen imperijan palaks kuti Civitas Celeia. Celen lidnuz mainitaškanzihe vspäi 1137. Eländpunkt sai lidnan oiktusid vn 1451 11. sulakud. Lidn oli Celen grafkundan keskuseks 14.-15. voz'sadoil, se oli slovenijalaižiden üks'jäine ripmatoi valdkund Keskaigan.

Ende cinktegim, sid' titanan dioksidan tegim radoiba Celes, tekstiline tegimišt sijazihe ezilidnoiš. Nügüd'aigan ižandusen sarakod oma torguind (Tuš Holding), sauvondmaterialiden i sadmahusen tehmine, instrumentoiden avtotegimišton täht industrii, personaližiden dokumentoiden i pakuitesen painmine, mugažo sömtegimišt radab ezilidnoiš (fruktsiropad, aromatizatorad, lihaproduktad, maidtegim). Toižed edheotandad pästtas emaliruidud astjoid, kaluištod ofisan täht. Jogavozne Rahvahidenkeskeine käzitöiden jarmank vedase.

Geografijan andmused

Lidn sijadase Savinj-jogen alangištos (sloven.: Savinja 101 km pitte, Dunain oigedpol'ne bassein), 238 m ü.m.t. keskmäižel korktusel.

Matkad Lüblän-pälidnhasai om 61 km päivlaskmha-suvipäivlaskmha orhal vai 76 km avtol.

Tobmuz

Cele-lidn jagase kümneks nimitadud ümbrikoks (sloven.: mestna četrt), i sen municipalitet-lidnankund — ühesaks nimitadud sijaližeks kundaks (krajevna skupnost).

Lidnan tobmuden pämez' om župan (sloven.: župan Mestne občine Celje). Edeline lidnan pämez' om Bojan Šrot (1998−2022).

Eläjad

Vl 2010 lidnan eläjiden lugu oli 37 777 ristitud, lidnankundan — 50 039 ristitud (kaikiš suremb kaikes aigas) 94,9 km² pindal. Vl 2017 lidnan ristitišt oli 38 079 eläjad. Kaikiš suremb lidnan ristitišt oli 41 279 eläjad vl 1991. Läz 70 tuhad eläjid om ezilidnoidenke.

Lidnan nell' eläjad videspäi oma slovenijalaižed.

Galerei

Celen lidnuz (2011)
Narodni dom om Celen lidnankundan suiman i Administracijan tobjan palan sijaduz (2021)
Lidnan tobmuden sauvuz (magistrat, 2014)
Pühän Maria-neiččen Voznesenjan jumalanpert' (riman katoline), vn 2024 nägu
Evropa-adivpert' vl 2013
Lidnan Celjski dom-kul'turkeskuz (vn 2023 olend)
Cele-päraudtestancijan sauvuz vl 2020

Irdkosketused

Lidnankundan oficialine sait (celje.si). (sloven.)

Cele Vikiaitas