Cincinnati

**Cincinnati**
Lidnanznam;	Flag;
Valdkund	Amerikan Ühtenzoittud Valdkundad
Eläjiden lugu (2020)	309,317 ristitud
Pind	206,26 km²
Pämez'	Aftab Pureval; (viluku 2022—)
Telefonkod	+1−513, +1−937
Aigvö	tal'vel UTC−5,; kezal UTC−4

Cincinnati (mugažo kirjutadas anglijan kelel, no virktas [sɪnsɨˈnæti]) om AÜV:oiden lidn Ogajo-štatan suvipäivlaskmaižes čogas. Se om štatan koumanz' lidn eläjiden lugun mödhe.

Istorii

Eländpunktan aluz om pandud vl 1788. Se sai lidnuden statusad (angl.: town) vn 1802 vilukus, suren lidnan oiktusid (angl. city) vn 1820 1. päiväl keväz'kud.

Cincinnati šingotase Procter&Gamble-kompanijan kudel tegimel. Nened kompanijad Fortune 500-nimikirjutesespäi baziruišoiš lidnas vai sen ümbrištos: Kroger (torguind, 20 tuhad radsijid, kaikiš järedamb radonandai lidnas), Procter & Gamble (tavarod tervhuden i čomuden täht, perskenaluižed, kodihimii), Western & Southern Financial Group, Fifth Third Bank, American Financial Group, Cintas (uniform i varuitomuden kalud). General Electric-korporacijan globaline operacine keskuz radab lidnas.

Geografijan andmused

Lidn sijadase Ogajo-jogen oiktal pohjoižel randal, kukhikahas tahondas, 147 m ü.m.t. keskmäižel korktusel. Ühthine pind om 206,26 km², sidä kesken vezi otab 4,46 nellikkilometrad. Kentukki-štatan territorii levitase jogen vastrandal. Lidnan kaikiš korktemb čokkoim om Eiri-mägi (angl.: Mount Airy) 293 m ü.m.t. kortte. Vedihe sauvondad sur'veziden grazindha kacten jogen polespäi.

Klimat om ven kontinentaline, subtropižen röunal. Voden keskmäine lämuz om +12,6 C°, kezakun-elokun +22,4..+24,4 C°, tal'vkun-uhokun −0,3..+2 C°. Ekstremumad oma −32 C° (viluku) i +42 C° (heinku). Kezaaigan minimum om +4 C° (kezaku), tal'vaigan maksimum om +26 C° (uhoku). Paneb sadegid 1150 mm vodes, läz tazomäras kuidme, enamba sulakus-kezakus (115..121 mm kus), vähemba uhokus (81 mm) i kül'mkus (82 mm). Štormad oleldas lämäižembiš kuiš. Tulleipörtked oma harvad, znamasižed oliba lidnas ümbrištonke vll 1974, 1999, 2012, 2017. Paneb lunt 59 sm tal'ves. Znamasine lumitorok om tal'vel kerdan voz'kümnes. Kun keskmäine relätivine nepsuz vajehtase 63..74 % röunoiš voden aigan.

Eläjad

Vl 2010 lidnan eläjiden lugu oli 296 943 ristitud. Kaik 301 301 eläjad oli lidnas vl 2017. Läz 2,1 mln ristituid elihe lidnaglomeracijas sil-žo vodel (kaikiš suremb Ogajos i 28. surtte AÜV:oiš).

Edeline lidnan pämez' (mer) om Džon Krenli (John Cranley, tal'vku 2013 — viluku 2022).

Transport

Avtobusad oma kundaližeks transportaks lidnas, om tramvain jono keskuzpalas (Connector, 18 seižutest, 5,8 km raudted). Cincinnatin ühtištadud päraudtestancii (angl.: Cincinnati Union Terminal) radab vspäi 1933, se oli sauptud vll 1972−1991.

Rahvahidenkeskeine civiline Cincinnati/Pohjoine Kentukki-lendimport^[1] (CVG / KCVG, 8,8 mln passažiroid vl 2018, 2 mln tonnoid jüguid vl 2022) sijadase ani jogen taga Kentukki-štatan territorijal, 20 km päivlaskmha avtotedme lidnan keskusespäi sildan kal't. Neniden aviakompanijoiden päfaterad sijadasoiš lendimportas: Amazon Air, Delta Private Jets, DHL Americas. Tehtas passažirreisid AÜV:oiden äjihe järedoihe lidnoihe, Torontoho i Parižha, om sezonreisid Kankunha (Meksik). Om äi jügureisid mail'madme (DHL). Sen ližaks, nell' pen't lendimportad i punolendimlavuded oma olmas Cincinnatiš ezilidnoidenke.

Galerei

Lidnan tobmuden sauvuz (2023, om vaumitud vl 1893)
Hristan päjumalanpert' (anglikanine jumalankodikund), vn 2005 nägu
Ph. Petran čepiš päjumalanpert' (riman katoline), vn 2008 nägu
Üläkorged Carew Tower-pert' i Tailer Devidsonan fontan (vai «Veden genii») ezimal vl 2018
Cincinnati Music Hall om lidnan operan, baletan i simfonižen orkestran päsijaduseks (2017)
Cincinnatin ühtištadud päraudtestancii vl 2016 azjaliženke keskusenke tagamal