Dulut (Minnesot)

Dulut
Duluth
Lidnanznam;	Flag;
Valdkund	Amerikan Ühtenzoittud Valdkundad
Eläjiden lugu (2023)	87,680 ristitud
Pind	207,6 km²
Pämez'	Rodžer Rainert; (viluku 2024—,; Roger Reinert)
Telefonkod	+1−218
Aigvö	tal'vel UTC−6,; kezal UTC−5

Dulut (angl.: Duluth [dəˈluːθ]) om AÜV:oiden lidn da port Minnesot-štatan päivnouzmas. Se om štatan nellänz' lidn eläjiden lugun mödhe, Sent Luis-ümbrikon administrativine keskuz da pala.

Istorii

Nügüdläižen eländpunktan aluz om pandud vl 1857, nimitihe sen tahondad francižen Daniel' Greisolon Ser du Lut-matkadajan (1639−1710) mödhe.

Dulut šingotase jüguiden transportiruindal portan kal't, penil edheotandoil (meblin tehmine, oludenkeitand, kalud lapsiden täht) i turizmal. Vezibiologijan tedoiduzkeskuz om avaitud.

Geografijan andmused

Lidn sijadase Üläjärven kaikiš päivlaskmaižen čokkoimen randal, 214 m ü.m.t. keskmäižel korktusel. Röunatab Viskonsin-štatanke. Matkad Minnesotan administrativižhe Sent Pol-keskushesai om 215 km suvhe-suvipäivlaskmha orhal vai 240 km avtotedme.

Klimat om ven kontinentaline, Üläjärven penenke valatoitandanke. Voden keskmäine lämuz om +4,8 C°, heinkun-elokun +18..+20 C°, tal'vkun-uhokun −8..−12 C°. Ekstremumad oma −41 C° i +41 C°. Paneb sadegid 792 mm vodes, vähemba vilukus-uhokus (24..26 mm kus), enamba semendkus-sügüz'kus (86..112 mm kus).

Lidnan ühthine pind om 207,6 km², sidä kesken kuiv ma 185,6 km², vezi otab 22 nellikkilometrad.

Tobmuz

Dulut jagase kaks'kümneks ühesaks nimitadud neiborhudaks.

Lidnan tobmuden pämez' om mer (angl.: mayor of Duluth). Edeline mer om Emili Larson (Emily Larson, viluku 2016 — viluku 2024).

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 86 265 ristitud, vn 2020 — 86 697 ristitud, se om läz kaikenaigaine 1990-nziš vozišpäi. Eläjiden koumandez oma Skandinavijan maiden sirdnikoiden jäl'gnikad. Kaikiš suremb lidnan ristitišt oli 107 312 eläjad vl 1960. Kaik 281 603 eläjad om ezilidnoidenke 21 790 km² pindal (2020).

Augotižlibundan mödhe (2020): evropalaižed — 84,18 % (ispanijalaižita), afroamerikalaižed — 3,46 %, indejalaižed — 2,40 %, latinamerikalaižed i ispanijalaižed — 2,37 %, azijalaižed — 1,59 %, valdmerimalaižed — 0,04 %, segoitadud augotižlibundanke — 5,62 %, toižen augotižlibundan — 0,34 %.

Galerei

Sent Luis-ümbrikon Käskuzkund (huralpäi) i lidnan tobmuden sauvuz (pojav madalamb oiktalpäi, Duluth City Hall, 2016)
Jumalanmaman Rozarijan kafedraline päjumalanpert', vn 2017 nägu (riman katoline, om saudud vodele 1957)
Lidnan azjaline keskuz vl 2023
Minnesotan universitet Dulutas, administrativine sauvuz (2009)
Laivkanal sildanke-libutimenke i lidnan keskuzpala vl 2021

Irdkosketused

Lidnan oficialine sait (duluthmn.gov). (angl.)

Dulut (Minnesot) Vikiaitas