Kali (lidn)

Kali
Cali

Lidnanznam	Flag
Valdkund	Kolumbii
Eläjiden lugu (2023)	2,297,230 ristitud
Pind	619 km²
Pämez'	Horhe Ivan Ospina Gomes (viluku 2020 — tal'vku 2023, Jorge Iván Ospina Gómez)
Telefonkod	+57−2
Aigvö	UTC−5

Kali (isp.: Santiago de Cali [sanˈtjaɣo ðe ˈkali], lüh. Cali), oficialižikš Kalin municipalitet (isp.: Municipio de Cali), om Kolumbijan koumanz' surtte lidn eläjiden lugun mödhe i kahtenz' pindan mödhe. Se om Val'je-del'-Kauk-agjan (departamentan) administrativižeks keskuseks da palaks.

Lidn om valdkundan rahvahidenkeskeižen sportan keskuz, vastsi vn 1971 Panamerikaižid vändoid, vn 2021 Norišton Panamerikaižid vändoid.

Istorii

Eländpunktan aluz om pandud ispanižel Sebastjan Belalkazar-matkadajal (Sebastian Belalcazar) vl 1536. Kali-nimituz libui indejalaižiden kelespäi (om erazvuiččid versijoid), Santjago om anttud alusenpanendan päivän mödhe (25. heinku), se om Pühän Iakov-apostolan päiv.

Kali šingotase sömtegimištol i turizmal. Se om sal'sa-muzikan pälidnaks.

Geografijan andmused

Lidnan sijaduz agjas i valdkundas vn 2011 kartal

Lidn sijadase valdkundan päivlaskmas, agjan suves, 114 kilometras valdmeren randan Buenaventur-portaspäi, 1018 m ü.m.t. keskmäižel korktusel.

Matkad Bogota-pälidnhasai om koume sadad kilometrid päivnouzmha-pohjoižpäuvnouzmha orhal vai 465 km avtoteidme.

Kalin municipalitet jagase 249 fartalaks (barrios) i 91 urbanizacijaks (urbanizaciones). Kalin lidnterritorii kogoneb seičemes rajonaspäi (niiden sijas mülüti 22 kommunad edel 2024. vot). Küläterritorii om 437,2 km² pindal i jagase 15 nimitadud korregimjento:ks (corregimientos), ned alajagasoiš külikš. Kaik läz 36 tuhad ristituid elädas Kalin küläterritorijal.

Eläjad

Vl 2018 lidnan eläjiden lugu oli 2,227,642 ristitud. Kaikiš suremb lidnan ristitišt om nügüd'. Kali om valdkundan koumanden lidnaglomeracijan keskuz, 3,4 mln ristituid elihe siš vl 2011.

Transport

Avtobusad, kiruhavtobusad i taksid oma kundaližeks transportaks lidnas.

Rahvahidenkeskeine civiline Al'fonso Bonil'ja Aragonan nimed lendimport (vai Pal'masek, isp.: Aeropuerto Internacional de Palmaseca, CLO / SKCL, 5,6 mln passažiroid vl 2016) sijadase 22 kilometras päivnouzmha lidnaspäi Pal'mir-lidnanno-kaimdajanno. Tehtas reisid Madridha, Majamihe, Nju Jorkha, lähižiden maiden järedoihe lidnoihe i Kolumbijadme. Sodail'mbazan lendimport radab Kalin päivnouzmas.

Irdkosketused

• Lidnan oficialine portal (cali.gov.co). (isp.) (angl.)