Mamankündled
| Mamankündled / Begonii | ||||||||||||
|---|---|---|---|---|---|---|---|---|---|---|---|---|
 Mamankündliden tipine Begonia obliqua-erik, vn 1799 pirdandkuva | ||||||||||||
| Tedoklassifikacii | ||||||||||||
|
||||||||||||
| Latinankel'ne nimi | ||||||||||||
| Begonia L. | ||||||||||||
|
Mamankündled vai Begonii (latin.: Begonia) om kazmusiden heim. Mülütadas Mamankündližed-sugukundha, sen kaikiš suremb heim erikoiden lugun mödhe (enamba mi tuha).
Etimologii[vajehta | vajehtada tekst]
Latinan nimi libui Francijan Kariban kolonijoiden da laivišton Mišel' Begon-intendantan kanzannimespäi (franc.: Michel Bégon, 1638−1710).
Leviganduz[vajehta | vajehtada tekst]
Begonijad oma levitadud avaros nepsoiš tropižiš mecoiš, mugažo mägiden pautkil koume..nell' tuhad metrid ü.m.t. kortte. Voib löuta kuiviš tropikoiš i subtropikoiš harvemba.
Enamba kaiked om erikoid Suviamerikas, niiden areal sase Meksikhasai. Azijas mamankündled kazdas Gimalajiden päivnouzmas, Indijan suven mägitahondoiš, Malain sarištol i Šrilank-sarel. Afrik om koumanz' kontinent begonijoiden erikoiden lugun mödhe, ned oma levitadud sen nepsas päivlaskmas[1]. Ezimeletaden, mamankündled libudas arni Afrikaspäi.
Ümbrikirjutand[vajehta | vajehtada tekst]
Begonijoiden keskes voib löuta üks'voččid i äivoččid heinid, penzhid (erasti ujelijoid), pol'penzhid ujelijanke vai muguloikahanke jurištonke. Kazmuz om 30..40 sm kortte. Lehtesed oma asimmetrižed päpaloin, čoman mujutandan paksus (kul'turkazmusil erilizešti). Änikod oma väran forman, üks'suguižed. Plod om konorüt.
Voib äikerdoita varzil (pälpäi i seikhen kül'gespäi), muguloil (ku oma), penzhan jagandal tostmižištutandan aigan, il'mvarzil, semnil, lehtesel. Kožui lämuz om +13..+22 C°. Tarbhaine il'man nepsuz 60 % da sen enamba. Hapneb mahusen liigan nepsuden tagut.
Valitud erikod[vajehta | vajehtada tekst]
Läz 125 erikod da niiden gibridoid oma ottud kul'turha 19. voz'sadan kahtendes polespäi. Kaik om läz 1600 erikod heimos, niiden kesken oma:
- Begonia boliviensis — Bolivijan mamankündled
- Begonia convolvulaceae
- Begonia maculata[2] — Läipoikahad mamankündled
- Begonia obliqua — heimon tipine erik
- Begonia pearcei — Pirsan mamankündled
- Begonia rex — Kunigazližed mamankündled (sišpäi om sätud enamba mi 500 honuzkazmusiden sortud)
- Begonia semperflorens — Igähižänikoičijad mamankündled
- Begonia veitchii — Veičan mamankündled
Homaičendad[vajehta | vajehtada tekst]
- ↑ Mamankündližed old.bigenc.ru-saital. (ven.)
- ↑ Gynelle Leon. Begonia Maculata 'Wightii' //Plant: House plants: choosing, styling, caring (Honuzkazmused: valičend, stilizuind, holituz). — Octopus, 2021-04-01. — 317 lp. (angl.) ISBN 978-1-78472-766-6
 |
Mamankündled Vikiaitas |