Trabzon

**Trabzon**
Valdkund	Turkanma
Eläjiden lugu (2024)	330,836 ristitud
Pind	235 km²
Pämez'	Ahmet Metin Genč; (sulaku 2024—,; Ahmet Metin Genç)
Telefonkod	+90-(0)462
Aigvö	UTC+3

Trabzon (mugažo turkan kelel, virktas [ˈtɾabzon], armen.: Տրապիզոն Trapizon), ende mugažo Trapezund (grek.: Τραπεζούντα) om lidn da meriport Turkanman pohjoižpäivnouzmas. Se om Trabzonan agjan administrativižeks keskuseks da palaks.

Istorii

Eländpunktan aluz om pandud läz 756. vot EME. Se oli Amuižen Grekanman kolonii Τραπεζοῦς-nimitusenke (Trapedzous), Evsevii Kesarijalaine-istorikan mödhe.

Trabzon šingotase meriportal i turizmal. Kaivuztegimišton edheotandad oma ezilidnoiš, sadas nenid metalloid: vas'k, cink, hobed, raud, marganc. Sijaližed ančousad (sel'din toižend) kulutadas äiluguižiš restoranoiš, kazvatadud mecpähkmed i čajud lähttas portan kal't.

Geografijan andmused

Lidn sijadase agjan pohjoižes, Mustmeren randal, 50 m ü.m.t. keskmäižel korktusel, Kolat-Dag-mägen pohjal (3410 m).

Klimat om subtropine valdmeren, pil'vekaz vodes läbi, tal'vaigan eriližešti. Voden keskmäine lämuz om +15,2 C°, heinkun-elokun +23,8..+24,4 C°, kezakun +20,9 C°, sügüz'kun +21,1 C°, tal'vkun-keväz'kun +7,5..+9,5 C°. Kaikiš lujemb pakaine oleskeli −7,4 C° (viluku, uhoku), räk pil'veses — +38,2 C° (semendku, eloku, sügüz'ku). Kezaaigan minimum om +9,2 C° (kezaku), tal'vaigan maksimum om +30,1 C° (uhoku). Ei voi panda halad semendkus-redukus, toižiš kuiš voib harvoin. Paneb sadegid 902 mm vodes, enamba redukus-vilukus (89..134 mm kus), minimum heinkus (35 mm). Kun keskmäine relätivine nepsuz vajehtase 68..70 % röunoiš kül'mkus-uhokus, 73..77 % toižiš kuiš.

Tobmuz

Vspäi 2014 agjan keskuzrajonan turkan oficialine nimituz om Ortahisar.

Lidnan tobmuden pämez' om municipalitetan mer (turk.: Trabzon Büyükşehir Belediye Başkanı vspäi 2014). Edeližed merad oma Murat Zorluoglu (Murat Zorluoğlu, sulaku 2019 — sulaku 2024), Orhan Fevzi Gümrükčüoglu (Orhan Fevzi Gümrükçüoğlu, sulaku 2009 — sulaku 2019).

Eläjad

Vn 2011 Turkanman rahvahanlugemižen mödhe lidnan eläjiden lugu oli 305,231 ristitud. Kaik 317,520 eläjad oli lidnas vl 2018. Kaikiš suremb ristitišt om nügüd'. Läz 800 tuhad eläjid om ezilidnoidenke, ned oma kaik Trabzonan agj faktižikš. Vspäi 2011 lugetas agjan kaikid eläjid lidnalaižikš.

Pontan grekalaižiden kund eläb lidnas, no heišpäi vaiše vanhad ristitud pagištas ičeze kelel.

Irdkosketused

Lidnan da agjan oficialine sait (trabzon.bel.tr). (turk.)

Trabzon Vikiaitas