Vezul'

Vezul'
Vesoul

Lidnanznam
Valdkund	Francii
Eläjiden lugu (2023)	15,078 ristitud
Pind	9,07 km²
Pämez'	Alen Kretjen (keväz'ku 2012—, mandat 2026−2032, Alain Chrétien)
Telefonkod	+33−384
Aigvö	tal'vel UTC+1, kezal UTC+2

Lidnan kart (2015) jagandanke fartaloikš

Vezul' (franc.: Vesoul [vəzul]) om lidn Francijan päivnouzmas, Burgundii — Franš-Konte-regionan pohjoižpäivnouzmas. Se om Üläson-departamentan administrativine keskuz i kaikiš suremb municipalitet eläjiden lugun mödhe.

Istorii

Eländpunkt mainitase ezmäižen kerdan vn 899 dokumentas Castrum Vesulium-nimenke (Vezulii-lidnuz). Se varmitez om saudud La Motte-kukhal (375 m ü.m.t.) i nügüd'aigan formiruib lidnan keskuzpalad. Lidn om Francijan palaks rattemata vspäi 1678. 15.-18. voz'sadoiden sauvused oma kaičenus lidnan vanhas palas.

Vezul' šingotase Peugeot-kompanijan (nüg. Stellantis-kompanijan pala) avtopaloiden tegimel. Lidn om departamentan opendusen keskuseks. Azijan kinon rahvahidenkeskeine jogavozne festival' (franc.: Le Festival international des cinémas d'Asie, FICA) oleleb Vezuliš vspäi 1995, se om nedalin hätkte vilukus-keväz'kus.

Geografijan andmused

Lidnan sijaduz valdkundas vn 2011 kartal

Lidn sijadase departmentan keskuses, Düržon-jogen randal (franc.: Durgeon 42 km pitte, Sonan ližajogi), Kolombin-jogen lanktendanno sihe huralpäi (franc.: Colombine 31 km pitte), 213..378 m ü.m.t. korktusil.

Klimat om ven kontinentaližen röunal. Voden keskmäine lämuz om +11,5 C°, kezakun-elokun +18,6..+20,6 C°, tal'vkun-uhokun +2,9..+3,9 C°. Ekstremumad oma −22,2 C° (viluku) i +40,5 C° (heinku, eloku). Kezaaigan minimum om +0,5 C° (kezaku), tal'vaigan maksimum om +23,0 C° (uhoku). Ei voi panda halad kezakus-elokus vaiše. Paneb sadegid 1008 mm vodes, läz tazomäras kuidme (69..98 mm), enamba semendkus (98 mm) i redukus-tal'vkus (95..98 mm kus), vähemba uhokus-sulakus (69..72 mm kus). Voib panda lujid vihmoid ühtes päiveses (100 millimetrhasai).

Lidnan kart ezilidnoidenke (2012)

Eläjad

Vl 2014 lidnan ristitišt oli 15,212 eläjad. Kaik 14,914 eläjad oli lidnas vl 2019. Kaikiš suremb ristitišt oli 18,412 eläjad vl 1982. Kaik 59 tuhad eläjid om lidnaglomeracijas, kogoneb 78 municipalitetaspäi (2014).

Openduz

Lapsiden opendusen aluzkundad oma kahesa nimitadud päivkodid i seičeme nimitadud augotižškolad.

Professionaližen opendusen aluzkundad oma viž kolledžad (niišpäi nell' oma valdkundaližed i üks' privatine), koume liceid i kaks' keskopendusen kolledžad. Üläopendusen aluzkundoiden nell' palakundad ratas lidnas: tehnologine, opendajiden, babičijoiden, ohjandusen da kommercijan.

Irdkosketused

• Lidnan oficialine sait (vesoul.fr). (fr.)