Vezul'

Vezul'
Vesoul

Lidnanznam
Valdkund	Francii
Eläjiden lugu (2019)	14,914 ristitud
Pind	9,07 km²
Telefonkod	+33−384
Aigvö	tal'vel UTC+1, kezal UTC+2

Lidnan kart ezilidnoidenke

Vezul' (franc.: Vesoul [vəzul]) om lidn Francijan päivnouzmas, Burgundii — Franš-Konte-regionan pohjoižpäivnouzmas. Se om Üläson-departamentan administrativine keskuz i kaikiš suremb municipalitet eläjiden lugun mödhe.

Istorii

Eländpunkt mainitase ezmäižen kerdan vn 899 dokumentas Castrum Vesulium-nimenke (Vezulii-lidnuz). Se varmitez om saudud La Motte-kukhal (375 m ü.m.t.) i nügüd'aigan formiruib lidnan keskuzpalad. Lidn om Francijan palaks rattemata vspäi 1678. 15.-18. voz'sadoiden sauvused oma kaičenus lidnan vanhas palas.

Vezul' šingotase Peugeot-kompanijan (nüg. Stellantis-kompanijan pala) avtopaloiden tegimel. Azijan kinon rahvahidenkeskeine jogavozne festival' (franc.: Le Festival international des cinémas d'Asie, FICA) oleleb Vezuliš vspäi 1995, se om nedalin hätkte vilukus-keväz'kus.

Geografijan andmused

Lidn sijadase departmentan keskuses, Düržon-jogen randal (franc.: Durgeon 42 km pitte, Sonan ližajogi), Kolombin-jogen lanktendanno sihe huralpäi (franc.: Colombine 31 km pitte), 213..378 m ü.m.t. korktusil.

Klimat om ven kontinentaližen röunal. Voden keskmäine lämuz om +11,2 C°, kezakun-elokun +18..+20 C°, tal'vkun-uhokun +2..+4 C°. Ekstremumad oma −22,2 C° i +40,5 C°. Paneb sadegid 1050 mm vodes, kuidme 74..104 mm.

Eläjad

Vl 2014 lidnan ristitišt oli 15 212 eläjad. Kaikiš suremb ristitišt oli 18 412 eläjad vl 1982. Kaik 59 tuhad eläjid om lidnaglomeracijas, kogoneb 78 municipalitetaspäi (2014).

Severz'-se üläopendusen aluzkundoid ratas lidnas.

Irdkosketused

• Lidnan oficialine sait (vesoul.fr). (fr.)