Visbü

Visbü
Visby
	Lidnanznam;
Valdkund	Ročinma
Eläjiden lugu (2020)	24,951 ristitud
Pind	14,53 km²
Telefonkod	+46-(0)498
Aigvö	tal'vel UTC+1,; kezal UTC+2

Visbü (roč.: Visby [ˈvǐːsbʏ]) om Ročinman Ganzan lidn Gotland-sarel, sen agjan da üks'jäižen kommunan administrativine keskuz.

Istorii

Eländpunkt mainitase ezmäižen kerdan vl 900. Nimituz znamoičeb «pühäandoiden külä» amuižskandinavijan kelel. Oli järedaks keskaigan. Vll 1361−1645 lidn oli Danijan palaks.

Nügüdläine Visbü om populärine turistine čuraduz, sen vanh lidn mülüb UNESCO:n Mail'man jäl'gushe vspäi 1995. Lidnusen sein 3,4 km pitte om kaičenus.

Visbü šingotase meriportal, tulleielektrostancijal, turizmal, penil edheotandoil (seičeme tuhad kompanijoid kaikes agjas), sodavägiden palakundoil. Mail'man ekologižen foruman päfater sijadase lidnas.

Geografijan andmused

Lidnan sijaduz agjas i valdkundas vn 2007 kartal

Lidn sijadase saren päivlaskmas, Baltijan meren randal. Vanh lidn om saudud londuseližes merikaras ümbri kall'oil mouckivespäi. Ehtatim i lendimport ühtenzoittas kontinentanke.

Klimat om ven valdmeren. Tal'v om pehmed, pil'vekaz lujas. Üks' kaikiš päipaštokahiš Ročinman lidnoišpäi kezaaigan, semendkus-heinkus eriližešti. Voden keskmäine lämuz om +7,8 C°, kezakun +14,5 C°, heinkun-elokun +17,1..+17,4 C°, sügüz'kun +13,0 C°, tal'vkun-keväz'kun −0,3..+1,8 C°. Ekstremumad oma −22,2 C° (tal'vku) i +33,7 C° (heinku). Kezaaigan minimum om −0,3 C° (kezaku), tal'vaigan maksimum om +12,5 C° (tal'vku). Ei voi panda halad heinkus-elokus vaiše (heinkun minimum om +4,1 C°). Paneb sadegid 533 mm vodes, enamba heinkus-tal'vkus (48..61 mm kus), vähemba keväz'kus-semendkus (25..29 mm kus).

Eläjad

Vl 2005 lidnan eläjiden lugu oli 22 236 ristitud 12,08 km² pindal. Kaikiš suremb lidnan ristitišt om nügüd', otab agjan nelläd ühesandest.

Uppsalan universitetan Gotland-kampus radab lidnas vspäi 2013, sen aluz om pandud kut erigoittud Gotlandan universitetine kolledž vl 1998 (2,5 tuh. üläopenikoid vl 2009).