Mine sisu juurde

Šeksn (Šeksnan rajon)

Vikipedii-späi
Šeksn
Шексна
 Lidnanznam
 Flag
Valdkund Venäma
Eläjiden lugu (2023) 16,048 ristitud
Pind 14,65 km²
Šeksn Шексна
Pämez' Anatolii Prokopjev
(2016—)
Telefonkod +7−81 751-xx-xxx
Avtokod 35
Aigvö UTC+3 (MSK+0)


Šeksn (ven.: Шексна́) om Venäman lidnanvuitte žilo Vologdan agjan päivlaskman suves. Se om Šeksnan rajonan administrativine keskuz da kaikiš suremb eländpunkt, mugažo Šeksnan lidnankundan üks'jäine eländpunkt.

Šeksn om agjan videnz' surtte eländpunkt, seižub raudten, avtoten (A114) da veziten läbitusen sijas.

Eländpunkt mainitase ezmäižen kerdan 16. voz'sadan aigkirjoiš kuti Nikol'skoje-žilo (ven.: село Никольское). Vl 1954 se sai lidnanvuiččen žilon statusad i nimitihe sidä nügüdläižikš. Vspäi 1965 žilo kändihe uden rajonan administrativižeks keskuseks.

2000-nzil vozil zavottihe täutta industriališt Šeksn-zonad päivlaskmha žilospäi.

Geografijan andmused

[vajehta | vajehtada lähtetekst]

Žilo sijadase rajonan keskuzpalas, pidust' Volgan-Baltijanmeren vezited, ühtennimižen jogen hural randal da sen huran Ugl-ližajogen oiktal randpolel, mugažo Šeksnan vezivaradimen hural randal.

Matkad Vologdan keskushesai om 79 kilometrad päivnouzmha orhal, 86 km avtotedme. Lähembaine lidn om Čerepovec, 34 kilometrad päivlaskmha orhal vai 54 km avtotedme.

Klimat om ven. Voden keskmäine lämuz om +2,6 C°.

Šeksnan eländfartalad jagasoiš kahteks tarhaks: Šeksn-keskuz (Šeksn-1) da Šeksn-pohjoine (Šeksn-2). Avtotesild, Tön-ird (ven. улица Труда) da Šossejine-ird (улица Шоссейная) ühtenzoittas niid[1].

Šeksnan sijaduz rajonas vn 2020 municipalitetoiden kartal

Šeksnan lidnankund om sätud vn 2005 elokun 18. päiväl. Sen pind om 14,65 nellikkilometrad.

Lidnankundan päkäskuz om vahvištadud vl 2005[2], se om väges nügüd' äiluguižidenke vajehtusidenke.

Kaik om viž valičendtarhad lidnankundas. Sen Nevondkund (ven.: Совет поселения) kogoneb 15 deputataspäi. Valitihe heid järgenduseližen kerdan vn 2013 sügüz'kun 8. päiväl[3]. Deputatoiden valdatusiden strok om viž vot. Anatolii Prokopjev radab sen ezimehen — lidnankundan pämehen vn 2016 kezakun 28. päivän valičendoiden jäl'ghe lidnankundan Nevondkundas sen deputatoišpäi, tegeškanzi radnikuzvelgusiden mödhe sil-žo vodel heinkun 4. päiväl. Varapämez' om hänele abhu.

Lidnankundan Administracijan südäin om väges vn 2016 sügüz'kuspäi: administracijan pämez', varapämez', nell' palakundad, kaik om 16 radnikad[4].

Vn 2002 Venäman rahvahanlugemižen mödhe žilon eläjiden lugu oli 21 615 ristitud, vl 2010 — 16 890 ristitud, vn 2021 — 16 246 ristitud. Kaik 18 872 eläjad oli žilos vl 2017. Kaikiš suremb žilon ristitišt oli 21 744 eläjad vl 2009. Rajonan ristitišton koume videndest eläb Šeksnas.

Vspäi 1804 ortodoksižen hristanuskondan üks' jumalanpert' om žilos, se om Jumalanmaman Kazanin jumalaižen pühäpert', enččel — Nikolai-čudonsädajan pühäpert' Ustje-Ugol'skojes. Sen udessündutamine vedase vspäi 2013.

Lapsiden opendusen aluzkundad oma nell' nimitadud päivkodid, kaks' keskškolad (Ustje-Ugol'skojen i nomer 1 A.M. Kalinin-admiralan nimed), specialine škol, lapsiden sädamižen keskuz, čomamahtoiden škol, sportškol. Žilon da rajonan istorijan keskuz i keskuzkirjištsistem oma avaitud žilos. Professionaližen opendusen aluzkund om Čerepovecan äiprofil'žen kolledžan filial.

Ižanduz da transport

[vajehta | vajehtada lähtetekst]

Ižandusen sarakod oma:

  • pumaterialan süvä ümbriradmine;
  • pusauvondmaterialiden pästand (komplektad pertid sauvomha);
  • metalltorviden erazvuiččen profilän pästand;
  • sömtegimišt (konditerine «AtAg»-fabrik, argvoin tegim, leibproduktoiden kombinat, rajonan sömkombinat, lindfabrik jogen vastrandal läz Nifantovo-žilod);
  • gidroenergetik (Šeksnan GES);
  • gazanveimtransport (Gazprom Transgaz Uhta-edheotandan KS-21).

Edel 2010. vot pöl'vhanümbriradai tegim radoi mugažo, om likvidiruidud.

«Vologd — Uz' Ladog»-avtote (A114-trass) läbitab žilod, jagab sidä kaks'haz. Raudtestancii da jogiport ratas žilos.

  1. Генеральный план городского поселения посёлок Шексна («Šeksn-žilo»-lidnankundan generaline plan). — Šeksnan lidnankundan oficialine sait (adm-sheksna.ru). (ven.)
  2. Устав городского поселения посёлок Шексна («Šeksn-žilo»-lidnankundan päkäskuz). — Šeksnan lidnankundan oficialine sait (adm-sheksna.ru). (ven.)
  3. Выборы депутатов Совета городского поселения посёлок Шексна Шекснинского муниципального района (Šeksnan lidnankundan Nevondkundan deputatoiden valičendad, Šeksnan municipaline rajon). — Tedod mänijoiš valičendoiš da referendumiš (vybory.izbirkom.ru) // Venälaižen Federacijan keskuzline valičemižlaudkund. (ven.)
  4. Структура администрации городского поселения посёлок Шексна («Šeksn-žilo»-lidnankundan Administracijan südäin). — Šeksnan lidnankundan oficialine sait (adm-sheksna.ru). (ven.)