Šeksnan rajon

Šeksnan rajon
Шекснинский район

Znam	Flag
Valdkund	Venäma
Administrativine keskuz	Šeksn
Eläjiden lugu (2015)	33,211 ristitud
Pind	2,528 km²

Šeksnan rajon (ven.: Шекснинский район) om rajon Vologdan agjas.

Administrativine keskuz om lidnanvuitte Šeksn-žilo (rajonan ristitišton kaks' koumandest).

Istorii

Rajonan aluz om pandud vl 1965 vilukun 12. päiväl.

Geografijan andmused

Šeksnan rajon om Vologdan agjan suvine taho. Pind — 2 528 nellikkilometrad.

Om röunoid 4 Venäman rajonanke:

• päivnouzmas Vologdan agjan Vologdan rajonanke;
• suves Jaroslavlin agjan Pošehonjen rajonanke;
• suvipäivlaskmas da päivlaskmas Vologdan agjan Čerepovecan rajonanke;
• pohjoižes Vologdan agjan Kirillovan rajonanke.

Kaikiš surembad vezištod oma Šeksnan da Ribinskan vezivaradimed, ned mülüdas rajonha vaiše penil paloil. Šeksnan GES om röunaks niiden keskes. Mec otab rajonan territorijan viž ühesandest (1429 km²), sišpäi kavag'mec om pol'.

Londuseližed varad oma turbaz, sauvondmaterialad (letked, saved, gravii), mec, reskvezi, gidroenergii.

Vs 2015 kezakun 1. päiväspäi rajonan territorii alajagase 8 küläkundaks da 2 lidnkundaks (lidnanvuitte Šeksn-žilo da Čöbsar-žilo).

Tobmuz

Vs 2014 kezakun 29. päiväspäi Jevgenii Bogomazov om valitud i radab rajonan da sen administracijan pämehen. Viž ohjandust alištudas sihe.

Käskusenandai tobmuz om Ezitajiden Suim (19 ezitajad). Järgvaličendad sihe oliba vl 2015 sügüz'kun 13. päivän. Nikolai Sitnikov radab sen ezimehen vs 2012 keväz'kuspäi kahtenden strokun.

Eläjad

Vn 2010 Venäman rahvahanlugemižen mödhe eläjiden lugu oli 35 194 ristitud.

Kaik om 376 eländpunktad rajonas, sidä kesken üks' lidnanvuitte žilo, kaks' muite žilod, 372 küläd da 1 raudtesarak.

Toižed järedad eländpunktad oma Nifantovo-külä (2,7 tuh. rist. vl 2010) da Čöbsar-žilo (1,4 tuh. rist. vl 2012).

Ižanduz

Rajonan ižandusen päsarakod oma:

• mecan süvä ümbriradmine,
• metalltorviden erazvuiččen profilän pästand,
• jogi-, raudte- da gazanveimtransport,
• sauvondmaterialiden samine da tehmine (pilindmaterialad, cement),
• maižanduz da sömtegimišt,
• pölvhan ümbriradmine da omblendtegimišt,
• turizm.

Irdkosketused

• Šeksnan rajonan administracijan oficialine sait (sheksnainfo.ru). (ven.)
• Tedod rajonas agjan oficialižes vologda-oblast.ru-portalaspäi. (ven.) (angl.)