Babuškinan ümbrik (Vologdan agj)

Babuškinan ümbrik
Бабушкинский округ
Znam;	Flag;
Valdkund	Venäma
Administrativine keskuz	Babuškinan nimed žilo
Eläjiden lugu (2023)	9,641 ristitud
Pind	7,760,5 km²

Babuškinan ümbrik (ven.: Ба́бушкинский о́круг) om ümbrik (edel vn 2022 kezakud — rajon) Venäman Vologdan agjas.

Administrativine keskuz om Babuškinan nimed žilo.

Istorii

Ümbrikon aluz om pandud kut rajon vn 1929 15. päiväl heinkud Pohjoižen randan Vologdan ümbrikho kut Ledengan rajon Leden'gskoje-külän keskuseks. Vn 1930 30. päiväl heinkud heittihe ümbrikod, i voden 1936 tal'vkun 5. päivhäsai rajon mülüi Pohjoižhe randha kut administrativine ühtnik. Vozil 1936−1937 oli Pohjoižen agjan palaks.

Vn 1937 sügüz'kun 23. päiväspäi rajon mülüb Vologdan agjaha. Vn 1941 26. päiväl uhokud udesnimitihe rajonad da sen keskust Ivan Babuškin-revolücioneran oiktastuseks. Vn 1960 kül'mkun 12. päiväspäi enččen Roslätinon rajonan territorijan pala om ühtnenu Babuškinan rajonanke. Vozil 1963−1964 Babuškinan rajonan territorii mülüi Tot'man rajonha pordaigaižikš. Ümbrik om olmas nügüdläižiš röunoiš vspäi 2006.

Geografijan andmused

Babuškinan ümbrik sijadase agjan päivnouzmas. Pind — 7 760,5 nellikkilometrad. Mecad ottas territorijan 89 % (6913 km²). Koskmatoi taig (kavag'mec — kuz', pedai) om enambuses.

Om röunoid kudenke Venäman ümbrikonke i rajonanke:

päivnouzmas Vologdan agjan Nikol'skan ümbrikonke;
suvipäivnouzmas Kostroman agjan Kologrivan rajonanke;
suvipäivlaskmas Kostroman agjan Čuhloman rajonanke;
päivlaskmas da lodehes Vologdan agjan Tot'man ümbrikonke;
pohjoižes Vologdan agjan Nüksenican ümbrikonke;
pohjoižpäivnouzmas Vologdan agjan Kičmengan ümbrikonke.

Reljef om kukhikaz tobjimalaz, pened sod oma joga polen. Pohjoižed Uvalad-ülüden päivlaskmaine pala otab ümbrikon territorijad läz täuzin. Znamasižed joged oma: Vanh Tot'm sen Votč- da Ilez-joginiškoidenke i Leden'g, ned mülüdas Suhonan (Jävaldmeren) basseinha; mugažo Unž sen oiktan Juz-ližajogenke, mülüb Volgan (Kaspijan meren) basseinha. Om vähä penid järvid (1 km² penemba pindal). Sod ottas 12 % territorijad.

Londuseližed varad oma turbaz, sauvondmaterialad (letked, saved, gravii), dolomit, keitandsol, mec, reskvezi.

Tobmuz

Vn 2015 kezakun 1. päiväspäi rajonan territorii jagoihe seičemeks küläkundaks. Kaik ned oma kätud ümbrikon territorialižikš palakundoikš vn 2022 kezakuspäi.

Vn 2004 sulakun 4. päiväspäi Aleksandr Sekušin oli valitud i radoi rajonan da sen administracijan pämehen koumanden strokun jäl'geten. Rajonan pämehen järgenduseližed valičendad oliba vl 2008 da vn 2012 4. päiväl keväz'kud, hänen valdatusiden strok oli nell' vot, kaik rahvaz änesti. Kaks' ohjandust alištuiba rajonan administracijale.

Käskusenandai tobmuz om Ezitajiden Suim (ven.: Представительное собрание) 15 ühtnijanke. Kaik rahvaz valičeb heid nelläks vodeks. Järgenduseližed valičendad sihe oliba vn 2012 4. päiväl keväz'kud (videnz' kucund). Vitalii Kolpakov radoi sen ezimehen vl 2015.

Eläjad

Vn 2002 Venäman rahvahanlugemižen mödhe rajonan eläjiden lugu oli 14 994 ristitud, vn 2010 — 12 779 ristitud, vn 2021 — 9 908 ristitud.

Rahvahad (enamba 0,4 % vl 2021): venälaižed — 97,5 %, toižed rahvahad — 1,4 %, rahvahuden ozutandata — 1,1 %.

Kaik om 125 eländpunktad ümbrikos, niiden kesken 17 žilod da 108 küläd. Niišpäi 37 eländpunktad seištas kaikenaigažeta ristitištota. Toine sur' eländpunkt om Min'kovo-žilo (1,0 tuh. rist. vl 2009).

Ižanduz

Ümbrikon ižandusen päsarakod oma mecan varhapanend da ümbriradmine pilindmaterialoihe, sömtegimišt da maižanduz, turizm.

Homaičendad

Irdkosketused