Volg

Volg vai Volg-jogi (ven.: Волга [ˈvoɫɡə], mokš. i erz.: Рав, nitmar.: Юл, čuv.: Атӑл, tot.: Идел, kalm.: Иҗил-һол) om jogi Venäman päivlaskmas.

Se om kaikiš pidemb jogi Evropas, sen kaikiš suremb basseinan pindan i vedhuden mödhe. Jokseb Päivnouzmaižedme Evropan alangištodme, keskjoksmuses — siriči Volgaveren ülüdes. Lankteb Kaspijan merhe. Volg om kaikiš suremb jogi mail'mas, kudamb lankteb vedhudetomha vezištho.

Ühthižed andmused

Jogi om 3 530 km pitte (nellänz' Venämas), basseinan pind om 1,361,000 km², vozne vedhuz — 254 km³. Kaik 151 vezivalud formiruidas jogen basseinad, niiden ühthine piduz om 574 tuh. km. Purde sijadase Valdain ülüdel sos penenno Volgoverhovje-külänno 228 m ü.m.t. läz Tverin agjan päivlaskmašt röunad. Volg kändase laivjogeks Rževas (Tverin agj) da mödvedhe sišpäi. Läz 200 ližajoged lanktas Volgha. Znamasine ližajogi om langenii huralpäi Kam. Volg sädab del'tad (suhištod) lanktes Kaspijha −28 m ü.m.t. korktusel.

Amuižes aigaspäi kävutihe Volgad torguindteks. Ivan Grazii ühtišti jogen randoid ühtes valdkundas 16. voz'sadan lopus, sen jäl'ghe torguind jogedme eli korktas aigas läbi. Nened järedad lidnad sijadasoiš jogen randal (mödvedhe, enamba 100 tuh. eläjid): Tver', Ribinsk, Jaroslavl', Kostrom, Alauz'lidn, Čeboksarad, Novočeboksarsk, Kazan', Ul'janovsk, Tol'jatti, Samar, Sizran', Balakovo, Saratov, Engel's, Kamišin, Volžskii, Volgograd, Astrahan'.

Volgan üläjoksmuz vedase purtkespäi Okan lanktendhasai, keskjoksmuz märičese Okan suspäi Kaman suhusai, alajoksmusen veded oma Kaman lanktendaspäi Kaspijan merhesai^[1].

Vezivaradimed

Nevondkundaližen aigan 1930−1980-nzil vozil vezivaradimiden da kahesan gidroelektrostancijan kaskad om saudud jogel sen ližajodigenke. Vezivaradimed (mödvedhe): Ivan'kovon, Ribinskan, Gor'kijan, Čeboksaran, Kuibiševan, Saratovan, Volgogradan. Ühtenzoitase Don-jogenke kanalal vspäi 1952.

Homaičendad

↑ Россия. Большой лингвострановедческий словарь (Venäma. Sur' kelen- da mantedon vajehnik) / Ju. Je. Prohorovan ühthižen redakcijan al. — M.: AST-Press Kniga, 2007. — Lp. 107. — 736 lp. — ISBN 978-5-462-00590-9. (ven.)

Irdkosketused

Volg-jogen ümbrikirjutand da ekologižed problemad greenologia.ru-saital. (ven.)

Volg Vikiaitas

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.

[1] Россия. Большой лингвострановедческий словарь (Venäma. Sur' kelen- da mantedon vajehnik) / Ju. Je. Prohorovan ühthižen redakcijan al. — M.: AST-Press Kniga, 2007. — Lp. 107. — 736 lp. — ISBN 978-5-462-00590-9. (ven.)

[1]