Balakovo

Balakovo
Балаково
	Lidnanznam;
Valdkund	Venäma
Eläjiden lugu (2025)	180,694 ristitud
Pind	79 km²
Pämez'	Leonid Rodionov; (reduku 2022—)
Telefonkod	+7−8453-xxx-xxx
Avtokod	64, 164
Aigvö	UTC+4 (MSK+1)

Balakovo (ven.: Балако́во) om Venäman lidn da lidnankund Saratovan agjan pohjoižpäivnouzmas. Se om Balakovon rajonan administrativižeks keskuseks da palaks.

Istorii

Eländpunktan aluz om pandud vl 1762 kuti vanhuskolaižiden žilo ühten aigan Irgizan jumalankodidenke. Žilo sai lidnan statusad vn 1911 semendkus. Balakovo lugese ujelimtraktoran i Venäman dizel'likutimen sündundan sijaks.

Saratovan GES om saudud vll 1956−1971. Balakovon AES radab vspäi 1985. Lidn šingotase himižen sarakon edheotandoil (apatit, kuidmaterialad, hil'nikkuid, tehnine räzin), mašiništonsauvomižel (vagonad, dizel'likutimed) i sömtegimištol, sauvondmaterialiden tegimil (teraztorviden vanundtegim, beton, konstrukcijad elektromontažan täht), mugažo mebel'fabrik radab.

Geografijan andmused

Lidn sijadase rajonan lodehliženno röunanno, Volgan hural randal Saratovan vezivaradimen lopus, GES:an padosein om lidnas, 25 m ü.m.t. keskmäižel korktusel, Volgan Sur' Irgiz-ližajogen oiktal randpolel.

Matkad Saratovhasai om 134 km suvipäivlaskmha orhal, 180 km avtotedme vai raudtedme. Lähembaine lidn om Vol'sk koumekümnes kilometras päivlaskmha orhal i Volgadme vai 49 km avtol.

Klimat om ven kontinentaline kuivahk. Voden keskmäine lämuz om +6,9 C°, semendkun +16,9 C°, kezakun-elokun +20,8..+22,7 C°, tal'vkun-uhokun −6,4..−10,2 C°. Ekstremumad oma −35 C° (uhoku) i +44,1 C° (heinku). Paneb sadegid 431 mm vodes, läz tazomäras kuidme, enamba vilukus (50 mm) i kezakus (40 mm), vähemba semendkus (28 mm) i elokus (27 mm).

Tobmuz

Balakovo om lidnankundan (municipaližen ühtnikan) üks'jäižeks eländpunktaks.

Lidnan pämez' om sen Nevondkundan ezimez'. Edeližed lidnan pämehed oma Roman Irisov (sügüz'ku 2018 — reduku 2022), Aleksandr Ovsännikov (sügüz'ku 2013 — sügüz'ku 2018). Lidnan erigoittud Administracii om likvidiruidud vn 2014 heinkus.

Eläjad

Vn 2010 Venäman rahvahanlugemižen mödhe lidnan eläjiden lugu oli 199 690 ristitud, rajonan ühesa kümnendest, vn 2021 — 184 466 ristitud. Kaik 191 260 eläjad oli lidnas vl 2017. Kaikiš suremb lidnan ristitišt oli 206..208 tuhad vozil 1994−2001 (208 000 rist. vll 1995, 1996 i 1998).

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkundad: medkolledž^[1], Volgaverine tehnologijoiden da menedžmentan kolledž, koume tehnikumad (politehnine^[2], tegimištoliž-transportine^[3], gubernatorine avtoelektromehanine^[4]), üläopendusen aluzkundoiden koume filialad (Moskv, Saratov).

Galerei

Administracijan sauvuz (2012)
«Balakovo»-adivpert' (2012)
Eläban Eziauguižen Stroican jumalanpert', vn 2014 nägu
Balakovon AES vl 2008
Saratovan GES vl 2011
Jogiškol (2013, ende kommertine škol)
«Raduga»-kul'turkeskuz (2015, Jumalanbembel', ende Mahuncevad-velliden torguindkeskuz)
Ivan Mamin-melestegijan da edheotajan usadib (2015)
Paisii Mal'cev-torgovanan erižpert'-muzei (2021)

Homaičendad

Irdkosketused

Lidnan tobmuden aluzkundoiden oficialine sait (mo-balakovo.ru). (ven.)

Balakovo Vikiaitas

	Saratovan agjan lidnad
	Arkadak \| Atkarsk \| Balakovo \| Balašov \| Engel's \| Hvalinsk \| Jeršov \| Kalininsk \| Krasnii Kut \| Krasnoarmeisk \| Marks \| Novouzensk \| Petrovsk \| Pugačov \| Rtiščevo \| Saratov \| Šihani \| Vol'sk

[1] Balakovon medicinižen kolledžan sait (balmk.ru). (ven.)

[2] Balakovon politehnižen tehnikuman sait (bpt-balv.ru). (ven.)

[3] Balakovon tegimištoliž-transportižen tehnikuman sait (bptt.profiedu.ru). (ven.)

[4] Gubernatorižen avtoelektromehanižen tehnikuman sait (gaemt.ru). (ven.)

[1]

[2]

[3]

[4]