Vol'sk

Vol'sk
Вольск
	Lidnanznam;
Valdkund	Venäma
Eläjiden lugu (2025)	52,825 ristitud
Pind	147,92 km²
Pämez'	Svetlana Frolova; (tal'vku 2021—)
Telefonkod	+7−84 593-xx-xxx
Avtokod	64, 164
Aigvö	UTC+4 (MSK+1)

Vol'sk (ven.: Вольск) om Venäman lidn da lidnankund Saratovan agjan pohjoižes. Se om agjan videnz' lidn eläjiden lugun mödhe, Vol'skan rajonan administrativine keskuz da pala.

Istorii

Eländpunkt mainitase ezmäižen kerdan vl 1699 kuti Malikovskai-slabad (ven.: слобода Малыковская). Slabad sai makundan lidnan statusad Volgsk-nimitusenke vl 1780. Lidnan nimi kändihe nügüdläižeks aigan mändes.

Vol'sk šingotase mehanižel tegimel (tankanvastaižed raketkompleksad), cementan tehmižel, sömtegimištol (maidproduktad, olud, südäiveded).

Geografijan andmused

Lidn sijadase rajonan suviröunan keskusel, Volgan oiktal randal, 90 m ü.m.t. keskmäižel korktusel.

Lähembaižed lidnad oma Šihani kümnes kilometras lodeheze orhal Vol'skan päpalaspäi, 15 km avtotedme vai raudtedme, i Balakovo koumekümnes kilometras päivnouzmha orhal i Volgadme, 49 km avtol vai raudtel. Vol'sk-1-raudtestancii radab sarakol Vol'sk-2-stancijaspäi.

Tobmuz

Kaik nell' žilod mülüdas lidnha, Vol'sk lugese lidnankundan üks'jäižeks eländpunktaks. Lidnankundan pind — 147,92 km².

Lidnan tobmuden pämez' om sen Nevondkundan ezimez'. Edeline Nevondkundan ezimez' om Maksim Kuznecov (sügüz'ku 2018 — eloku 2021).

Eläjad

Vl 1939 lidnan ristitišt oli 56 100 eläjad. Vn 2010 Venäman rahvahanlugemižen mödhe lidnan i lidnankundan eläjiden lugu oli 66 508 ristitud, vn 2021 — 55 035 ristitud. Kaik 63 947 eläjad oli lidnas vl 2017. Kaikiš suremb lidnan ristitišt oli 67..71 tuhad eläjid vll 1967−1976 i 1998−2009 (71 tuh. rist. vl 1973 i 71 124 rist. vl 2002).

Rahvahad (ozutadud rahvahudenke vl 2010): venälaižed — 93,2 %, totarlaižed — 1,3 %, armenijalaižed — 1,2 %, ukrainalaižed — 1,2 %, toižed rahvahad — 3,1 %.

Ortodoksižen hristanuskondan ühesatoštkümne pühäpertid^[1] oma kaičenus i saudud lidnas: Eläban Eziauguižen Stroican päjumalanpert' (uz', om letud vll 2004−2009), Jumalanmaman Vladimiran jumalaižen päjumalanpert' (uz', om saudud vll 2014−2016), kahesa jumalanpertid, viž pühähonusid pertiš i nell' časounäd. Islaman pühäpert' om avaitud lidnas 19. voz'sadan keskespäi.

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkundad: Vol'skan tehnologine^[2], pedagogine^[3] i medicinine^[4] kolledžad, materialižen varmitusen üläsodaškol.

Galerei

Vol'skan rajonan administracijan sauvuz (2021)
Eläban Eziauguižen Stroican päjumalanpert', vn 2009 nägu
«Cement»-adivpert' (2002, istorine Adivpertin tanaz)
Adivpert' (2012, ende bank, makundan ohjandusen pert')
Lapsiden čomamahtoiden škol nomer 1 (2012, ende rahvahaline kirjišt)

Homaičendad

Irdkosketused

Lidnankundan lehtpoled rajonan oficialižel вольск.рф-saital. (ven.)

Vol'sk Vikiaitas

	Saratovan agjan lidnad
	Arkadak \| Atkarsk \| Balakovo \| Balašov \| Engel's \| Hvalinsk \| Jeršov \| Kalininsk \| Krasnii Kut \| Krasnoarmeisk \| Marks \| Novouzensk \| Petrovsk \| Pugačov \| Rtiščevo \| Saratov \| Šihani \| Vol'sk

[1] Vol'skan pühäpertid sobory.ru-saital. (ven.)

[2] Vol'skan tehnologižen kolledžan sait (vtk64.ru). (ven.)

[3] Vol'skan pedagogižen kolledžan sait (volskvpk.ru). (ven.)

[4] Vol'skan medicinižen kolledžan sait (med-vvolske.ru). (ven.)

[1]

[2]

[3]

[4]