Marks (lidn)

Marks
Маркс
	Lidnanznam;
Valdkund	Venäma
Eläjiden lugu (2021)	28,749 ristitud
Pind	16 km²
Pämez'	Sergei Barulin; (reduku 2023—)
Telefonkod	+7−84 567-xx-xxx
Avtokod	64, 164
Aigvö	UTC+4 (MSK+1)

Marks (ven.: Маркс) om Venäman lidn da lidnankund Saratovan agjan keskuzpalas. Se om Marksan rajonan (edel 1941. vot — kantonan) administrativine keskuz.

Istorii

Eländpunktan aluz om pandud saksalaižil kolonistoil vl 1765 kuti Jekaterinenštadt (saks.: Katharinenstadt) Jekaterina II Sur'-imperatornaižen oiktastuseks. Sil-žo aigal žilon toine nimituz oli Baronsk. Šingotihe tabakon kazvatandal i maižanduzinstrumentoiden tehmižel päpaloin. Vll 1915−1919 eländpunktan nimi oli Jekaterinengrad (ven.: Екатериненград), žilo sai makundan lidnan statusad vn 1918 4. päiväl sulakud. Udesnimitihe Marksštadt:aks (saks. Marxstadt) vn 1919 semendkus Karl Marks-tedomehen kanzannimen mödhe. Vn 1941 28. päiväl elokud tühjitihe Volganrandan saksalaižiden Tazovaldkundad i deportiruihe saksalaižiden kanzoid (lidnan ristitišton 86,3 % vl 1939) toižihe tahondoihe. Vn 1942 semendkun 16. päiväspäi lidn om nügüdläiženke nimitusenke.

Marks šingotase elektrotehnižel Mossar-tegimel^[1] (elektrusen märičimed, kassižed apparatad, tahografad, pidatimed lämuzdiodiden alusel) i sömtegimištol (olud, argvoi, pühävoi).

Geografijan andmused

Lidn sijadase rajonan lodehes, Volgan hural randal, 20 m ü.m.t. keskmäižel korktusel.

Matkad Saratovhasai om 56 km päivlaskmha-suvipäivlaskmha orhal vai 67 km avtotel. Toižed lähembaižed lidnad oma Engel's 49 km suvipäivlaskmha orhal vai 53 km avtotedme, i Vol'sk 58 km pohjoižpäivnouzmha orhal vai 145 km avtotedme. «Saratov — Balakovo»-avtotekeskust läbitab lidnad.

Tobmuz

Marks om lidnankundan (municipaližen ühtnikan) üks'jäižeks eländpunktaks.

Lidnankundan tobmuden pämez' om sen Nevondkundan ezimez'. Edeližed Nevondkundan ezimehed oma Andrei Koštanenkov (reduku 2018 — reduku 2023), Oleg Cibul'skii (tal'vku 2016 — reduku 2018), Jurii Mel'ničonok (radoi vn 2016 tal'vkuhusai).

Eläjad

Vl 1939 lidnan ristitišt oli 16 100 eläjad. Vn 2010 Venäman rahvahanlugemižen mödhe lidnan eläjiden lugu oli 31 531 ristitud, rajonan pol', vn 2021 — 28 749 ristitud. Kaik 31 788 eläjad oli lidnas vl 2017. Lidnan ristitišt vajehtihe 31..33 tuhad eläjid röunoiš vll 1989−2019, kaikiš suremb oli 33 200 eläjad vl 2001.

Rahvahad (2010): venälaižed — 86,8 %, kazahlaižed — 2,8 %, totarlaižed — 2,5 %, ukrainalaižed — 2,3 %, armenijalaižed — 1,1 %, toižed rahvahad — 4,5 %.

Viden religijan pühäpertid oma saudud lidnas: ortodoksižen hristanuskondan (jumalanpert' i časoun'^[2]), evangeliž-lüteranine, riman katoline, mormonoiden loičendpert', islaman pühäpert'.

Lapsiden opendusen aluzkundad oma severz'-se päivkodid, nell' keskškolad (nomer 1, 3, 4, 6), licei, školanirdpol'žen radon keskuz, čomamahtoiden škol. Marksan politehnine kolledž^[3] i Saratovan valdkundaližen agrarižen universitetan filial Marksas^[4] oma lidnan professionaližen opendusen aluzkundoikš.

Galerei

Lidnan administracijan sauvuz (2015)
Lüteranine jumalanpert', vn 2017 nägu
Hristan-kunigahan riman katoline jumalanpert', vn 2009 nägu
Torgusen istorine sauvuz vl 2017
Lapsiden čomamahtoiden škol (2017, ende Sabel'fel'd-edheotajan erižpert')

Homaičendad

Irdkosketused

Lidnan tobmuden oficialine sait (gorodmarks.mo64.ru). (ven.)

Marks (lidn) Vikiaitas

	Saratovan agjan lidnad
	Arkadak \| Atkarsk \| Balakovo \| Balašov \| Engel's \| Hvalinsk \| Jeršov \| Kalininsk \| Krasnii Kut \| Krasnoarmeisk \| Marks \| Novouzensk \| Petrovsk \| Pugačov \| Rtiščevo \| Saratov \| Šihani \| Vol'sk

[1] Mossar-firman sait (npf-mossar.ru). (ven.)

[2] Marksan pühäpertid sobory.ru-saital. (ven.)

[3] Marksan politehnižen kolledžan sait (mpk.nubex.ru) i sen vanh versii (gouspomek.ucoz.ru). (ven.)

[4] Marksan filialan lehtpoled Saratovan valdkundaližen agrarižen universitetan sgau.ru-saital. (ven.)

[1]

[2]

[3]

[4]