Jeršov (lidn)

Jeršov
Ершов

Lidnanznam
Valdkund	Venäma
Eläjiden lugu (2021)	18,095 ristitud
Pind	21 km²
Pämez'	Al'bert Tihov (sügüz'ku 2012—)
Telefonkod	+7−84 564-xx-xxx
Avtokod	64, 164
Aigvö	UTC+4 (MSK+1)

Jeršov (ven.: Ершо́в) om Venäman lidn, lidnankund da raudtesol'm Saratovan agjan päivnouzmas. Se om Jeršovan rajonan administrativine keskuz.

Istorii

Eländpunktan aluz om pandud vl 1893 kuti Jeršov-žilo sauvomha da holitamha raudted. Kätihe rajonkeskuseks vn 1928 kezakus. Sai lidnan statusad vl 1963.

Jeršov šingotase maižanduztehnikan kohendusel i maižanduzinventarin pästandal, raudten edheotandoil (lämuzvedimdepo, vagondepo), sauvondmaterialiden tehmižel (šebin', savičuntegim, betonantegim), sömtegimištol (voitegim, lihakombinat, leibänkombinat, limonadan ceh) i villänpurnuil, mugažo kombisötken tegimel i maižandusen tedoinstitutan kodvindpunktal.

Geografijan andmused

Lidn sijadase rajonan keskuzpalas, Pen' Uzen'-joginiškan hural randal (ven.: Малый Узень 638 km pitte, vedhudetomiden Kamis-Samar järviden bassein), 100 m ü.m.t. keskmäižel korktusel. Pen' Uzen' om ühtenzoittud Saratovan kastelendkanalanke ani pohjoižhe lidnaspäi.

Matkad Saratovhasai om 157 km päivlaskmha orhal, 180 km avtotel vai raudtel. Lähembaižed lidnad oma Novouzensk 99 km suvhe orhal, 123 km avtotedme vai 220 km raudtedme, Krasnii Kut 100 km päivlaskmha-suvipäivlaskmha orhal, 130 km avtotedme vai raudtedme, Balakovo 81 km lodeheze-pohjoižhe orhal, 117 km avtotedme vai 170 km raudtedme, i Pugačov 82 km pohjoižhe-pohjoižpäivnouzmha orhal, 118 km avtotedme vai raudtedme. Jeršov-raudtestancii radab vspäi 1894 «Saratov — Ural'sk — Sol'-Ileck»-keskustal.

Klimat om ven kontinentaline. Voden keskmäine lämuz om +6,1 C°, kezakun-elokun +20,4..+22,5 C°, tal'vkun-uhokun −7,9..−9,9 C°. Paneb sadegid 404 mm vodes, läz tazomäras kuidme, enamba kezakus-redukus (37..45 mm kus), vähemba uhokus-keväz'kus (23..24 mm kus). Kun keskmäine relätivine nepsuz vajehtase 55 procentaspäi elokus 86 procenthasai kül'mkus-tal'vkus.

Tobmuz

Kaik nell' žilod mülüdas lidnankundha (municipaližhe ühtnikho) Jeršovan ližaks: Poludennii (296 rist. vl 2010), Prudovoi (363 rist. sil-žo vodel), Tulaikovo (418 rist.), Učebnii (823 eläjad). Lidnankundan pind — 343,17 km².

Lidnankundan tobmuden pämez' om sen Nevondkundan ezimez'. Lidnan erigoittud Administracii om likvidiruidud vn 2014 vilukus, Tat'jana Ribalkina oli likvidacižen laudkundan ezimehen vn 2013 kezakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 21 448 ristitud, lidnankundan — 23 414 ristitud, rajonan viž ühesandest, vn 2021 lidnan — 18 095 ristitud, lidnankundan — 19 588 ristitud. Kaik 19 590 ristitud elihe lidnas i 21 403 ristitud kaikes lidnankundas vl 2018. Kaikiš suremb lidnan ristitišt oli 24..25 tuhad eläjid vll 1989−2001 (25 600 rist. vl 1996).

Rahvahad (2010): venälaižed — 81,9 %, kazahlaižed — 4,6 %, totarlaižed — 4,1 %, armenijalaižed — 3,9 %, ukrainalaižed — 2,0 %, azerbaidžanlaižed — 1,0 %, toižed rahvahad — 2,5 %.

Ortodoksižen hristanuskondan ph. Mikulai-čudonsädajan jumalanpert' om avaitud (saudihe vll 2011−2015). Islaman mečet' om letud vspäi 2016.

Lapsiden opendusen aluzkundad oma severz'-se päivkodid, viž keskškolad (nomer 1..5), lapsiden sädamižen pert', čomamahtoiden škol, lapsiden da norišton Balkani-sportškol. Jeršovan agrotegimištoline licei om lidnan professionaližen opendusen aluzkundaks.

Irdkosketused

• Lidnan lehtpoled rajonan tobmuden adminemr.ru-saital. (ven.)