Atkarsk

Atkarsk
Аткарск

Lidnanznam	Flag
Valdkund	Venäma
Eläjiden lugu (2021)	22,709 ristitud
Pind	41,58 km²
Pämez'	Valerii Čirkov (eloku 2019—)
Telefonkod	+7−84 552-xx-xxx
Avtokod	64, 164
Aigvö	UTC+4 (MSK+1)

Atkarsk (ven.: Атка́рск) om Venäman lidn da lidnankund Saratovan agjan päivlaskmas. Se om Atkarskan rajonan administrativine keskuz.

Istorii

Eländpunktan aluz om pandud vl 1699 kuti Venäman Jetkar-kaičendpost (ven.: Еткара). Nimitihe jogen mödhe, se om nimitadud totarižen Jetkara-hanan nimen mödhe kuti hänen ulusan pala vl 1358. Vl 1780 Jetkar-slabad sai makundan lidnan statusad nügüdläiženke nimitusenke. Vl 1872 Atkarsk-raudtestancii radab lidnan keskuzpalas «Tambov — Saratov»-keskustal, vspäi 1893 lidn om raudtesol'meks.

Atkarsk šingotase raudten edheotandoil, kaivuzmašiništon pästandal, omblendfabrikal i meblin edheotandal, pühävoin ekstrakcijan tegimel i maionezan cehal senno, villän oigendusel raudtedme.

Geografijan andmused

Lidn sijadase Volgaveren ülüdel, Medvedic-jogen oiktal randpolel (Donan hurapol'ne bassein), ühtes..kahtes kilometras sen randaspäi, Atkar-jogen (ven.: Аткара 106 km pitte) lanktendan sijas Medvedicha, 180 m ü.m.t. keskmäižel korktusel. Atkar-jogi läbitab lidnan suvipalad.

Matkad Saratovhasai om 81 km päivnouzmha orhal, 106 km avtotel vai raudtel. Toižed lähembaižed lidnad oma Kalininsk 55 km suvipäivlaskmha orhal, 78 km avtotedme vai raudtedme, i Petrovsk 54 km pohjoižhe orhal, 88 km avtotedme vai 60 km raudtedme.

Tobmuz

Atkarsk om lidnankundan (municipaližen ühtnikan) üks'jäižeks eländpunktaks.

Edeline lidnan pämez' om Sergei Vladimirov (2014−2019), nügüd' radab rajonan administracijas.

Eläjad

Vn 2010 Venäman rahvahanlugemižen mödhe lidnan eläjiden lugu oli 25 624 ristitud, rajonan koume videndest. Kaik 25 384 eläjad oli lidnas vl 2017. Kaikiš suremb lidnan ristitišt oli 28..29 tuhad eläjid vll 1967−2001 (29 112 rist. vl 1979).

Rahvahad (2010): venälaižed — 92,7 %, čiganalaižed — 2,1 %, totarlaižed — 1,2 %, ukrainalaižed — 1,0 %, toižed rahvahad — 3,0 %.

Ortodoksižen hristanuskondan koume pühäpertid oma saudud lidnas: kaks' jumalanpertid i ph. Mikulai-čudonsädajan časoun' päraudtestancijanno. Islaman pühäpert' om avaitud vspäi 2004.

Atkarskan politehnine kolledž om lidnan professionaližen opendusen aluzkundaks.

Galerei

• 
  Aktarskan rajonan administracijan sauvuz, vn 2005 nägu (ende lidnan ratuš)
• 
  Lämoipalonvastaine palakund (2017)
• 
  Valdkundaline äifunkcionaline keskuz («Minun dokumentad»-ofis, 2017, istorine naižgimnazii)
• 
  Keskškol nomer 3 (2017, istorine mehiden käzitöiden škol)
• 
  Atkarsk-päraudtestancijan sauvuz vl 2017

Irdkosketused

• Lidnan da rajonan tobmuden sait (proatkarsk64.ru, vai atkarsk.moyaokruga.ru). (ven.)