Krasnii Kut

Vikipedii-späi
Krasnii Kut
Красный Кут
Valdkund Venäma
Eläjiden lugu (2021) 13,966 ristitud
Pind 8 km²
Krasnii Kut Красный Кут
Pämez' Aleksandr Jacenko
(2006−2008,
keväz'ku 2019—)
Telefonkod +7−84 560-xx-xxx
Avtokod 64, 164
Aigvö UTC+4 (MSK+1)


Krasnii Kut (ven.: Кра́сный Кут «čoma čogaine») om Venäman lidn da lidnankund Saratovan agjan suves. Se om Krasnii Kutan rajonan administrativine keskuz.

Istorii[vajehta | vajehtada tekst]

Eländpunktan aluz om pandud vll 1813−1819 sirdanuzil mehil, lähtnuzil erindha kozakoil Ukrainan Har'kovan aigaspäi, nimitihe kodižilon mödhe, kudamb vspäi 1850 sai Krasnokutsk-nimen (nüg. lidnanvuitte ukr.: Краснокутськ-žilo). Sirdanikoiden kahtenz' partii tuli ukrainižes Krasnii Kutaspäi vl 1837, lugetas sidä vot lidnan todesižen alusenpanendan vodeks oficialižikš.

Nevondkundaližen aigan oli lidnan statusanke vn 1925 elokuhusai, sid' žilo möst. Kätihe radnikžiloks vn 1939 tal'vkus. Žilo sai lidnan statusad vn 1966 11. päiväl kezakud.

Krasnii Kut šingotase torvarmaturan tegimel, elektromehanižel tegimel, sömtegimištol (maidtegim, sömkombinat, lindunkombinat, durran semniden ümbriradai tegim), raudten distancijal.

Geografijan andmused[vajehta | vajehtada tekst]

Lidn sijadase Jeruslan-jogen oiktal randal (ven.: Еруслан 278 km pitte, Volgan hura ližajogi), 45 m ü.m.t. keskmäižel korktusel. Matkad Saratovhasai om 92 km lodeheze orhal, 125 km avtotedme vai raudtedme. Lähembaižed lidnad oma Pallasovk (Volgogradan agj) 100 km suvhe orhal vai raudtel, 143 km avtotel, Engel's 86 km lodeheze orhal, 116 km avtotedme vai raudtedme, Jeršov 100 km päivnouzmha-pohjoižpäivnouzmha orhal, 130 km avtotedme vai raudtedme, i Novouzensk 98 km suvipäivnouzmha orhal, 123 km avtotedme vai raudtedme. Krasnii Kut-raudtestancii radab lidnan pohjoižpalas, raudte sarakoičese jogen hural randal.

Viž žilod i üks' raudtesarak mülüdas lidnankundha (municipaližhe ühtnikho) Krasnii Kutan ližaks. Lidnankundan pind — 230,14 km².

Eläjad[vajehta | vajehtada tekst]

Vn 2010 Venäman rahvahanlugemižen mödhe lidnan eläjiden lugu oli 14 416 ristitud, lidnankundan — 15 937 ristitud, rajonan pol'. Kaikiš suremb lidnan ristitišt oli 16..17 tuhad eläjid vll 1970−2001 (17 384 rist. vl 1989). Kaik 14 483 ristitud elihe lidnas i 17 758 ristitud kaikes lidnankundas vl 2018.

Rahvahad (2010, enamba 0,8%): venälaižed — 82,3%, kazahlaižed — 4,1%, ukrainalaižed — 2,6%, totarlaižed — 2,4%, armenijalaižed — 2,2%, korejalaižed — 1,2%, saksalaižed — 0,8%, toižed rahvahad — 3,9%, rahvahuden ozutandata — 0,5%.

Ortodoksižen hristanuskondan Pühän Stroican jumalanpert'[1] om saudud lidnas vajehtamha muretud Mikoi-arhangelan jumalanpertid. Islaman mečet' om avaitud 2000-nziš vozišpäi.

Professionaližen opendusen aluzkundad oma Krasnii Kutan politehnine licei[2], Ul'janovskan civiližaviacijan institutan Krasnii Kutan filial-lendandškol[3] i Saratovan valdkundaližen agrarižen universitetan Krasnii Kutan filial (ende Krasnii Kutan zooveterinarine tehnikum).

Galerei[vajehta | vajehtada tekst]

Homaičendad[vajehta | vajehtada tekst]

  1. Krasnii Kutan pühäpertid sobory.ru-saital. (ven.)
  2. Krasnii Kutan politehnižen licein sait (licey64krkut.ucoz.ru). (ven.)
  3. Krasnii Kutan civiližaviacijan lendandškolan sait (kkluga.ru). (ven.)

Irdkosketused[vajehta | vajehtada tekst]



Saratovan agjan lidnad
Arkadak | Atkarsk | Balakovo | Balašov | Engel's | Hvalinsk | Jeršov | Kalininsk | Krasnii Kut | Krasnoarmeisk | Marks | Novouzensk | Petrovsk | Pugačov | Rtiščevo | Saratov | Šihani | Vol'sk