Kamišin

Kamišin
Камышин
Lidnanznam;	Flag;
Valdkund	Venäma
Eläjiden lugu (2025)	104,220 ristitud
Pind	81 km²
Pämez'	Stanislav Zinčenko; (reduku 2018—)
Telefonkod	+7−84 457-xx-xxx
Avtokod	34, 134
Aigvö	UTC+3 (MSK+0)

Kamišin (ven.: Камы́шин) om Venäman lidn da lidnümbrik Volgogradan agjan pohjoižpäivnouzmas. Se om agjan koumanz' surtte lidn eläjiden lugun mödhe, mugažo Kamišinan rajonan administrativižeks keskuseks, ei mülü rajonha.

Istorii

Nügüd'aigaižen eländpunktan aluz om pandud vl 1668 kuti lidnuz. 18. voz'sadan augotišespäi sen nimi oli Dmitrijevsk, ph. Mitrein (Salonikilaižen) nimen mödhe. Vl 1780 se sai lidnan statusad nügüdläiženke nimenke sijaližen lühüdan jogen mödhe. Om kaičenus äi torgovanoiden vanhid pertid.

Kamišinan ižandusen päsarakod oma valamiž-mehanine (gazkranad, montažinstrumentan zbrujad), stökoltaran i puvillkanghiden pästand, sömtegimišt (leibänkombinat, maidon edheotand, sömproduktoiden kombinat), mugažo valamiž-ferroühthesuladusiden tegim i omblendedheotand oma saudud.

Geografijan andmused

Lidn sijadase ümbärdajan rajonan keskuzpalan päivnouzmas, Volgaveren ülüdel, 50 m keskmäižel korktusel valdmeren pindan päl. Reljef om kukhikaz. Kamišin vedase Kamišink-jogensun randištol (ven.: Камышинка kümnen kilometran pitte), pidust' Volgogradan vezivaradimen (Volgan) oiktad randad üks'toštkümneks kilometras.

Matkad Volgogradan röunhasai om 180 km suvipäivlaskmha, Saratovhasai — 194 km pohjoižhe. Nikolajevsk-lidn seižub Volgas päliči (vides kilometras), toine lähembaine lidn om Petrov Val kümne kilometrad päivlaskmha raudtel vai avtol.

Tobmuz

Kamišin om lidnümbrikon üks'jäižeks eländpunktaks. Se jagase läz kaks'kümneks koumeks lidnanlaptaks.

Lidnan Duman ezimez' om Vladimir Ponomaröv vn 2014 uhokuspäi. Edel vn 2018 redukud Duman ezimez' oli lidnümbrikon pämehen, sid' Administracijan pämez' kändihe lidnümbrikon pämeheks. Stanislav Zinčenko radab lidnan Administracijan pämehen vn 2014 keväz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 119,565 ristitud, vn 2021 — 107,927 ristitud. Vl 2017 kaik 111,775 ristitud eliba lidnas. Kaikiš suremb ristitišt oli 127..129 tuhad vozil 1993−1998 i 2002−2003.

Rahvahad (enamba 0,4 % vl 2010, ozutadud rahvahudenke): venälaižed — 94,6 %, ukrainalaižed — 1,4 %, saksalaižed — 0,9 %, armenijalaižed — 0,6 %, totarlaižed — 0,5 %, toižed rahvahad — 2,0 %.

Ortodoksižen hristanuskondan nell' pühäpertid^[1] oma avaitud lidnas: ph. Mikulai-čudonsädajan kafedraline päjumalanpert' (1825) i koume jumalanpertid. Islaman pühäpert' om saudud.

Openduz

Lapsiden opendusen aluzkundad oma 23 nomeriudud päivkodid, 17 keskškolad (nomer 1 (kaks' adresad), 3..12, 14..19), školan nomer 17 filial 8. toižendan korrekcijan klassoidenke, kul'turan da joudan Družba-keskuz («Sebruz»), koume sportškolad (nomer 1..3).

Profopendusen aluzkundad oma Kamišinan industrialiž-pedagogine^[2], politehnine^[3], biznesan i medicinan kolledžad, Kamišinan tehnologine institut (Volgogradan valdkundaližen tehnižen universitetan filial), Volgogradan čomamahtoiden institutan filial^[4], üläopendusen toižiden aluzkundoiden palakundad.

Transport

Ühtennimine Kamišin-raudtestancii om lopstancijaks «Tambov — Petrov Val — Kamišin»-jonol vspäi 1894. Borodinan avtotesild ühtenzoitab Kamišinkan randoid (vanh lidn da uz' lidn).

Ehtatimed ujudas Volgas päliči jädumatomal pordol (järgeližešti 15. sulaku — 15. kül'mku), avtod il'mpölusel — tal'vel. Jogiport om lidnas.

Galerei

Sodakaumišt i muštnik ottud plenha mad'jaralaižile sodamehile (2010)
Kamišinan istorine muzei (2010)
Ph. Mikulai-čudonsädajan kafedraline päjumalanpert', vn 2016 nägu
Arbuzan festival' (2012)
Kamišinan LEK vl 2010
«Sberbank:an» palakund vl 2011
«Opava»-adivpert' vl 2010
Volgogradan valdkundaline čomamahtoiden i kul'turan institut — Kamišinan filial (2016)
Ujundbassein (2010)

Homaičendad

Irdkosketused

Lidnümbrikon tobmuden aluzkundoiden oficialine sait (admkamyshin.info). (ven.)

Kamišin Vikiaitas

	Volgogradan agjan lidnad
	Dubovk \| Frolovo \| Kalač Donal \| Kamišin \| Kotel'nikovo \| Kotovo \| Krasnoslobodsk \| Leninsk \| Mihailovk \| Nikolajevsk \| Novoanninskii \| Pallasovk \| Petrov Val \| Serafimovič \| Surovikino \| Žirnovsk \| Urüpinsk \| Volgograd \| Volžskii

[1] Kamišinan pühäpertid sobory.ru-saital. (ven.)

[2] Kamišinan industrialiž-pedagogižen kolledžan sait (kamyshin-college.ru). (ven.)

[3] Kamišinan politehnižen kolledžan sait (kamtk.ru). (ven.)

[4] Volgogradan valdkundaline čomamahtoiden i kul'turan institut — Kamišinan filialan sait (artkamyshin.ru). (ven.)

[1]

[2]

[3]

[4]